រស់រានមានជីវិតតែ ៣៣ ឆ្នាំក៏ដោយ តែអ្វីដែលកំពូលតារាសម្ដែង លី ស៊ាវឡុង បានបន្សល់ឲ្យវិស័យភាពយន្តចិនគឺគ្មានអ្នកណាអាចធ្វើបាននោះទេ។
តស៊ូពីបាតដៃទទេ
លី ស៊ាវឡុង ឈ្មោះអង់គ្លេស Bruce Lee មានឈ្មោះពិតថា Lee Jun Fan កើតនៅថ្ងៃទី ២៧ ខែវិច្ឆិកាឆ្នាំ ១៩៤០។ លី ស៊ាវឡុង ចាប់កំណើតនៅអាមេរិកតែធំដឹងក្ដីនៅទីក្រុងហុងកុង។ កាលនៅតូច ស៊ាវឡុង មានរូបរាងស្គមស្គាំងនិងទន់ខ្សោយ។ នៅពេលមានអាយុ ៧ឆ្នាំ កុមារានេះត្រូវបានឪពុកបង្រៀនក្បាច់គុនតៃជិក្នុងគោលបំណងហ្វឹកហាត់សុខភាព។
អាយុ ១៣ឆ្នាំ លី ស៊ាវឡុង ចាប់ផ្ដើមតាមរៀនក្បាច់គុនជាមួយលោកគ្រូ Yip Man។ ក្រៅពីប្រឹងប្រែងហាត់រៀនក្បាច់គុនចិន លី ស៊ាវឡុង ក៏ចាប់ផ្ដើមស្វែងយល់ពីក្បាច់គុនរបស់លោកខាងលិចផងដែរ។ ឆ្នាំ ១៩៥៩ លី ស៊ាវឡុង ត្រូវបានគ្រួសារបញ្ជូនមកសហរដ្ឋអាមេរិកវិញ។ ឆ្នាំបន្ទាប់មកទៀត លោកបានចូលរៀនមហាវិទ្យាល័យ។ ក្រៅពីពេលសិក្សា លី ស៊ាវឡុង ក៏បានចំណាយពេលដើម្បីបំប៉នចំណេះដឹងខាងក្បាច់គុនផងដែរ។ នៅក្នុងសាលា លី ស៊ាវឡុង បង្កើតក្លឹបក្បាច់គុនបុរាណចិននិងឧស្សាហ៍ហាត់ក៏ដូចជា សម្ដែងជាក្រុម។
ដើម្បីផ្សព្វផ្សាយក្បាច់គុនចិន ឆ្នាំទី២ក្នុងមហាវិទ្យាល័យ លី ស៊ាវឡុង បានជួលដីមួយជ្រុងនៅក្នុងចំណតយានយន្តសាលាដើម្បីពង្រីក ក្លឹបរបស់ខ្លួន។ លោកខំប្រឹងរៀនក្បាច់គុនបណ្ដើរ ផ្ទេរចំណេះដឹងឲ្យកូនសិស្សបណ្ដើរ។ នៅក្នុងក្លឹបក្បាច់គុនរបស់ខ្លួន លី ស៊ាវឡុង បានស្គាល់ Linda Emery នារីវ័យក្មេងម្នាក់ចង់រៀនក្បាច់គុនចិន។ ពួកគេចាប់ផ្ដើមមានមនោសញ្ចេតនាជាមួយគ្នា។ ឆ្នាំ ១៩៦៤ អ្នកទាំង២បានរៀបការជាមួយគ្នា។ ក្រោយមង្គលការ ប្ដីប្រពន្ធ លី ស៊ាវឡុង ព្យាយាមពង្រឹងសាលាគុនរបស់ខ្លួន។
លី ស៊ាវឡុង បានចាប់ផ្ដើមប្រឡូកក្នុងវិស័យសិល្បៈតាំងពីវ័យក្មេង។ ឆ្នាំ ១៩៤៨ នៅពេលមានអាយុ ៨ឆ្នាំ Bruce Lee បានសម្ដែងតួតូចមួយក្នុងរឿង “Fu Gui Fu Yun” ដោយយករហស្សនាមថា Lee Ham។ រដូវក្ដៅឆ្នាំ ១៩៧១ លី ស៊ាវឡុង បានទទួលពាក្យអញ្ជើញពីផលិតកម្មភាពយន្តហុងកុងមួយដើម្បីចុះកុងត្រា ថតរឿង “The Big Boss” និង “Fist of Fury” ជាមួយតម្លៃខ្លួន១៥ម៉ឺនដុល្លារអាមេរិក។ ភាពយន្តទាំង២ខាងលើទទួលបានជោគជ័យយ៉ាងខ្លាំងលើចំនួនអ្នកចូល ទស្សនា រុញកេរ្តិ៍ឈ្មោះរបស់ លី ស៊ាវឡុងឲ្យល្បីសព្វអាស៊ី។ ក្រោយមកតារាសម្ដែងល្បីឈ្មោះនេះបានសហការជាមួយហូលីវូដដើម្បីផលិត ភាពយន្ត “Enter the Dragon”។
វត្តមានរបស់លី ស៊ាវឡុងនៅក្នុងវិស័យសិល្បៈហូលីវូដបានបើកទំព័រថ្មីឲ្យសិល្បករជា ច្រើនរបស់ចិនមានឱកាសបានឈានជើងចូលទីផ្សារដ៏ទូលាយមួយនេះ។ ជាអកុសល ខណៈកំពុងស្ថិតនៅលើកំពូលក្នុងអាជីពរបស់ខ្លួន ជាមួយនឹងគម្រោងភាពយន្តធំៗជាច្រើននោះ ថ្ងៃទី២០ខែកក្កដាឆ្នាំ ១៩៧៣ លី ស៊ាវឡុងបានទទួលមរណភាពនៅទីក្រុងហុងកុង នៅពេលដែលមានអាយុមិនទាន់គ្រប់៣៣ឆ្នាំផង។ កំពូលតារាសម្ដែងក្បាច់គុនរូបនេះត្រូវបានគេបញ្ចុះក្នុងទីក្រុង Seattle សហរដ្ឋអាមេរិក។
អាថ៌កំបាំងជុំវិញការស្លាប់របស់ លី ស៊ាវឡុង
ថ្ងៃទី ២០ខែកក្កដាឆ្នាំ ១៩៧៣ ព័ត៌មាន លី ស៊ាវឡុង លាចាកលោកបែកចេញបានធ្វើឲ្យទីក្រុងទាំងហុងកុងទាំងមូល ត្រូវកក្រើករញ្ជួយ។ ដើមឡើយ បណ្ដាញព័ត៌មានបានសរសេរថា៖ “កំពូលតារាសម្ដែងក្បាច់គុន លី ស៊ាវឡុង បានដួលសន្លប់នៅផ្ទះផ្ទាល់ខ្លួនវេលាម៉ោង ១១និង៣០នាទីយប់។ ប្រពន្ធលី ស៊ាវឡុង បានបញ្ជូនប្ដីទៅមន្ទីរពេទ្យ Queen’s Elizabeth ដើម្បីសង្គ្រោះបន្ទាន់តែមិនទាន់ពេល។ ខាងមន្ទីរពេទ្យមិនទាន់ហ៊ានបញ្ជាក់មូលហេតុនៃការស្លាប់នេះ”។
ទន្ទឹមនឹងការអាណិតស្ដាយក្រោយ មនុស្សជាច្រើនចាប់ផ្ដើមសង្ស័យដល់ការស្លាប់របស់របស់ លី ស៊ាវឡុង ។ គេយល់ឃើញថាវាជារឿងចម្លែកនៅពេលមនុស្សម្នាក់កំពុងមានសុខភាពល្អ និងមានក្បាច់ខ្លួនពេញខ្លួននោះ នៅសុខៗហេតុអីបានជាស្លាប់លឿនដូចនេះ? មានពាក្យចចាមអារ៉ាមជាច្រើនពាក់ព័ន្ធនឹងការស្លាប់របស់ លី ស៊ាវឡុង ។ អ្នកខ្លះនិយាយថា លោកបានស្លាប់នៅលើគ្រែក្នុងផ្ទះរបស់តារាសម្ដែង Betty Ting ដោយសារផឹកថ្នាំសម្រើបច្រើនជ្រុល។ អ្នកខ្លះបានលាន់មាត់ថាលោកត្រូវក្រុមសង្គមងងឹតហុងកុងធ្វើឃាត។ ឯមតិមួយចំនួនទៀតបានលេចឮថាលោកត្រូវកំពូលអ្នកហាត់ក្បាច់គុន ម្នាក់ចុចជីពចរ។ ចំណែកខាងមន្ទីរពេទ្យវិញបានបញ្ជាក់ថា លោកត្រូវស្លាប់ដោយសារជំងឺហើមខួរក្បាលដោយមានប្រតិកម្មជាមួយ ថ្នាំបន្ថយការឈឺចាប់។
យ៉ាងណាក៏ដោយ កាសែត The Star របស់ហុងកុងបានអះអាងថា តារាសម្ដែងរូបនេះមិនបានស្លាប់នៅផ្ទះផ្ទាល់ខ្លួននោះទេ គឺស្លាប់នៅផ្ទះរបស់តារាសម្ដែងស្រី Betty Ting។ តាមបណ្ដាញព័ត៌មានមួយនេះ ហេតុការណ៍ត្រូវបានកើតឡើងដូចតទៅ៖ ប្រហែលម៉ោង១៣ថ្ងៃទី២០ខែកក្កដា ប្រពន្ធលី ស៊ាវឡុងបានចេញទៅក្រៅ លោកក៏បានណាត់ជួបជាមួយផលិតករភាពយន្ត Raymond Chow ដើម្បីពិភាក្សាពីរឿង “Game of Death”។ ប្រហែលជាម៉ោង ១៤ Raymond បានមកដល់ផ្ទះរបស់ លី ស៊ាវឡុង ។
អ្នកទាំងពីរបាននិយាយគ្នាមួយសន្ទុះពីសាច់រឿងរបស់ភាពយន្តនេះ។ ប្រមាណជាម៉ោង១៦ អ្នកទាំង២បានមកដល់ផ្ទះរបស់ Betty Ting តារាសម្ដែងមួយរូបក្នុងភាពយន្តខាងលើហើយក៏ស្រីកំណាន់របស់ លី ស៊ាវឡុង ផងដែរ។ មកដល់ម៉ោង១៩ លី ស៊ាវឡុង បាននិយាយថាលោកមិនសូវស្រួលខ្លួនឈឺក្បាលបន្តិច។ Betty Ting បានយកថ្នាំបន្ថយការឈឺចាប់ដែលនាងធ្លាប់ប្រើឲ្យ លី ស៊ាវឡុង លេប។ ក្រោយមក លី ស៊ាវឡុង បានចូលគេងនៅក្នុងបន្ទប់របស់ Betty Ting។ ប្រហែលម៉ោង ២០ Raymond បានចេញទៅក្រៅដោយមានធុរៈផ្ទាល់ខ្លួន។ កន្លះម៉ោងក្រោយមកនៅពេល Betty Ting ចូលក្នុងបន្ទប់ក៏ឃើញថា លី ស៊ាវឡុង កំពុងគេងលក់។
ដល់ម៉ោង២១ លី ស៊ាវឡុងនៅតែមិនទាន់ភ្ញាក់ឡើងវិញ។ ម៉ោង២១ និង៤៥នាទី Raymond ត្រលប់មកវិញ លោកបានដាស់ លី ស៊ាវឡុង តែគេមិនកម្រើក។ ម៉ោង២២ជាង វេជ្ជបណ្ឌិតបានមកដល់ផ្ទះរបស់ Betty Ting និងដឹងថាលោកបានសន្លប់បាត់ស្មារតី។ លី ស៊ាវឡុងត្រូវបានបញ្ជូនទៅមន្ទីរពេទ្យភ្លាមៗតែនៅតែសង្គ្រោះមិន ទាន់។
Raymond Chow គឺជាអ្នកទម្លាយព័ត៌មាន លី ស៊ាវឡុង ស្លាប់មុនគេ។ លោកបានឲ្យដឹងថា លី ស៊ាវឡុង បានស្លាប់នៅផ្ទះខ្លួនឯងហើយមានប្រពន្ធនៅក្បែរនៅពេលកើតហេតុ។ បងប្រុសរបស់តារាក្បាច់គុននេះក៏ប្រាប់ដូចគ្នា។ យ៉ាងណាមិញ អ្នកទាំង២ត្រូវគេដឹងថានិយាយកុហក ដោយសារកំណត់ហេតុរបស់ឡានសង្គ្រោះបន្ទាន់បានសរសេរថា លី ស៊ាវឡុង ត្រូវបានដឹកចេញពីផ្ទះរបស់ Betty Ting។ មហាជនបាននាំគ្នាជេរតិះដៀល Raymond Chow តែក្រោយមកទើបគេដឹងថាលោកធ្វើនេះគឺក្នុងន័យល្អ។ លី ស៊ាវឡុង តែងតែជួបពាក្យចចាមអារ៉ាមមានស្នេហាលួចលាក់ជាមួយតារាសម្ដែង Betty Ting ដូចនេះហើយ បើសិនជារឿងលោកស្លាប់នៅផ្ទះរបស់នាង នឹងធ្វើឲ្យកេរ្តិ៍ឈ្មោះរបស់លោកត្រូវខូចទាំងស្រុង។
មិនខុសពីការប៉ាន់ស្មាន រាល់ការស្អប់ខ្ពើមទាំងឡាយត្រូវធ្លាក់លើតារាសម្ដែង Betty Ting។ នាងត្រូវគេតិះដៀលមិនអាសូរ។ មហាជនបាននាំគ្នាដាក់រហស្សនាមឲ្យនាងថា “ឃាតករ” ឬ “កញ្ជ្រោងបិសាច” ជាដើម៕
ប្រភព៖ www.news.sabay.com
