ភ្នំពេញ៖ គណកម្មការសហភាពអ៊ឺរ៉ុបមួយក្រុមដែលមកធ្វើទស្សនកិច្ចនៅកម្ពុជា ចង់ឃើញពលករចំណាកស្រុកខ្មែរដែលធ្វើការនៅក្រៅប្រទេស ជាពិសេសធ្វើការងារនៅប្រទេសថៃ មានឱកាសបានមកចុះបោះឆ្នោតសម្រាប់ការបោះឆ្នោត ២០១៧ -២០១៨ ។ ការលើកឡើងរបស់សហភាពអ៊ឺរ៉ុប ធ្វើឡើងនៅក្នុងជំនួបមួយ និងគណកម្មាធិការជាតិរៀបចំការបោះឆ្នោត គ.ជ.ប ដែលបានធ្វើឡើងនៅព្រឹកថ្ងៃសុក្រ ទី ០១ មេសានេះ។
បើតាមអ្នកនាំពាក្យ គ.ជ.ប លោក ហង្ស ពុទ្ធា បានប្រាប់អ្នកសារព័ត៌មានក្រោយពីជំនួបថា សហភាពអ៊ឺរ៉ុប បានលើកឡើងបែបនេះ នៅចំពោះមុខ លោក ស៊ិក ប៊ុនហុក ប្រធាន គ.ជ.ប។
អ្នកនាំពាក្យរូបនេះបានឱ្យដឹងទៀតថា ស្ថាប័នបោះឆ្នោត គ.ជ.ប មិនមានលទ្ធភាពនោះទេ ប៉ុន្ដែប្រសិនបើអង្គការណា ឬ ក៏គណបក្សណាមួយ អាចមានមធ្យោបាយដឹកពលករចំណាក ស្រុកមកបោះឆ្នោត គឺ គ.ជ.ប និងពិនិត្យលទ្ធភាពនោះ ជាទម្រង់នៃការទិញសន្លឹកឆ្នោត គឺដូចម្ដេច?
តាមរបាយការណ៍មួយចំនួន ពលករខ្មែរដែលធ្វើការនៅប្រទេសថៃ មានចំនួនពីរវាង ៥០ម៉ឺន ទៅ ៦០ម៉ឺននាក់ ហើយនៅប្រទេសម៉ាឡេស៊ីមានជាង ៥ម៉ឺននាក់ និងនៅកូរ៉េខាងត្បូង មានជាង ៣ម៉ឺនប្រាំពាន់នាក់។
ចំពោះសិទ្ធិរបស់ពលករចំណាកស្រុក ចូលរួមការបោះឆ្នោតនេះ គណបក្សសង្គ្រោះជាតិក៏បាន ទាមទារឱ្យមានការិយាល័យចុះឈ្មោះបោះឆ្នោតនៅក្នុងប្រទេសថៃ ឬក៏យ៉ាងហោចណាស់ គួរឱ្យមាននៅតាមព្រំដែនកម្ពុជា ថៃ ដើម្បីងាយស្រួលឱ្យពលករទាំងនោះចុះឈ្មោះបោះឆ្នោត៕
