ភ្នំពេញ៖ អង្គការជាតិនិងដៃគូអន្តរជាតិ បានដាក់ឲ្យដំណើរការជាផ្លូវការនូវយុទ្ធនាការរួមបញ្ចូលគ្នា ដើម្បីបង្ការភាពក្រិះក្រិនកុមារ ក្នុងបណ្ដាខេត្តមួយចំនួនក្នុងប្រទេសកម្ពុជា។ សេចក្ដីប្រកាសព័ត៌មាននៅថ្ងៃទី ៣០ មីនា ឆ្នាំ ២០១៦ នេះបានឱ្យដឹងថា ជាផ្នែកមួយនៃគម្រោង«នូរីស» គាំទ្រដោយមូលនិធិទីភ្នាក់ងារសហរដ្ឋអាមេរិកដើម្បីអភិវឌ្ឍន៏អន្តរជាតិ។
នៅក្នុងសេចក្ដីប្រកាសព័ត៌មាននោះដែរ អង្គការជាតិនិងអន្តរជាតិ លើកឡើងថា សុខភាពកុមារភាគច្រើននៅកម្ពុជាមានដំណើរការទៅមុខជាលំដាប់ក៏ដោយ តែកង្វះអាហាររូបត្ថម្ភនៅតែជាបញ្ហាប្រឈម។ ពោលគឺ កុមារម្នាក់នៅក្នុងចំណោមកុមារ ០៥ នាក់មានអាយុក្រោម ០៥ឆ្នាំ មានបញ្ហាកង្វះអាហាររូបត្ថម្ភរ៉ាំរៃ ឫ ក៏មានបញ្ហាក្រិះក្រិន។
ក្រិះក្រិន គឺជាស្ថានភាពមួយដែលកុមារមានកម្ពស់ទាបខ្លាំងបើធៀបនិងអាយុ ដោយសារបញ្ហាកង្វះអាហាររូបត្ថម្ភក្នុងអំឡុងរយៈពេលមួយពាន់ថ្ងៃដំបូងនៃជីវិត (ចាប់តាំងពីស្ត្រីផ្តើមមានផ្ទៃពោះ ដល់កុមារមានអាយុពីរឆ្នាំ)។
នៅមានកក្ដាផ្សេងៗទៀតដែលបណ្ដាលឲ្យមានភាពក្រិះក្រិន គឺរបបអាហារមិនគ្រប់គ្រាប់របស់ម្ដាយ ជំងឺឆ្លង កង្វះអនាម័យខ្លួនប្រាណ អនាម័យសាធារណៈ រួមទាំងភាពក្រីក្រផងដែរ។ បញ្ហានេះក៏ប៉ះពាល់ដល់ការសិក្សាអប់រំរបស់កុមារផងដែរ ដោយធ្វើឲ្យការអភិវឌ្ឍសមត្ថភាពនៃការគិតមានភាពខ្សោយ។
នៅក្នុងនោះដែរ អ្នកសេដ្ឋកិច្ចបានប៉ាន់ប្រមាណពីភាពក្រិះក្រិនរបស់កុមារនេះ បានធ្វើឲ្យកម្ពុជាខាតបង់ប្រាក់រហូតដល់ ១២៨ លានដុល្លាអាមេរិកក្នុងមួយឆ្នាំ ដោយសារតែលទ្ធផលការងារ ព្រមទាំងផលិកម្មមានកម្រិតទាប។
នៅក្នុងសេចក្ដីប្រកាសព័ត៌មានបានបន្ថែមទៀតថា ដោយមានការគាំទ្រមូលនិធិពីទីភ្នាក់ងារសហរដ្ឋអាមេរិក ដើម្បីអភិវឌ្ឍអន្តរជាតិ និងគំនិតផ្ដួចផ្ដើមលើកកម្ពស់សន្តិសុខស្បៀងជាសកល ដើម្បីចិញ្ចឹមអ្នកជំនាន់ក្រោយរបស់ប្រធានាធិបតីសហរដ្ឋអាមេរិក គម្រោង «នូរីស» កំពុងជួយរាជរដ្ឋាភិបាលកម្ពុជាលើវិស័យមួយចំនួនរួមមាន៖ វិស័យសុខាភិបាល អភិវឌ្ឍន៍ជនបទ និងកសិកម្ម ដើម្បីសម្រេចបាននូវការកាត់បន្ថយភាពក្រិះក្រិននៅកម្ពុជា។
អង្គការជាតិនិងអន្តរជាតិ ដែលជាដៃគូបានបើកយុទ្ធនាការរួមបញ្ចូលគ្នាដើម្បីបង្ការភាពក្រិះក្រិនដែលមានឈ្មោះថា «លូតលាស់ទាំងអស់គ្នា» ក្នុងគោលបំណងរួមគ្នាធ្វើយ៉ាងណាធានាថាក្រុមគ្រួសារ និងសហគមន៍ជាកន្លែងពោរពេញទៅដោយភាពកក់ក្ដៅ មានសុមាលភាព និងការរួបរួមដែលអាចឲ្យកុមារលូតលាស់បានល្អ។ យុទ្ធនាការនេះដែរ ត្រូវបានប្រារព្ធឡើងនៅក្នុងខេត្តមួយចំនួនមានដូចជា ខេត្តសៀមរាប ខេត្តបាត់ដំបង និងខេត្តពោធិ៍សាត់។
តាមការសិក្សាស្រាវជ្រាវជាច្រើនបានឲ្យដឹងថា អ្នកដែលមានកង្វះអាហាររូបត្ថមរ៉ាំរៃ គឺរកចំណូលតិចជាងបុគ្គលទូទៅ ២៥% ។ ផ្អែកទៅតាមការស្រាវជ្រាវដដែលនោះបានបញ្ជាក់ទៀតថា គម្រោង «នូរីស» ដែលបានធ្វើឡើងក្នុងឆ្នាំ ២០១៥ យុទ្ធនាការលូតលាស់ទាំងអស់គ្នា នឹងជម្រុញឲ្យមានការអនុវត្តឥរិយាបថសំខាន់ៗទៅលើផ្នែក សុខភាព ទឹកស្អាតនិងអនាម័យ ហើយនិងផ្នែកកសិកម្ម។
តាមរយៈដំណោះស្រាយព្រមគ្នាឥរិយាបថទាំងនេះ នឹងធ្វើឲ្យជីវិតរបស់កុមារជាច្រើនមានភាពខុសប្លែកពីមុន ហើយម្យ៉ាងទៀតគ្រប់មាតាបិតា សហគមន៍ ថ្នាក់ដឹកនាំ និងផ្នែកឯកជន ត្រូវតែរួបរួមគ្នា ដើម្បីធ្វើឲ្យមានការផ្លាស់ប្តូរ និងធានាឲ្យបាននូវស្ថិរភាព ព្រមការទទួលបានអត្ថប្រយោជន៏ទាំងនេះក្នុងរយៈពេលយូរអង្វែងសម្រាប់អ្នកជំនាន់ក្រោយ៕
