ភ្នំពេញ៖ តុលាការរាជធានីភ្នំពេញ បានសម្រេចចេញដីកាឃុំខ្លួនបណ្តោះអាសន្ន លោក ស៊ុត ឌីណា ឯកអគ្គរាជទូតខ្មែរប្រចាំនៅប្រទេសកូរ៉េខាងត្បួង ក្រោមបទចោទចំនួនពីរ គឺប្រព្រឹត្តអំពើពុក រលួយ និងរំលោភអំណាច ។ អង្គភាពប្រឆាំងអំពើពុករលួយនិយាយថាលោក ស៊ុត ឌីណា មានទ្រព្យសម្បត្តិស្ដុកស្តម គឺរាប់លានដុល្លារ ដែលត្រូវតែបំភ្លឺ បើមិនដូច្នេះទេនឹងត្រូវរឹបអូសទាំងអស់ ។ ប្រសិនបើនៅពេលអនាគត អង្គភាពប្រឆាំងអំពើពុករលួយ (ACU) បើកការស៊ើបអង្គេតលើមន្ត្រីមានអំណាចមួយចំនួន ដូចករណីពុករលួយលោក ស៊ុត ឌីណា ថាតើស្ថានភាពអំពើពុករលួយនៅកម្ពុជាទៅជាយ៉ាងណា?
កាលពីម្សិលម៉ិញ តុលាការរាជធានីភ្នំពេញ សម្រេចចោទប្រកាន់ លោក ស៊ុត ឌីណា ចំនួនពីរបទចោទ ដែលនឹងមានទោស ០២ ឆ្នាំ ទៅ ០៥ ឆ្នាំ ក្រោមក្រមព្រហ្មទណ្ឌ។
ការចោទប្រកាន់នេះ បន្ទាប់អង្គភាពប្រឆាំងអំពើពុករលួយ រកឃើញឯកអគ្គរាជទូតខ្មែរប្រចាំកូរ៉េខាងត្បួងរូបនេះ មានប្រាក់សុទ្ធជាង ៧លានដុល្លារក្រៅធនាគារ មានដី ១០កន្លែង មានត្បូង ៥០០គ្រាប់ និងមាសជិត ១៣ គីឡូក្រាម។
បើប្រសិនបើនៅពេលអនាគត ACU បើកការស៊ើបអង្កេតទ្រង់ទ្រាយធំ ថាតើស្ថានភាពពុករលួយនៅកម្ពុជា មានទំហំធំប៉ុនណា បើត្រឹមលោក ស៊ុត ឌីណា ម្នាក់ទើបចាប់ផ្ដើមមានបុណ្យសក្តិឆ្នាំ ២០០៩ មានប្រាក់ច្រើនសម្បើងបែបនេះ ។
លោក ព្រាប កុល នាយប្រតិបត្តិអង្គការតម្លាភាពកម្ពុជា បានមានប្រសាសន៍ថា លោកមិនភ្ជាក់ផ្អើលនោះទេ ករណីឯកអគ្គរាជទូតខ្មែរប្រចាំកូរ៉េខាងត្បូង លោក ស៊ុត ឌីណា មានប្រាក់រាប់លានដុល្លារនេះ ។ លោកថាមានមន្ត្រីធំៗ អ្នកមានអំណាចស្រុកខ្មែរផ្សេងទៀត មានលុយច្រើនកបពពក ពួកគេសុទ្ធតែបានចូលកាន់តំណែងរាបសិបឆ្នាំ ។
លោក ព្រាប កុល បានសង្កេតឃើញថាមន្ត្រីជាន់ខ្ពស់ទាំងនោះ មានរថយន្តទំនើបៗតម្លៃរាប់ម៉ឺនដុល្លារ រស់នៅក្នុងភូមិគ្រឹះធំស្កឹមស្កៃ មានដីរាប់សិបកន្លែង។ លោកបានចោទជាសំនួរថា តើលុយនោះបានមកពីណា?
លោក ព្រាប កុល និយាយថា៖«យើងមានដែលធ្លាប់គិតថាអ្នកធំស្រុកខ្មែរយើងក្រពីអង្កាលណា ? យើងធ្លាប់ឃើញមន្ត្រីធំ ធ្លាប់ឃើញសម្ភារៈគាត់ប្រើប្រាស់ ឃើញផ្ទះ យើងឃើញវិមាន យើងឃើញរបស់របរផ្សេងៗ យើងអត់ដែលថា អ្នមមានស្រុកខ្មែរក្រ គាត់ខ្វះលុយអ្វីទេ។ យើងមានតែធ្លាប់ភ្ជាក់ផ្អើលថា ប្រទេសកម្ពុជាជាប្រទេសមួយស្ថិតនៅក្នុងចំណោមប្រទេសកំពុងអភិវឌ្ឍ ជនបរទេសមួយចំនួនក៏គាត់ភ្ញាក់ផ្អើលថាពេលគាត់មកដល់ស្រុកខ្មែរ មានរថយន្តទំនើប ប្រទេសដែលជឿនលឿនខ្លះ មិនមានប្រើផង»។
តាមការស្រាវជ្រាវរបស់អង្គការតម្ភាភាពអន្តរជាតិ ប្រទេសកម្ពុជាមានឈ្មោះជាប់ជាប្រភពពុករលួយដ៏ធ្ងន់ធ្ងរ គឺមានលេខ ១៥៦ ក្នុងចំណោមប្រទេស ១៧៦ បើធៀបនឹងប្រទេសក្នុងតំបន់អាស៊ីអាគ្នេយ៍ គឺកម្ពុជាមានស្ថានភាព អំពើពុករលួយធ្ងន់ធ្ងរជាងគេ ។
អ្នកសិក្សាស្រាវជ្រាវពីការអភិវឌ្ឍន៍សង្គមមួយរូបទៀតគឺ លោកបណ្ឌិត មាស នី មានប្រសាសន៍ថា អង្គភាពប្រឆាំងអំពើពុលរលួយ (ACU) គ្រាន់តែជាសត្វស្ទាំងដែលចាប់បានតែកូនមាន់គ្មានមេការពារប៉ុណ្ណោះ ចំណែកឯកូនមាន់ដែលមានការពារគឺស្ទាំងនេះមិនអាចចាប់បានឡើយ។
លោកបណ្ឌិត មាស នី មានប្រសាសន៍ថា៖« ទី ១ ACU នេះ មិនទាន់មានឥទ្ធិពលគ្រប់គ្រាន់នៅក្នុងការគ្រប់គ្រង់ ឬ ស៊ើបអង្កេតទៅលើអំពើពុករលួយ ដែលមានទូទាំងប្រព័ន្ធរបស់រដ្ឋាភិបាលបាននៅឡើយទេ។ ទី ២ ទៀត ហាក់ដូចជាមកដល់ពេលនេះបានត្រឹមតែជាសត្វស្ទាំង ដែលគេប្រើឲ្យចាប់តែកូនមាន់ណាដែលរងា មិនមានមេមានកើយ ឬ ក៏ជាគណបក្សប្រឆាំង»។
ករណីមួយទៀត លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌កម្ពុជា ត្រូវបានសារព័ត៌មានបរទេសចេញផ្សាយថា បានចំណាយប្រាក់ ៥០០០ ដុល្លារដើម្បីទិញភាគហ៊ុនចំនួន ៥០០០ នាឆ្នាំ ២០០៧ ក្នុងក្រុមហ៊ុនមួយឈ្មោះ British Virgin Islands ។ តែយ៉ាងណា សេចក្តីប្រកាសព័ត៌មានរបស់ក្រសួងយុត្តិធម៌បានបដិសេធថា លោក អង្គ វង្សវឌ្ឍានា មិនស្គាល់ក្រុមហ៊ុន British Virgin Islands និងក៏មិនធ្លាប់ទិញភាគហ៊ុនក្នុងក្រុមហ៊ុនបរទេសនោះដែរ។
ជុំវិញបញ្ហានេះ អង្គភាពប្រឆាំងអំពើពុករលួយ លោក ឱម យ៉ិនទៀត មានប្រសាសន៍កាលពីម្សិលមិញថា ទំនងជាអាចនឹងបើការស៊ើបអង្កេត លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌នៅពេលខាងមុខ ប៉ុន្តែលោកមិនទាន់បញ្ជាក់ថា នៅពេលណានោះទេ។
ថ្មីៗនេះ លោក កែម ឡី អ្នកសិក្សាស្រាវជ្រាវពីការអភិវឌ្ឍន៍សង្គម មានប្រសាសន៍នៅក្នុងវេទិការរបស់វិទ្យុអាស៊ីសេរីថា អតីតអ្នកមានអំណាចស្រុកខ្មែរជាច្រើនបានទិញផ្ទះ និងដីតម្លៃរាប់រយលានដុល្លារនៅឯប្រទេសអូស្ត្រាលី ប៉ុន្តែលោកមិនបានបញ្ជាក់ឈ្មោះនរណានោះទេ។
យ៉ាងណាក៏ដោយ លោក ស៊ុត ឌីណា គឺជាមន្ត្រីជាន់ខ្ពស់ម្នាក់ទៀត នៃអតីតគណបក្សហ្វ៊ុនស៊ីនប៉ិច ដែលបានចោទ ប្រកាន់អំពើពុករលួយ និង បំពានការងារចាត់តាំង បន្ទាប់ពីលោក ណាន់ ស៊ី អតីតឯកអគ្គរាជទូតខ្មែរនៅប្រទេសព្រុយណេ ក៏រងការចោទប្រកាន់ និងទទួលទោសដូចនេះដែរ កាលពីឆ្នាំ ២០០៨ ។ លោក ណាន់ ស៊ី បានរត់គេចខ្លួនទៅក្រៅប្រទេសរហូតមកដល់ពេលនេះ ។
មានការចោទសួរ ថាតើករណី លោក ស៊ុត ឌីណា ជាកម្មសិក្សាមួយថ្មីទៀតចំពោះការកម្ចាត់មនុស្សចុះចូលបក្សកាន់អំណាច ហើយក៍ផ្ដើមឱ្យមានការសង្ស័យថា មន្ត្រីជាន់ខ្ពស់កម្ពុជាមួយចំនួនមានប្រាក់វាលលានដុល្លារ ៕
