ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានប្រកាសប្រគល់ឈើខុសច្បាប់ ដែលអាជ្ញាធរបើកយុទ្ធនាការចុះបង្រាប និងរឹបអូសបានប្រមាណ៤ម៉ឺនម៉ែត្រគូបឱ្យក្រសួងអប់រំយុវជន និង កីឡា ដើម្បីសាងសង់សាលា និងទុកប្រើប្រាស់ធ្វើជាសម្ភារៈសិក្សាសម្រាប់សិស្សនុសិស្ស។
សូមស្តាប់ប្រសាសន៍សម្តេច នាយករដ្ឋមន្ត្រី ហ៊ុន សែន ៖
ការថ្លែងរបស់សម្តេចនាយករដ្ឋមន្ត្រីនេះ ធ្វើឡើងក្នុងពិធីបិទសន្និបាតក្រសួងអប់រំយុវជន និង កីឡា នៅរសៀលថ្ងៃទី ៣១ ខែមីនានេះ នៅឯវិទ្យាស្ថានបច្ចេកវិទ្យាកម្ពុជា។
សូមបញ្ជាក់ថា ការប្រកាសផ្តល់ឈើខុសច្បាប់ឲ្យក្រសួងអប់រំរបស់លោកនាយករដ្ឋមន្ត្រីនេះ តបតាមការស្នើសុំរបស់រដ្ឋមន្ត្រីក្រសួងអប់រំ លោក ហង់ ជួន ណារ៉ុន។ លោក ហង់ ជួន ណារ៉ុន នៅថ្ងៃទី ៣០ មីនា បានស្នើសម្តេចនាយករដ្ឋមន្ត្រី ហ៊ុន សែន សម្រេចជួយជួសជុលអគារសាងសង់ជាង ១០ ឆ្នាំមុនប្រមាណ ៤ពាន់អគារ ឡើងវិញជាបន្ទាន់ តបតាមសំណើរមន្ត្រីខ្លួនជាង ២០០ ទូទាំងរាជធានីខេត្ត ដើម្បីឆ្លើយតបនឹងតម្រូវការអប់រំ។ ជាងនេះទៀត លោកស្នើសម្តេច សម្រេចឲ្យពង្រាយគ្រូបង្រៀន នៅតាមតំបន់ខ្វះខាតគ្រូ និងត្រួតពិនិត្យការតែងតាំងនាយកសាលានៅថ្នាក់មូលដ្ឋានឡើងវិញ ដើម្បីឆ្លើយតបនឹងកំណើនសិស្សានុសិស្ស និងពង្រឹងគុណភាពអប់រំ នៅមូលដ្ឋាន៕
