ភ្នំពេញ៖ ប្រមុខរដ្ឋាភិបាល អះអាងថា លោកមិនចង់ជំពាក់គុណគណបក្សសង្គ្រោះជាតិ ចំពោះការ ចូលរួមអនុម័តគាំទ្រការអនុម័តរុះរើគណៈរដ្ឋមន្ដ្រីនៅព្រឹកនេះ បើទោះបីគណបក្សប្រឆាំងថ្លែងថា មិនគាំទ្រការរុះរើគណៈរដ្ឋមន្ដ្រីយ៉ាងណាក៏ដោយ។ សម្ដេចនាយករដ្ឋមន្ដ្រី ហ៊ុន សែន មានប្រសាសន៍ដូចនេះ ក្នុងកិច្ចប្រជុំសភាពេញអង្គនាព្រឹកថ្ងៃច័ន្ទ ទី០៤ មេសានេះ នៅមន្ទីររដ្ឋសភា។
សម្ដេចនាយករដ្ឋមន្ដ្រីមានប្រសាសន៍បន្ថែមថា មិនមានក្ដីព្រួយបារម្ភនោះទេ បើទោះជាគណបក្សប្រឆាំងមិនគាំទ្រការបោះឆ្នោតអនុម័តសមាសភាពរដ្ឋមន្ដ្រីថ្មីក៏ដោយ។
សម្ដេចមានប្រសាសន៍បន្ដថា គណបក្សប្រជាជនកម្ពុជាមានសំឡេងគ្រប់គ្រាន់ហើយ បើគណបក្សសង្គ្រោះជាតិមិនគាំទ្រ គឺជាសិទ្ធិរបស់គណបក្សនេះ ដែលសម្ដេចថា សម្ដេចក៏មិនចង់ឱ្យគណបក្សសង្គ្រោះជាតិមានគុណលើគណបក្សប្រជាជននោះដែរ។
សូមជម្រាបថា សភាបានបើកសម័យប្រជុំពេញអង្គរបស់ខ្លួននៅព្រឹកនេះ ដោយមានរបៀបវារៈចំនួនប្រាំ។ របៀបវារៈដែលសំខាន់ជាងគេ គឺរបៀបវារៈរុះរើគណរដ្ឋមន្ដ្រី និងអនុម័តសេចក្ដីព្រាងច្បាប់ស្ដីពីសហជីព។ បើតាមសេចក្ដីរាយការណ៍របស់អ្នកសារព័ត៌មានវិទ្យុស្ត្រី FM ១០២ បានឱ្យដឹងថា កម្មករជាង ១០០នាក់ ព្រមទាំងតំណាងសហជីពជាច្រើននៅរាជធានីភ្នំពេញ បានឡើងមកតវ៉ានៅរដ្ឋសភា ដោយទាមទារឱ្យកែប្រែ ឬ រុះរើមាត្រាមួយចំនួនក្នុងសេចក្ដីព្រាងច្បាប់ស្ដីពីសហជីព ដែលពួកគេយល់ឃើញថារឹតត្បិតលើសិទ្ធិសេរីភាពរបស់កម្មករ និង និយោជិតរបស់សហជីព៕
