ម៉ាឡេស៊ី៖ ប្រទេសម៉ាឡេស៊ីបាននិយាយថា ខ្លួនបានកោះហៅឯកអគ្គរដ្ឋទូតចិនមកស្ដាប់ការតវ៉ាចំពោះអ្វីដែលក្រុងកូឡាឡាំពួរ និយាយថាទូកនេសាទចិនជាច្រើនគ្រឿងបានចូលដែនទឹករបស់ខ្លួន។
សារព័ត៌មានរបស់ប្រទេសម៉ាឡេស៊ីបានស្រង់សំដីរបស់មន្ដ្រីសន្ដិសុខសមុទ្រ បាននិយាយកាលពីថ្ងៃព្រហស្បត្តិ៍ម្សិលម៉ិញថា ទូកនេសាទចិនប្រមាណជា ១០០ គ្រឿងបានបើកចូលដែនទឹករបស់ម៉ាឡេស៊ីនៅរយៈពេលចុងក្រោយនេះ។
រដ្ឋមន្ដ្រីការបរទេសម៉ាឡេស៊ីបានបញ្ជាក់ថា ទូកនេសាទដែលដោតទង់ជាតិចិនចំនួនដ៏ច្រើននេះ បានចូលដែនទឹករបស់ម៉ាឡេស៊ីហើយទូកទាំងនោះការពារដោយនាវារល្បាតចិនទៀតផង។
ក្រសួងការបរទេសម៉ាឡេស៊ីបានចេញសេចក្ដីថ្លែងការណ៍ថាការកោះហៅឯកអគ្គរដ្ឋទូតចិនគឺដើម្បីបញ្ជាក់ថា ម៉ាឡេស៊ីជំទាស់ដាច់ខាត ចំពោះការលុកលុយដែនទឹករបស់ខ្លួន។
កាលពីខែមុនឥណ្ឌូនេស៊ី បានកោះហៅឯកអគ្គរដ្ឋទូតចិនមកស្ដាប់ការតវ៉ាដូចករណីនេះ ម្តងរួចមកហើយ។ ប៉ុន្តែចិនតែងតែបដិសេធ ហើយអះអាងថា វាជាតំបន់ភូមិសាស្ដ្រប្រវត្តិសាស្ដ្ររបស់ចិន។
ចិនមានជំលោះដែនទឹកនៅសមុទ្រចិនខាងត្បូងជាមួយប្រទេសហ្វីលីពីន វៀតណាម ព្រុយណេ និងកោះតៃវ៉ានគឺករណីការដណ្ដើមកាន់កាប់កោះមួយចំនួននៅសមុទ្រចិនខាងត្បូង៕
ប្រភពៈCNA
