ភ្នំពេញ៖ គណបក្សសង្គ្រោះជាតិនៅរសៀលថ្ងៃអង្គារ៍នេះ ប្រកាសថានឹងប្តឹងក្រុមយុវជនដែលដឹកនាំដោយលោក ស្រី ចំរើន ទៅតុលាការទាក់ទងរឿងប្រើប្រាស់អាវ ទង់ និងសញ្ញាសម្គាល់របស់គណបក្សសង្គ្រោះជាតិដែលគណបក្សប្រឆាំងចាត់ទុកទង្វើនេះថា អនាធិបតេយ្យ និង រំលោភសិទ្ធិបញ្ញា ។
ការគ្រោងដាក់ពាក្យប្តឹងនេះ បន្ទាប់ពីក្រុមយុវជនដឹកនាំដោយលោក ស្រី ចំរើន បានដង្ហែញត្តិតវ៉ាទាមទាឲ្យប្រធានស្តីទីគណបក្សសង្គ្រោះជាតិ លោក កឹម សុខា បកស្រាយបំភ្លឺរឿងខ្សែអាត់សំឡេងស្នេហាសន្ទនាជាមួយនារីម្នាក់ នៅរសៀលថ្ងៃអង្គារ៍នេះ នៅមុខភូមិគ្រឹះ លោក កឹម សុខា តវ៉ានៅខាងមុខរដ្ឋសភាជាតិ និងនៅទីស្នាក់ការអង្គការសហប្រជាជាតិ ស្នាក់ការគណបក្សសង្គ្រោះជាតិ។
តាមសេចក្តីប្រកាសព័ត៌មាន គណបក្សសង្គ្រោះជាតិបានថ្កោលទោសទង្វើររបស់ក្រុមយុវជន ដឹកនាំដោយ លោក ស្រី ចំរើន ដែលបានយកទង់ អាវ និងមួក រួមទាំងសញ្ញាសម្គាល់គណបក្ស ទៅធ្វើសកម្មភាពអនាធិបតេយ្យក្នុងរាជធានីភ្នំពេញ ដោយគ្មានការអនុសញ្ញាត និងមានចេតនាក្លែងបន្លំបង្កាចបង្ខូចកិត្តិយសគណបក្ស និងសមាជិកគណបក្សសង្គ្រោះជាតិ ហើយថាទង្វើក្រុមលោក ស្រី ចំរើន នេះ បានរំលោភច្បាប់ស្តីពីកម្មសិទ្ធិបញ្ញា និង ក្រមព្រហ្មទណ្ឌ។
គណបក្សប្រឆាំងស្នើឲ្យអាជ្ញាធររាជធានីភ្នំពេញធ្វើការដកហូតអាវ មួក និងទង់ ដែលមានសញ្ញាសម្គាល់គណបក្សសង្គ្រោះជាតិពីក្រុមលោក ស្រី ចំរើន នោះវិញជាបន្ទាន់៕
