ភ្នំពេញ៖ គម្រោងអភិវឌ្ឍន៍ផ្លូវល្បឿនលឿន ដោយកំណត់យកផ្លូវរថភ្លើងពីចំនុច ស្ថានីយ៍អយៈស្ម័យយានភ្នំពេញ ទៅអាកាសយានអន្តរជាតិភ្នំពេញ ត្រូវបានសម្ដេចនាយករដ្ឋមន្ត្រីប្រកាសលុបចោល។ សម្ដេច ហ៊ុន សែន ថាលោកមិនចង់ឃើញប្រជាពលរដ្ឋរស់នៅបណ្ដោយផ្លូវរថភ្លើង ធ្វើបាតុកម្ម ឬតវ៉ាអំពីផលប៉ះពាល់ដោយសារតែការអភិវឌ្ឍរបស់រដ្ឋាភិបាលនេះទេ។ ប្រជាពលរដ្ឋរស់នៅតាមបណ្ដោយផ្លូវរថភ្លើង បានបង្ហាញការចាប់អារម្មណ៍ខុសៗគ្នា ដោយអ្នកខ្លះសាទរ អ្នកខ្លះមិនសប្បាយចិត្ត អ្នកខ្លះទៀតមិនមានអារម្មណ៍អ្វីទេ។
«ខ្ញុំសូមប្រកាសនៅពេលនេះសូមបងប្អូនរស់នៅតាមផ្លូវរថភ្លើងពីភ្នំពេញទៅពោធិ៍ចិនតុងឈប់ធ្វើបាតុកម្ម ឈប់ទាមទារធ្វើវេទិការសាធារណៈអីទៅ ខ្ញុំមិនអនុញ្ញាតឱ្យធ្វើអាផ្លូវ High Way Express អីហ្នឹងទេនាំពិបាកទៅ»។ ប្រសាសន៍របស់សម្ដេចនាយករដ្ឋមន្ត្រី កាលពីថ្ងៃទី៥មេសានៅក្នុងពិធីសម្ពោធអាគាររដ្ឋបាលសាលារាជធានីភ្នំពេញ ។
បន្ទាប់ពីទទួលដំណឹងនេះ អ្នករាយការណ៍ព័ត៌មានរបស់វិទ្យុស្ត្រី បានចុះទៅស្ទង់មតិពលរដ្ឋមួយចំនួនដែលរស់នៅតាមបណ្ដោយផ្លូវរថភ្លើង។ ក្នុងពេលនេះ ពួកគាត់បានបង្ហាញអារម្មណ៍ខុសៗគ្នា។
ប្រជាពលរដ្ឋម្នាក់ដែលរស់នៅអមផ្លូវរថភ្លើង នៅភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ លោក ប៊ូ វ៉ានធី គាំទ្រយ៉ាងខ្លាំងចំពោះការលុបចោលគម្រោងសាងសងផ្លូវដែកល្បឿនលឿននេះ ។
«ខ្ញុំយល់វាល្អសម្រាប់រដ្ឋាភិបាល ទី១ ការចំណាយរបស់រដ្ឋាភិបាលគឺតិចបំផុត ឧទាហរណ៏បើគាត់នៅបន្តគម្រោងនឹង យើងត្រូវចំណាយលុយសងដល់អ្នកនៅផ្លូវរទេះភ្លើងហ្នឹងច្រើនគ្រួសារ ។ ទី២ ខ្ញុំគិតថាទីប្រជុំជនផ្លូវល្បឿនលឿនយើងក៏ពិបាលកដែរ អ៊ីញ្ចឹងបានគាត់លុបចោលក៏ម្យ៉ាងដែរ ។ ទី៣ ប្រទេសយើងនូវមានកម្រិតអញ្ចឹងលុបចោលកានតែល្អទៀត»។
ដូចគ្នានោះដែរ ស្រី្តម្នាក់ដែលរស់ក្នុងភូមិចុងថ្នល់សូមមិនបញ្ចេញឈ្មោះបានឱ្យដឹងថា អ្នកស្រីពិតជាមានការជឿជាក់លើសម្តេចហ៊ុន សែន យ៉ាងមុតមាំចំពោះចំណាត់ការនេះ។ អ្នកស្រីវ័យ ៦០ ឆ្នាំរូបនេះបាននិយាយលាយឡំជាមួយកាយវិការសើចសប្បាយផងនិងលើកដៃសំពះដល់សម្តេច ហ៊ុន សែន ពីចម្ងាយផង។
«បើឈប់ហើយ ខ្ញុំទូលសម្តេច ហ៊ុន សែន ឆ្នោតខ្ញុំបោះឱ្យលោកហ៊ុន សែន ឱ្យលោកមើលកូនចៅរហូតព្រោះលោកដឹងទុកធុរៈកូនចៅ បើសម្តេច ហ៊ុន សែន ផ្តលឱ្យគេលក់ធ្វើបាប់ពួកខ្ញុំហ្នឹង ! ខ្ញុំលែងពេញចិត្តដែរនឹង ឆ្នោតលែងបោះឱ្យដែរមួរម៉ៅណាស់…»។
អ្នកស្រី លាស់ ស្រីមាន ដែលកំពុងលក់នំបញ្ចុកលើផ្លូវរថភ្លើង បាននិយាយទាំងត្រេកអរយ៉ាងខ្លាំងបន្ទាប់ពីបានដឹងដំណឹងលុបចោលការធ្វើផ្លូវល្បឿនលឿននេះ។ អ្នកស្រីបានបន់ស្រន់កុំឱ្យរឿងនេះកើតឡើង គឺដូចអ្នកស្រីប្រាថ្នាមែន។ «មានជំនឿចិត្តខ្លាំង មិនដឹកស្មាកថាគាត់បញ្ជប់អញ្ចឹងសោះ បញ្ឈប់ភ្លាមៗ អ៊ីញ្ចឹងព្រោះនេះវាបន្ទន់ដែរ ដល់គាត់បញ្ឈប់អ៊ីញ្ចឹងមិនអរ ក្មូយឯងគិតមើលអ្នកខ្លះអត់ដឹងទេ អ៊ុំបានស្តាប់ដឹងព្រោះអ៊ុំតាមដានព័ត៌មានដែរ…»។
តែបែបនេះក្ដីក៍មានពលរដ្ឋមួយចំនួនសម្ដែងការមិនជឿជាក់លើរដ្ឋាភិបាលក្នុងការលុបចោលគម្រោងនេះទេ ដោយហេតុថាគ្មានអ្វីសំអាងជាភស្តុតាំង ។
លោក សំរឹត ព្រឺង ដែលរស់នៅភូមិ ១៦ សង្កាតទឹកល្អក់ ខណ្ឌទួលគោក បានមានប្រសាសន៍ថា បើរដ្ឋាភិបាលមានការចុះហេត្ថលេខា ជាលាយលាក់អក្សរ ទើបលោកមានការជឿទុកចិត្ត។
«បើប្រាកដជាមិនធ្វើមិនដេញប្រជាជនចេញពីនេះដែរ បានប្រជាជនមានជំនឿ ១០០ ភាគរយ ចំណុចគាត់ដែលប្រជាពលរដ្ឋសម្អាងណាស់ ឱ្យគាត់ហ្នឹងជានាយករដ្ឋមន្ត្រីគាត់ចុះហេត្ថលេខា ហើយមានក្រដាសចុះមកផ្សាយឱ្យប្រជាជនដឹងថាគាត់ពិតជាបញ្ជាក់មិនឱ្យធ្វើស្ពានអាកាសនឹងពិតមែន»។
មិនខុសគ្នាប៉ុន្មានអ្នកស្រី ផាន់ ចរិយា ដែលរស់នៅភូមិជាមួយលោកសំរឹត ព្រឺងមានប្រសាសន៍ថាអ្នកស្រីមិនទាន់មានជំនឿប៉ុន្មាននោះទេ ។ អ្នកស្រីថា កន្លងមកសន្យាដូចនេះដែរ តែគេនៅអនុវត្តដដែល។
«ខ្ញុំនិយាយតាមត្រង់ចិត្តខ្ញុំជឿតតែ ៧០ ភាគរយទេ ព្រោះអីធម្មតាគាត់មេ គាត់ចង់ប្រែម៉េច ស្រេចតែគាត់ អ៊ីញ្ចឹង ខ្ញុំទើបជឿបានប៉ុណ្ណឹងទេឱ្យខ្ញុំជឿដល់១០០ អត់ជឿ… គាត់ថាធ្វើផ្លូវជាតិមិនដឹងថាគាត់ថយប៉ុន្មានម៉ែត្របើគាត់ថា ថយ ១០ម៉ែត្រ… ២០ម៉ែត្រចំណុចនឹងខ្ញុំតវ៉ាតទៀតហើយ ខ្ញុំអត់សប្បាយចិត្តទេ»។
ស្ត្រីម្នាក់អាយុ ៣៥ ឆ្នាំ ដែលរស់នៅភូមិទី ១៥ ខណ្ឌទួលគោគ បាននិយាយថា អ្នកស្រីជឿតែតិចតួចណាស់។ «រឿងគាត់ធ្វើស្តេចនិយាយម៉ាត់ណាគាត់ថាម៉ាត់ហ្នឹង យើងចេះតែជឿហើយ … សម្តីស្តេចអញ្ចឹងហើយ តែចំពោះគាត់ធ្វើម៉េចទៀតអត់ដឹ…»។
អ្នករាយការណ័ព័ត៌មានបានចុះសាកសួរច្រើនទៀត។ ពលរដ្ឋមួយចំនួនដែលមានលំនៅឋានធំៗ ពួកគេមិនបានសប្បាយចិត្តនឹងការសម្រេចដូចនេះទេ។ ពួកគាត់ថា ការអភិវឌ្ឍក៍នាំឱ្យកាត់បន្ថយការស្ទះចរចរណ៍ដែរ។
អ្នកស្រី សូរ វាសនា រស់នៅចុងថ្នល់ខាងលិច សង្កាត់ទឹកថ្លា បាននិយាយថាអ្នកស្រី ចង់ឱ្យមានការកសាងផ្លូវរថភ្លើងល្បឿនលឿន ព្រោះថាដើម្បីបានផ្លូវស្អាតនៅខាងមុខផ្ទះ។
«បើតាមចិត្តខ្ញុំ ចង់ឱ្យធ្វើដែរ … នៅមុខផ្ទះយើង តែចំពោះអ្នកដទៃខ្ញុំអត់ដឹងដែរ តែចំពោះខ្ញុំរដ្ឋគេគិតគូរឱ្យយើងហើយ…»។
ចំណែកអ្នកស្រី កៅ សុភី ហាក់មិនចាប់អារម្មណ័អ្វីទេ។ «បើយើងចឹងយូរហើយធ្លាប់រស់នៅចឹង បើរដ្ឋធ្វើក៏ធ្វើទៅអត់មានអារម្មណ៏អីផង គ្រាន់ថាបើធ្វើផ្លូវបានល្អសប្បាយចិត្ត និយាយថា បើរដ្ឋធ្វើផ្លូវអីមិនប៉ះពាល់ដល់ផ្ទះយើងសប្បាយចិត្ត… »។
តាមរបាយការណ៍ពលរដ្ឋដែលនឹងជួបការប៉ះពាល់គឺមាន ៤ពាន់គ្រួសារ ប្រសិនបើមានការស្ថាបនា ផ្លូវល្បឿនលឿនតាមការគ្រោងទុក។
នាយកលេខាធិការដ្ឋានការងារសិទ្ឋិលំនៅដ្ឋានលោក សៀ ភារម្យ បានមានប្រសាសន៍ថាលោកមានការពេញចិត្តយ៉ាងខ្លាំង ចំពោះចំណាត់ការរបស់រដ្ឋាភិបាល ដែលលុបចោលគម្រោងសាងសងផ្លូវរថភ្លើងល្បឿនលឿននេះ។
«យើងសូមអបអរសារចំពោះការប្ដេជ្ញាចិត្តរបស់ប្រមុខរដ្ឋាភិបាល ដែលលុបចោលគម្រោងផ្លូវរថភ្លើងល្បឿនលឿននេះ ពីព្រោះយើងគិតថានេះ ជាការពិចាណារមួយ ដែលត្រឹមត្រូវបើយើងធ្វើការអភិវឌ្ឍន៏មួយ ប៉ុន្តែប្រជាពលរដ្ឋមួយក្រុមរងការប៉ះពាល់ទឹកភ្នែកទឺកសម្បោរ ការអភិវឌ្ឍន៏នោះ ក៏មិនមែនជាការអភិវឌ្ឍន៏ចិរភាព»។
បែបនេះក្ដីអ្នកសង្កេតការណ៍មួយចំនួនយល់ឃើញថា ការដែលប្រមុខរដ្ឋាភិបាលសម្រេច លុបចោល គម្រោងស្ថាបនា ផ្លូវល្បឿនលឿនតាមបណ្ដោយផ្លូវរថភ្លើងអាចមកពីបញ្ហានយោបាយច្រើនជាង ដែលពួកគាត់គណបក្សកាន់អំណាចត្រូវសន្លឹកឆ្នោតពីសហគមន៍រស់នៅតាមផ្លូវរថភ្លើង៕
