ភ្នំពេញ៖ សម្ដេចនាយករដ្ឋមន្ត្រី ហ៊ុន សែន អំណរសាទរ លោក ង្វៀង ស៊ុង ផុង ដែលត្រូវបានជ្រើសតាំងជានាយករដ្ឋមន្ត្រីនៃសាធារណរដ្ឋសង្គមនិយមវៀតណាម ដោយសន្យាថានឹងធ្វើការជិតស្និទ្ធជាមួយគ្នា ដើម្បីផលប្រយោជន៍ទៅវិញទៅមកនៃប្រជាជនទាំងពីរ។
ក្នុងលិខិតសាទរចុះផ្សាយនៅថ្ងៃទី០៧ ខែមេសា ឆ្នាំ ២១០៦ សម្ដេចហ៊ុន សែន សរសេរថា៖ «ខ្ញុំរង់ចាំធ្វើការយ៉ាងជិតស្និទ្ធជាមួយឯកឧត្តម និង ឆ្លៀតឱកាសនេះ សូមប្រសិទ្ធពរជូនឯកឧត្តម សូមប្រកបដោយសុខភាពល្អ សុភមង្គល និង សូមទទួលបានជោគជ័យដ៏ធំធេងក្នុងការបំពេញភារកិច្ចដ៏ឧត្តុង្គឧត្តមរបស់ឯកឧត្តម ពិសេសការអនុវត្តផែនការអភិវឌ្ឍសេដ្ឋកិច្ចសង្គម សម្រាប់ ០៥ឆ្នាំខាងមុខ ២០១៦-២០២០ ដើម្បីនាំមនូវនិរន្តរភាពនៃសុភមង្គលនិងភាពសំបូររុងរឿងជូនប្រជាជនវៀតណាម»។
លោក ហ៊ុន សែន បន្តក្នុងលិខិតដដែលថា៖ «ស្របតាមស្មារតីនៃភាពជាអ្នកជិតខាងល្អ មិត្តភាពជាប្រពៃណី សាមគ្គីភាពនិងកិច្ចសហប្រតិបត្តិការលើគ្រប់វិស័យទំនាក់ទំនងរវាងប្រទេសទាំងពីរនឹងត្រូវបានលើកកម្ពស់និងពង្រឹងពង្រីកបន្ថែមទៀតឲ្យកាន់តែស៊ីជម្រៅ ដើម្បីផលប្រយោជន៍ទៅវិញទៅមកសម្រាប់ប្រជាជនទាំងពីរ ក៏ដូចជាដើម្បីកសាងសហគមន៍អាស៊ានមួយដ៏រឹងមាំនិងសមស្រប…»។
កាលពីថ្ងៃម្សិលមិញ លោក សម រង្ស៊ី ប្រធានគណបក្សសង្គ្រោះជាតិដែលកំពុងគេចខ្លួននៅក្រៅប្រទេសក៏បាន សាទរនាយករដ្ឋមន្ត្រីវៀតណាមថ្មីនេះដែរ។ លោក សម រង្ស៊ី បានសរសើរមេដឹកនាំវៀតណាម ដែលបានឡើងកាន់អំណាច ហើយចុះចេញវិញ តាមការកំណត់របស់ច្បាប់ដោយបានផ្លាស់ប្ដូរ ១០ ឆ្នាំម្ដង។
លោក ង្វៀង ស៊ុង ផុង ទទួលបានការតែងតាំងដោយសមាជិកសភាសំឡេងភាគច្រើន ហើយបានឡើងមកកាន់តំណែងជំនួស លោក ង្វៀន តានយ៉ុង ដែលបានដាក់ឱ្យចាកចេញពីតំណែង៕
