ភ្នំពេញ៖ នៅថ្ងៃចន្ទ ទី០៤ ខែមេសានេះ រដ្ឋសភាបានយល់ព្រមអនុម័តសំណើរបស់នាយករដ្ឋមន្ដ្រី ហ៊ុន សែន ក្នុងការកែសម្រួលសមាសភាពមន្ដ្រីរាជរដ្ឋាភិបាល ២៦ រូប ក្នុងសំឡេងគាំទ្រ ៧០ សំឡេង មិនគាំទ្រ ២៤ សំឡេង និងអនុប្បវាទ ០៣ សំឡេងក្នុងចំណោមតំណាងរាស្ត្រទាំងអស់ ១០៧ រូប ។
បន្ទាប់ពីប្រមុខរដ្ឋាភិបាល អះអាងថា លោកមិនចង់ជំពាក់គុណគណបក្សសង្គ្រោះជាតិ ចំពោះការចូលរួមអនុម័តគាំទ្រការអនុម័តរុះរើគណៈរដ្ឋមន្ដ្រី រដ្ឋសភាសម្រេចអនុម័តយល់ព្រមលើសំណើរបស់នាយករដ្ឋមន្ដ្រីកែសម្រួលសមាសភាពមន្ដ្រីរាជរដ្ឋាភិបាល ២៦ រូប ក្នុងនោះដោះដូររដ្ឋមន្ដ្រីនៅតាមក្រសួងមួយចំនួនផងដែរ។ ការរុះរើគណៈរដ្ឋមន្ត្រីនៅថ្ងៃនេះ មានសមាសភាព ២៦ រូប រួមមាន ៖
- លោកឧបនាយករដ្ឋមន្ត្រី ហោ ណាំ ហុង ត្រូវបានផ្លាស់ចេញពីរដ្ឋមន្ត្រីក្រសួងក្រសួងការបរទេស ដាក់ជំនួសដោយ លោក ប្រាក់ សុខុន មកពីក្រសួងប្រៃសេនីយ៍និងទូរគមនាគមន៍។
- លោកទេសរដ្ឋមន្ត្រី អ៊ឺម ឈុនលឹម ត្រូវបានផ្លាស់ចេញពីក្រសួងរៀបចំដែនដីនគរូបនីយកម្ម និង សំណង់ ដាក់ជំនួសដោយលោក ជា សុផារ៉ា មកពីក្រសួងអភិវឌ្ឍន៍ជនបទ ។
- លោកទេសរដ្ឋមន្ត្រី ស៊ុន ចាន់ថុល ត្រូវបានប្តូរពីក្រសួងពាណិជ្ជកម្ម ទៅកាន់ក្រសួងសាធារណការនិងដឹកជញ្ជូន ។
- លោក អ៊ុក រ៉ាប៊ុន ត្រូវបានប្តូរពីក្រសួងកសិកម្ម រុក្ខាប្រមាញ់ និងនេសាទ ទៅកាន់ក្រសួងអភិវឌ្ឍន៍ជនបទ។
- លោក ត្រាំ អ៊ីវតឹក ត្រូវបានប្តូរពីក្រសួងសាធារណការ និង ដឹកជញ្ជូន ទៅកាន់ក្រសួងប្រៃសនីយ៍ និង ទូរគមនាគមន៍។
- លោក មិន ឃិន រដ្ឋមន្ត្រីក្រសួងធម្មការ ត្រូវបានផ្លាស់ចេញ ដាក់ជំនួសដោយ លោក ហឹម ឆៃម ។
- លោក ប៉ាន សូរស័ក្តិ ត្រូវបានដំឡើងជារដ្ឋលេខាធិការក្រសួងពាណិជ្ជកម្ម ទៅជារដ្ឋមន្ត្រីក្រសួងពាណិជ្ជកម្ម ខណៈរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានទៅលើលោក វេង សាខុន។
- លោក គាត ឈុន, លោក អ៊ឺម ឈុនលឹម, លោក មិន ឃិន ត្រូវបានបញ្ចប់មុខងារ។
សូមបញ្ជាក់ថា លោក សំ ព្រហ្មនា ត្រូវបានជ្រើសតាំងជំនួសលោក ឯក សំអុល ដែលបានបញ្ចប់អាណត្តិកាលពីថ្ងៃទី ១៤ ខែមីនា ឆ្នាំ ២០១៦ ។ សមាជិកក្រុមប្រឹក្សាធម្មនុញ្ញមានសមាសភាព ០៩ រូប ដែលតែងតាំងដោយព្រះមហាក្សត្រ ០៣ រូប ជ្រើសរើសដោយឧត្តមក្រុមប្រឹក្សានៃអង្គចៅក្រម ០៣ រូប និង ០៣ រូបទៀតជ្រើសរើសដោយរដ្ឋសភា៕
