ភ្នំពេញ៖ យោងតាមលិខិតជូនដំណឹងរបស់ក្រសួងយុត្តិធម៌ បានចេញផ្សាយកាលពីថ្ងៃទី ០៧ ខែមេសាម្សិលម៉ិញ បានឱ្យដឹងថា ក្រសួងសុំលើកពេលពិនិត្យនិងសម្រេចលើសំណើសុំបន្ធូរបន្ថយទោស និងលើកលែងទោសដល់ទណ្ឌិត ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំ ២០១៦ ទៅក្នុងឱកាសពិធីបុណ្យពិសាខបូជាឆ្នាំ ២០១៦ វិញ ។ ការលើកពេលនេះ សង្គមស៊ីវិលដែលធ្វើការលើរឿងនេះ រំពឹងថា មន្ត្រីពន្ធធនាគារនឹងអនុវត្តលើសំណើរបស់ទណ្ឌិតប្រកបដោយតម្លាភាព ព្រោះការបន្ធូរបន្ថយទោស និងលើកលែងទោសដល់ទណ្ឌិតកាលពីអតីតកាលមានជាប់ពាក់ព័ន្ធនឹងអំពើពុករលួយពីក្រោយ។
តាមលិខិតជូនដំណឹងរបស់ក្រសួងយុត្តិធម៌ បានឱ្យដឹងថាក្រសួងសុំលើកពេលពិនិត្យ និងសម្រេចលើសំណើសុំបន្ធូរបន្ថយទោស និង លើកលែងទោសដល់ទណ្ឌិតវិញ ក្រោមហេតុផលថា សំណើដែលគណកម្មការជាតិបានទទួលពីគណកម្មការថ្នាក់រាជធានី-ខេត្តចំនួន ១២ គឺពុំទាន់ត្រឹមត្រូវតាមលក្ខខណ្ឌនៅឡើយនោះទេ ។ មិនទាន់ត្រឹមត្រូវតាមលក្ខខណ្ឌ ក៏ព្រោះថាសំណើមួយចំនួនពុំទាន់អនុវត្តត្រឹមត្រូវតាមលក្ខខណ្ឌ និង ការរៀបចំឯកសារមិនបានត្រឹមត្រូវតាមគោលការណ៍ច្បាប់នៅឡើយ ក្នុងនោះរួមទាំងកង្វះខាតព័ត៌មាននៃសំណុំឯកសាររបស់ទណ្ឌិតមួយចំនួនផងដែរ ។
ក្នុងសេចក្តីជូនដំណឹងដដែលក៏បានឱ្យដឹងទៀតថា ការពន្យាពេលនេះ គឺដើម្បីធានាបាននូវការអនុវត្តត្រឹមត្រូវតាមគោលការណ៍ និងទម្រង់លក្ខខណ្ឌដែលមានចែងក្នុងបទបញ្ញត្តិច្បាប់ជាធរមាន ។ ក្រសួងសម្រេចលើកពេលលើកលែងទោសទណ្ឌិតនេះ ក្នុងឱកាសចូលឆ្នាំថ្មីនេះ ទៅក្នុងឱកាសបុណ្យពិសាខបូជាឆ្នាំ ២០១៦ វិញ ។
ទាក់ទិនក្នុងរឿងនេះ លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា សាទរក្នុងការលើកពេលនេះ ដោយលើកឡើងថា ការលើកពេលរបស់ក្រសួងគឺបង្ហាញពីការយកចិត្តទុកដាក់របស់ក្រសួងឡើងវិញ បន្ទាប់ពីមានបញ្ជាពីនាយករដ្ឋមន្ត្រី ហាមមិនឱដោះលែងទណ្ឌិតដែលមានទោសពីបទល្មើសឆក់ប្លន់រួមមក។ តាមការសង្កេតកន្លងមកជុំវិញបញ្ហាបន្ធូរបន្ថយ និង លើកលែងទោសដល់ទណ្ឌិតនេះ លោក សន ជ័យ បន្ថែមថា គឺមានពាក់ព័ន្ធទៅនឹងអំពើពុករលួយនៅពីក្រោយ ដែលនាំឱ្យមានប្រព្រឹត្តទៅមិនតម្លាភាពនោះទេ។
លោក សន ជ័យ ៖ «ខ្ញុំថាមានបញ្ហា ជាពិសេសរឿងតម្លាភាពនេះ ព្រោះអីព័ត៌មានដែលយើងដឹងពី អតីតទណ្ឌិតក៏ធ្លាប់លើកឡើងដែរថា លក្ខខណ្ឌមួយចំនួនដែលទណ្ឌិតមិនគួរទទួលបាននូវការលើកលែងទេ ប៉ុន្តែបែបជាត្រូវបានលើកលែងវិញ ជាថ្នូរនឹងការសូកប៉ាន់ណាមួយ»។
ចំណែកលោក អំ សំអាត មន្ត្រីជាន់ខ្ពស់ផ្នែកស៊ើបអង្កេតនៃអង្គការលីកាដូ លើកឡើងថា ការពន្យាពេលលើកលែងទោសនិងបន្ធូរបន្ថយទោស គឺខុសពីនីតិវិធីច្បាប់ស្តីពីការគ្រប់គ្រងពន្ធធនាគារនិងរដ្ឋធម្មនុញ្ញផងដែរ ដែលបានចែងឱ្យមានការបន្ធូរបន្ថយ និងលើកលែងទោសទណ្ឌិតក្នុងមួយឆ្នាំបីដង ។ លោក អំ សំអាត បន្តថា កន្លងមកសង្គមស៊ីវិលធ្លាប់ធ្វើរិះគន់ចំពោះប្រសិទ្ធភាពនិងតម្លាភាពក្នុងការដោះលែងទណ្ឌិតផងដែរ ព្រោះការលើកលែងទោសកន្លងទៅ គឺមានការសូកប៉ាន់ជាថ្នូរនឹងដោះលែង ដោយមន្ត្រីពន្ធធនាគារមិនបាន វាយតំលៃពីកែប្រែអត្តចរិតរបស់ទណ្ឌិតនោះទេ ។
លោក អំ សំអាត ៖ «យើងជាសង្គមស៊ីវិលយើងតែងតែផ្តល់ជាអនុសាសន៍ ហើយក៏មានការរិះគន់ជាយូរហើយថា ការលើកលែង និងបន្ធូរបន្ថយនេះគឺមានភាពមិនប្រក្រតី វាពាក់ព័ន្ធនឹងអំពើពុករលួយ។ បានន័យថា អ្នកដែលមានលុយមានកាសហ្នឹងអាចទទួលឈ្មោះទៅនឹងការលើកលែង និងបន្ធូរបន្ថយ»។
វិទ្យុស្រី្តមិនទាន់អាចសុំការបំភ្លឺពីរឿងនេះបាននៅឡើយនោះទេថ្ងៃនេះ។
យោងតាមច្បាប់ស្តីពីការគ្រប់គ្រងពន្ធធនាគារ ច្បាប់រដ្ឋធម្មនុញ្ញ បទដ្ឋានគតិយុត្តិ និងបទបញ្ជាទាក់ទងពន្ធធនាគារ បានចែងពីលក្ខខណ្ឌនៃការបន្ធូរបន្ថយនិងលើកលែងទោស គឺលុះត្រាតែទណ្ឌិតនោះមានការកែប្រែអត្តចរិតកែប្រែចិត្តគំនិតដែលអាចធានាបានថា ពេលចេញពន្ធធនាគារអាចរួមរស់ជាមួយក្រុមគ្រួសារ និង សង្គមជាតិបានសុខសន្តិភាព។
គួរកត់សំគាល់ថា ការលើកពេលលើកលែងទោស និងបន្ធូរបន្ថយទោសនៅពេលនេះ បន្ទាប់ពីលោកនាយករដ្ឋមន្ត្រី ហ៊ុន សែន បានហាមឃាដល់មន្ត្រីពន្ធធនាគារមិនត្រូវបន្ធូរបន្ថយទោស និង លើកលែងទោសដល់ទណ្ឌិតណាដែលជាប់ពាក់ព័ន្ធនិងបទល្មើសឆក់ ប្លន់ និងគ្រឿងញៀនជាដើម ដែលលោកបានបញ្ជាក់ថា អ្នកទោសមុខដដែរៗ ៕
