“គេមិនគិតពីយើងផង ថ្នាក់ដឹកនាំមិនខ្វល់ពីបាល់ទាត់ នៅទៀតក៏គ្មានន័យដែរ ហត់ចិត្ត ពិបាកជាងហត់កាយ មានតែដើរចេញទៅ”។ សម្ដីយ៉ាងមានន័យរបស់លោក ប៉ែន ផាត ដែលសម្រេចលាឈប់ពីគ្រូបង្វឹករបស់ក្រុមវេស្ទើនភ្នំពេញតាំងពីថ្ងៃសៅរ៍សប្ដាហ៍មុន។
លោក ប៉ែន ផាត បានប្រកាសលាឈប់ពីតួនាទីគ្រូបង្វឹកក្រុមវេស្ទើន តាំងពីថ្ងៃសៅរ៍សប្ដាហ៍មុនមកម្ល៉េះ ហើយវត្តមានរបស់លោកក្នុងថ្ងៃប្រកួតជាមួយក្រុមភ្នំពេញក្រោននោះគឺជាការប្រកួតចុងក្រោយរបស់លោកហើយ ក្នុងនាមជាគ្រូបង្វឹក។ ចំពោះមូលហេតុដែលធ្វើឱ្យអតីតកីឡាករជម្រើសជាតិកម្ពុជាជំនាន់កីឡាករ Pele សម្រេចដើរចេញយ៉ាងនេះ គឺមកពីមានរឿងរ៉ាវច្រើនដែលសុទ្ធតែខុសពីអ្វីដែលលោករំពឹងទុក។
លោក ប៉ែន ផាត និយាយប្រាប់តាមទូរសព្ទមកដល់ក្រុមការងារ Sabay ថា៖ “ប្អូនដឹងអត់ ខ្ញុំមកទីនេះដើម្បីជួយកីឡាខ្មែរ ឱ្យដើរទៅមុខដើម្បីមុខមាត់ជាតិ និងបណ្ដុះក្មេងៗយើងឱ្យល្អ កុំពឹងតែពួកស្បែកខ្មៅពេក។ តែធ្វើមិចគេមិនយល់ពីខ្ញុំ អីចឹងខ្ញុំមានតែដើរចេញ ព្រោះនិយាយទៅក៏គេមិនយល់ដដែល ព្រោះគេដូចមិនសូវចូលចិត្តបាល់ទាត់ផង។ អីចឹងមានតែដើរចេញហើយ កុំឱ្យហត់ចិត្តពេក ព្រោះមនុស្សអាចហត់កាយ តែមិនអាចហត់ចិត្តបានទេ។ យើងត្រូវគិតពីចំណាយផង កុំគិតតែចំណូលពេក”។
ផលវិបាកមួយទៀតដែលលោក ប៉ែន ផាត លើកឡើងដែរនោះគឺខាងថ្នាក់ដឹកនាំរបស់ក្លឹប មិនបានយកចិត្តទុកដាក់ចំពោះថ្នាលយុវជនរបស់ក្រុមនោះទេ ដោយបច្ចុប្បន្នមានគ្រូតែ៤នាក់គត់ ដែលត្រូវធ្វើការងារជាអ្នកបង្ហាត់ឈុតធំ និងយុវជនផង អ្នកទាក់ទងរកដៃគូសហការផង អ្នកទាក់ទងទៅខាងសហព័ន្ធផង។ នេះគឺជារឿងពិបាកខ្លាំងណាស់សម្រាប់រូបលោក ដើម្បីជួយឱ្យក្រុមមានកម្លាំងចិត្ត ក៏ដូចជាបានហ្វឹកហាត់ជាមួយគ្រូដែលមានបច្ចេកទេសពេញលេញ។ “នៅបារាំងក៏គេត្រូវការគ្រូច្រើនដែរ ដើម្បីមើលថែក្រុមយុវជន មិនមែនយកតែប៉ុន្មានមកគ្រាន់ទេ។ ខ្ញុំចង់បានអ្វីដែលជាស្ដង់ដារមួយសម្រាប់កូនខ្មែរ ឱ្យខ្លាំងដូចគេដែរ”។ សម្ដី ប៉ែន ផាត ។
ទន្ទឹមនឹងការលាឈប់នេះដែរ ឯកឧត្ដម តែ ឡូរិន ក៏បានទូរសព្ទទៅលោក ប៉ែន ផាត ផ្ទាល់ដើម្បីពិភាក្សាគ្នាបន្តទៀតដែរ ប៉ុន្តែសាមីខ្លួនបានបញ្ជាក់យ៉ាងច្បាស់ហើយថាលោកឈប់ហើយ មិនបាច់និយាយអ្វីទៀតនោះទេ ព្រោះលោកត្រូវឡើងយន្តហោះទៅបារាំងវិញនៅថ្ងៃទី១៧ខាងមុខនេះហើយ បន្ទាប់ពីនៅដើរលេងចូលឆ្នាំខ្មែរជាមួយបងប្អូននៅកម្ពុជារួច៕
អត្ថបទ៖ មុន្នី រម្យ
ប្រភព៖ www.news,sabay.com.kh
