ប្រធានាធិបតីរុស្ស៊ី ផ្លាឌីមៀល ពូទីន បដិសេធការចោទប្រកាន់មួយ ដែលកាសែតរបស់ប្រទេស ប៉ាណាម៉ា ចុះផ្សាយថា លោកប្រព្រឹត្តអំពើពុករលួយ ដោយចាត់ទុកថា ជាការបញ្ចេញ សារនយោបាយរបស់ក្រុមប្រឆាំង។
ការបដិសេធរបស់លោក ផ្លាឌីមៀល ពូទីន គឺជាការថ្លែងដំបូងគេរបស់មេដឹកនាំពិភពលោក ដែលមានឈ្មោះក្នុងរបាយការណ៍ស៊ើបអង្កេតរបស់កាសែត ប្រទេសប៉ាណាម៉ា ដែលស្រង់ចេញពីបញ្ជីឈ្មោះគណនីរបស់ក្រុមហ៊ុន Mossack Fonseca។ ក្រុមហ៊ុននេះ ត្រូវបានរកឃើញថាជាស្ថាប័នលាងលុយកង្វក់ធំមួយនៅលើពិភពលោក ដែលមានមូលដ្ឋាននៅប្រទេស ប៉ាណាម៉ា។
លោក ពូទីន បន្តថា វាជាចេតនាមួយទៀត របស់ពួកលោកខាងលិចដែលប្រឆាំងរូបលោក ។
បើទោះជាយ៉ាងណា មិនមែនមានតែលោកប្រធានាធិបតីរុស្ស៊ីម្នាក់នេះទេ ដែលមានឈ្មោះក្នុងបញ្ជីឈ្មោះ របស់កាសែតប៉ានណាម៉ា គឺនៅមានប្រមុខរដ្ឋ និងអ្នកនយោបាយជាច្រើនទៀត ក៏មានឈ្មោះ ដែលកាសែតនេះបានចុះផ្សាយជាង ៧០ ប្រទេស៕
