ភ្នំពេញ៖ មន្ត្រីជាន់ខ្ពស់គណបក្សសង្គ្រោះជាតិបាននិយាយថា លោកស្រី រ៉ូណា ស្មីត (Rhona Smith) អ្នករាយការណ៍ពិសេសរបស់អង្គការសហប្រជាជាតិ (អ.ស.ប) ទទួលបន្ទុកសិទ្ធិមនុស្សប្រចាំកម្ពុជាបានជួបលោក កឹម សុខា កាលពីរសៀលថ្ងៃម្សិលមិញ។ ក្នុងជំនួបនោះ លោកស្រីបានសម្តែងក្តីបារម្ភអំពីបញ្ហារំលោភសិទ្ធមនុស្សនៅកម្ពុជាបន្ទាប់ពីលោក កឹម សុខា បានប្រាប់បញ្ហានយោបាយនៅកម្ពុជានាពេលបច្ចុប្បន្ននេះ ។ ចំណែកមន្ត្រីជាន់ខ្ពស់គណបក្សកាន់អំណាចថាបញ្ហារំលោភសិទ្ធិមនុស្សនៅមានការថយចុះគួរឲ្យគាត់សម្គាល់។
អ្នកនាំពាក្យគណបក្សសង្គ្រោះជាតិ មានប្រសាសន៍ថា លោកស្រី រ៉ូណា ស្មីត នឹងលើកឡើងពីបញ្ហា ការឡើងកម្តៅនយោបាយនៅកម្ពុជា និង បញ្ហាសេរីភាពអ្នកនយោបាយប្រឆាំង ទៅជជែកជាមួយមន្ត្រីរដ្ឋាភិបាល ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ទៀតថា នៅក្នុងកិច្ចប្រជុំនោះ ប្រធានស្ដីទីគណបក្សសង្គ្រោះជាតិ លោក កឹម សុខា ថ្លែងប្រាប់ទៅ លោកស្រី រ៉ូណា ស្មីត អំពីការប្រើអំពើហិង្សាមកលើតំណាងគណបក្សសង្គ្រោះជាតិ និងការប្រើប្រព័ន្ធតុលាការចាប់ឃុំខ្លួនមកលើសមាជិកគណបក្សសមរង្ស៊ី លោក ហុង សុខហួរ និងករណីឃុំខ្លួនលោក មាជ សុវណ្ណារ៉ា រួមទាំងសកម្មជនគណបក្សជំនាស់ ១០ នាក់ផ្សេងទៀត។
អ្នកនាំពាក្យរូបនេះ បន្តថា លោកស្រី រ៉ូណា ស្មីត នឹងជួយជំរុញទៅគណបក្សប្រជាជនកម្ពុជាឲ្យយកចិត្តទុកដាក់ក្នុងដំណើរលិទ្ធិប្រជាធិបតេយ្យ និងការគោរពសិទ្ធមនុស្សទៅលើគណបក្សជំនាស់ដ៏មានប្រជាបិយភាព។
លោក យឹម សុវណ្ណ មានប្រសាសន៍ថា ៖ «ជាការពិតគាត់សម្តែងការបារម្ភ ហើយគាត់បន្តតាមដានយកចិត្តទុកដាក់ជំរុញឲ្យភាគីពាក់ព័ន្ធគ្រប់ភាគីខិតខំអនុវត្តគោលការណ៍លិទ្ធិប្រជាធិបតេយ្យ…»។
ទាក់ទិនបញ្ហានេះ អ្នកនាំពាក្យគណបក្សប្រជាជនកម្ពុជាឆ្លើយតបថា បញ្ហាសិទ្ធិមនុស្ស រាជរដ្ឋាភិបាលកម្ពុជាបានដោះស្រាយរួចរាល់ជាច្រើនករណីគួរឲ្យកត់សំគាល់ដែរ ហើយគណបក្សកាន់អំណាចមិនបានកៀបសង្កត់ទៅលើគណបក្សសង្គ្រោះជាតិឡើយ។
«ខ្ញុំយល់ថាគ្មានអ្វីរឹតត្បឹតសេរីភាពពីគណបក្សកាន់អំណាច តាមពិតទៅផលវិបាកនៃការប្រព្រឹត្តិនៃសមីជនម្នាក់ៗ ទោះបីជាអ្នកនយោបាយក៏ដោយឲ្យតែប្រព្រឹត្តិបទល្មើសខុសច្បាប់ត្រូវទទួលខុសត្រូវចំពោះមុខច្បាប់…»។
ចំណែកអ្នកសិក្សាស្រាវជ្រាវពីការអភិវឌ្ឍន៍សង្គម លោកបណ្ឌិត មាស នី យល់ឃើញថា ស្ថានភាពសិទ្ធិមនុស្ស និងលិទ្ធប្រជាធិបតេយ្យនៅកម្ពុជាពុំទាន់មានលក្ខណៈល្អប្រសើរនៅឡើយ ព្រោះសិទ្ធិបញ្ចេញមតិរបស់ប្រជាពលរដ្ឋនៅមានការរឹតត្បិតខ្លាំង ដូចជាករណីអាជ្ញាធររារាំងសង្គមស៊ីវិល និងជនជាតិដើមភាគតិចមិនឲ្យធ្វើសិក្ខាសាលាក្នុងខេត្តរតនគិរី និងខេត្តព្រះវិហារ កាលពីថ្មីៗនេះជាដើម។
លោកបណ្ឌិត មាស នី និយាយថា ៖ «ទោះបីជារដ្ឋាភិបាលខំបដិសេដក៏ដោយ ប៉ុន្តែសកម្មភាពជាក់ស្តែងបានបង្កឲ្យប្រជាពលរដ្ឋមើលឃើញច្បាស់ថា ស្ថានការណ៍សិទ្ធិមនុស្សហាក់មិនទាន់ទូលំលាយដោយរួមទាំងការហាមឃាត់មិនឲ្យមានការប្រជុំ និង ការរៀនសូត្ររបស់សហគមន៍នៅខេត្តរតនគិរី ព្រះវិហារថ្មីនេះ…»។
អ្នកសិក្សាស្រាវជ្រាវពីការអភិវឌ្ឍន៍សង្គមរូបនេះថា បើទោះបីជា លោកស្រី រ៉ូណា ស្មីត ជំរុញទៅគណបក្សប្រជាជនកម្ពុជា ឲ្យយកចិត្តទុកដាក់ក្នុងដំណើរលិទ្ធិប្រជាធិបតេយ្យ និងការគោរពសិទ្ធមនុស្សក៏ដោយ លោកហាក់ពុំមានជំនឿថារដ្ឋាភិបាលកម្ពុជាអាចធ្វើបាននោះទេ។
កាលពីថ្ងៃទី ២៩ ខែមីនា ឆ្នាំ ២០១៦ នេះ អង្គការមួយធ្វើការងារខាងបោះឆ្នោតនៅកម្ពុជា គឺអង្គការ ខមហ្វ្រែលបានបង្ហាញរបាយការណ៍វាយតម្លៃរបស់ខ្លួនថា ស្ថានភាពប្រជាធិបតេយ្យនៅកម្ពុជា ធ្លាក់ចុះគួរឱ្យព្រួយបារម្ភនៅរយៈពេល ចុងក្រោយនេះ គឺដូចជាករណី លោកសមរង្ស៊ី ករណីលោក ហុងសុហួរ ករណី សកម្មជ បក្សសង្គ្រោះជាតិកំពុងឃុំខ្លួននៅពន្ធាគារព្រៃស និងករណីលោក កឹម សុខា ថែមទៀតនេះ៕
