ភ្នំពេញ៖ សកម្មជនការពារព្រៃឈើនៅតំបន់អារ៉ែង លោក អាឡិកហ្សង់ដ្រូ ហ្គន់ហ្សាឡេស ដេវិតសឹន (Alejandro Gonzalez Davidson) បានសរសេរ នៅលើទំព័រហ្វេសប៊ុកផ្លូវការរបស់លោកថា ចៅក្រមសាលាឧទ្ធរណ៍បានកោះហៅលោក ឱ្យចូលខ្លួនជុំនុំជម្រះលើបទចោទ «សមគំនិតគំរាមកំហែង និងធ្វើឲ្យខូចខាតបញ្ហាអ្វីមួយ » ។
នៅលើហ្វេសប៊ុករបស់លោក អេឡិកហ្សង់ដ្រូ បានរៀបរាប់ថា ដីកាកោះហៅឱ្យចូលខ្លួនជុំនុំជម្រះនេះ លោកពិតជាចង់ចូលរួមតាមការកោះហៅនេះណាស់ ប៉ុន្ដែលោកមិនមានទិដ្ឋការដើម្បីចូលបង្ហាញខ្លួន។
«ខ្ញុំត្រូវបានបង្គាប់ឱ្យបង្ហាញខ្លួននៅមុខចៅក្រមក្នុងទីក្រុងភ្នំពេញនៅថ្ងៃទី ០៥ ខែមេសា ឆ្នាំ២០១៦ នៅវេលាម៉ោង ៨ ព្រឹក។ ចៅក្រមសាលាឧទ្ធរណ៍ជាទីគោរព ខ្ញុំពិតជាចង់មានវត្តមាននៅក្នុងសវនាការនោះណាស់ ប៉ុន្តែតើអ្នកអាចសួរទៅក្រសួងមហាផ្ទៃបានទេថា ហេតុអីបានជាគេតែងតែបដិសេធទិដ្ឋការខ្ញុំដើម្បីចូលទៅក្នុងព្រះរាជាណាចក្រកម្ពុជារហូតបែបនេះ ? »
ត្រង់ចំណុចនេះស្ថាបនិកមាតាធម្មជាតិ លោក អេឡិកហ្សង់ដ្រូ ក៏បានចោទសួរទៅកាន់ក្រសួងមហាផ្ទៃដែរ ថាតើមូលហេតុអ្វីបានជាក្រសួងមហាផ្ទៃ បដិសេធទិដ្ឋាការសុំខ្លួនចូលទឹកដីកម្ពុជាវិញ។
ជុំវិញរឿងនេះ លោក ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់វិទ្យុស្ដ្រីនៅថ្ងៃទី ០៦ ខែមេសានេះថា លោក អាឡិកហ្សង់ដ្រូ គ្មានឱកាសចូលប្រទេសកម្ពុជាបានទេ ព្រោះឈ្មោះត្រូវបានដាក់ចូលក្នុងបញ្ជីខ្មៅរួចហើយ។
លោក ខៀវ សុភ័គ ៖ «ផ្លូវច្បាប់ជនបរទេសណាក៏ដោយ ដែលត្រូវច្បាប់អន្ដោប្រវេសន៍ដេញចេញហើយ គឺស្ថិតនៅក្នុងបញ្ជីខ្មៅ អ្នកហ្នឹងមិនមែនជាមនុស្សដែលកម្ពុជាត្រូវស្វាគមន៍ទៀតទេ លោក អេឡិច គ្មានពេលត្រឡប់មកកម្ពុជានោះទេ តាមច្បាប់»។
សូមជម្រាបថា លោក អេឡិកហ្សង់ដ្រូ ហ្គន់ហ្សាឡេស ដេវិតសឹន ជាជនជាតិអេស្ប៉ាញ បានមករស់នៅលើទឹកដីកម្ពុជានេះជាង ១០ ឆ្នាំមកហើយ។ លោកអាចប្រើប្រាស់ភាសាខ្មែរបានយ៉ាងល្អ ព្រមទាំងបានបង្កើតសមាគមការពារព្រៃឈើមួយឈ្មោះថា «មាតាធម្មជាតិ» ដែលមានសមាជិកភាគច្រើនជាជនជាតិដើមភាគតិចនៅតំបន់អារ៉ែង ខេត្តកោះកុង។ លោក អាឡិក ត្រូវបាន នាយកដ្ឋានអន្តោប្រវេសន៍ក្រសួងមហាផ្ទៃ បដិសេធផ្តល់ទិដ្ឋការឲ្យរស់នៅកម្ពុជា និងបានបណ្ដេញចេញពីកម្ពុជានៅខែកុម្ភៈ ឆ្នាំ ២០១៥ ក្រោមហេតុផល អាឡិក ជាជនបរទេសមួយរូបរារាំងដល់ការស្ថាបនាវារីអគ្គិសនីនៅតំបន់អារ៉ែង៕
