ភ្នំពេញ៖ គណប្រតិភូសភាអ៊ឺរ៉ុប ដែលបានមកពិនិត្យមើលស្ថានភាពនយោបាយនៅកម្ពុជា បានអះអាងថា និងជំរុញឱ្យរដ្ឋាភិបាលជួយសម្រួលកម្មករខ្មែរធ្វើការនៅក្រៅប្រទេស បានចុះឈ្មោះបោះឆ្នោតឆ្នាំ ២០១៧-២០១៨ ។ ការថ្លែងរបស់លោកស្រី Barbara Lochbihler សមាជិកគណៈប្រតិភូសភាអ៊ឺរ៉ុប បានលើកឡើងដូចនេះ នៅក្នុងសន្និសីទសារព័ត៌មានស្ដីពីការវាយតម្លៃពីស្ថានភាពសិទ្ធិ មនុស្សនៅកម្ពុជា នៅទីស្នាក់ការសហភាពអ៊ឺរ៉ុបនៅកម្ពុជា កាលពីរសៀល ថ្ងៃទី ០១ មេសា ឆ្នាំ ២០១៦ នេះ។
លោកស្រី Barbara Lochbihler បានបញ្ជាក់ថា ពលករចំណាកស្រុកទាំងនៅក្នុងប្រទេស និងក្រៅប្រទេស គួរតែសម្រួលឱ្យមានឱកាសចុះឈ្មោះបោះឆ្នោត ដើម្បីបង្ហាញពីតួនាទីជាពលរដ្ឋ ជ្រើសរើសតំណាងរបស់ខ្លួន។
កាលពីព្រឹកម៉ិញនេះ ប្រតិភូសភាអ៊ឺរ៉ុប បានទទូចទៅកាន់គណៈកម្មាធិការជាតិរៀបចំការបោះឆ្នោតជាតិ (គ.ជ.ប) គួរដឹកនាំពលករទាំងនោះ ឱ្យមកចុះឈ្មោះបោះឆ្នោតនៅតាមភូមិស្រុក ឬ បោះឆ្នោតនៅតាមទីកន្លែងដែលគេធ្វើការ។
បើតាមរបាយការណ៍នានា ពលករកម្ពុជាទៅធ្វើការនៅប្រទេសថៃ មានប្រហែលពី ៥០ម៉ឺន ទៅ ៦០ម៉ឺននាក់ នៅប្រទេសម៉ាឡេស៊ីចំនួនជាង ៥ម៉ឺននាក់ និងនៅកូរ៉េខាងត្បូងចំនួនជាង ៣ម៉ឺនប្រាំពាន់នាក់៕
