ភ្នំពេញ៖ ក្រសួងអប់រំយុវជន និង កីឡា បានសម្រេចសម្រួលពិន្ទុ ដល់បេក្ខជនប្រឡងសញ្ញាបត្រមធ្យមសិក្សាបឋមភូមិ ចំពោះបេក្ខជនគ-ថ្លង់ ត្រូវកំណត់ពិន្ទុតិចជាងបេក្ខជនមានកាយសម្បទាគ្រប់គ្រាន់។ បើតាមសេចក្ដីណែនាំរបស់ ក្រសួងអប់រំ កាលពីថ្ងៃទី ២៩ មីនា បានសម្រួលពិន្ទុប្រលងសញ្ញាបត្រមធ្យមសិក្សាបឋមភូមិ ឬ ហៅថា ឌីប្លូម ដល់បេក្ខជនគ-ថ្លង់កំណត់ពិន្ទុជាប់ត្រឹម ២៤០ ពិន្ទុ និង ១៩០ពិន្ទុសម្រាប់បេក្ខជនស្វ័យរិន ដែលបេក្ខជនគ-ថ្លង់។
ទន្ទឹមគ្នានេះប្រធានស្ដីទីសមាគមគ្រូបង្រៀនឯករាជ្យ អ្នកស្រី អ៊ុក ឆាយ៉ាវី គាំទ្រចំពោះក្រសួងអប់រំសម្រួលពិន្ទុជាប់របស់បេក្ខជននេះដែលពុំមានកាយសម្បទាគ្រប់គ្រាន់។ អ្នកស្រីបន្តថា ការបន្ធូរបន្ថយពិន្ទុជាប់នេះ មិនបានធ្វើឱ្យគុណភាពការអប់រំធ្លាក់ចុះច្រើនទេ។
អ្នកស្រី អ៊ុក ឆាយ៉ាវី ៖ «វាមិនមានអីប៉ះពាល់ដល់វិស័យអប់រំទេ ប៉ុន្តែគ្រាន់តែធ្វើឱ្យសិស្សានុសិស្សទាំងអស់ ពេលខ្លះគិតថាគាត់ប្រឹងប្រែងហើយ គាត់បានពិន្ទុស្មើនឹងអ្នកអត់ខំប្រឹងរៀន ប៉ុន្តែបានពិន្ទុទាបជាងអ៊ីញ្ចឹងទៅណា នេះជាការខ្នក់ចិត្តរបស់ពួកសិស្សានុសិស្សមួយចំនួនដែរតាមពិតទៅ»។
ចំណែកនាយកប្រតិបត្តិអង្គការជនពិការកម្ពុជា លោក ងិន សៅរ័ត្ន មានប្រសាសន៍ថា ការកែសម្រួលពិន្ទុ សម្រាប់បេក្ខជនពិការ គឺល្អម្យ៉ាដែរ ប៉ុន្តែលោកថា ក្រសួងអប់រំគួរមានជម្រើសផ្សេងទៀតក្រៅពីជម្រើសនេះ ។
លោក ងិន សៅរ័ត្ន ៖ « យើងចង់ឃើញជនពិការយើងមានសមត្ថភាព ចង់ឃើញប្រព័ន្ធអប់រំហ្នឹងគិតគួរអំពីគុណភាពនៃការអប់រំជាជាងការអាណិតអាសូររបស់ពួកគាត អ៊ីញ្ចឹងផ្នត់គំនិតខ្មែរយើងតែងតែគិតថា ជនពិការត្រូវតែមានការអនុគ្រោះជានិច្ច មានការអាណិតអាសូរមែនទេ… បើយើងគិតរឿងសិទ្ឋិជាមូលដ្ឋានវិញ យើងគិតថាជនពិការនិងអ្នកមិនពិការមានសិទ្ឋិស្មើភាពគ្នាក្នុងការប្រកួតប្រជែង ប្រសិនបើប្រព័ន្ធអប់រំបានគិតគួរស្មើភាពគ្នា….ដោយមិនមានភាពខ្វះខាតមានការសម្របសម្រួលពីផ្នែកសង្គមឱ្យបានល្អអ្នកពិការក៏មានសមត្ថភាពផងដែរ»។
សូមជម្រាបថា បើតាមសេចក្ដីណែនាំរបស់ក្រសួងអប់រំ ការប្រឡងសញ្ញាបត្រមធ្យមសិក្សាបឋមភូមិនឹងប្រព្រឹត្តទៅ នៅថ្ងៃទី ០៨ ខែឧសភា ឆ្នាំ ២០១៦ នេះ៕
