ភូមា៖ ដូចបានគ្រោងទុកជំនួយការរបស់លោកស្រី អ៊ុងសាន ស៊ូជី លោក Htin Kyaw បានស្បថចូលកាន់តំណែង នៅថ្ងៃទី៣០ មីនានេះ ដែលជាការចាប់ផ្ដើមលើកដំបូងជាង ៥០ ឆ្នាំ របស់ប្រទេសអតីតរបបយោធានិយមមួយនៅអាស៊ីអាគ្នេយ៍នេះ។
លោកជាជំនួយរបស់មេបក្សឈ្នះឆ្នោតនៃគណបក្សសម្ព័ន្ធជាតិប្រជាធិបតេយ្យ គឺលោកស្រី អ៊ុងសាន ស៊ូជី។ លោកត្រូវចូលកាន់តំណែងជំនួសលោក ថេន សេន ដែលបានកាន់អំណាចរយៈពេល ៥ ឆ្នាំ អំឡុងប្រទេសនេះសន្យាដើរតាមគន្លងប្រជាធិបតេយ្យ។
បណ្ដាញផ្សាយព័ត៌មាន BBC រាយការណ៍ថា ក្នុងពេលជាមួយគ្នានេះ អនុប្រធានាធិបតី ២ រូបទៀតគឺ លោក Henry Van Thio និង លោក Myint Swe ក៏បានស្បថចូលកាន់តំណែងនៅថ្ងៃនេះដែរ ហើយពីធីនេះធ្វើឡើងនៅចំពោះវត្តមានសម័យប្រជុំសភាពេញអង្គទាំងសភាជាន់ទាប និងសភាជាន់ខ្ពស់។
តាមប្រភពដដែលនេះ គណៈរដ្ឋមន្ត្រីថ្មីប្រទេសភូមានៃគណបក្សសម្ព័ន្ធជាតិប្រជាធិបតេយ្យ នឹងស្បថចូលកាន់តំណែងនៅទី១ មេសា ហើយក្នុងនោះ លោកស្រី អ៊ុងសាន ស៊ូជី ដែល ខកខានការកាន់តំណែងប្រធានាធិបតីក៏មានឈ្មោះជារដ្ឋមន្ត្រីផងដែរគឺ រដ្ឋមន្ត្រី ការបរទេស។ លោកស្រីត្រូតពិនិត្យក្រសួងចំនួន ២ ទៀត គឺក្រសួងអប់រំ និងក្រសួង ថាមពល និងអគ្គីសនី។ ប៉ុន្តែក្នុងគណៈរដ្ឋមន្ត្រីនោះ ក៏មានរដ្ឋមន្ត្រី ៣ រូបមកពីកងទ័ព គឺ ពួកកងទ័ពកាន់តំណែង ៣ ក្រសួង ដូចជាក្រសួងការពារជាតិ ក្រសួងសន្តិសុខជាតិ និង ក្រសួងកិច្ចការព្រំដែន៕