ភ្នំពេញ៖ គណបក្សសង្គ្រោះជាតិនៅថ្ងៃទី២៩ ខែមីនានេះ បានចេញសេចក្តីប្រកាសព័ត៌មានរបស់ខ្លួន ពីគម្រោងរៀបចំពីធីបង្សុកូលឧទ្ទិសកុសលជូនដួងវិញ្ញាណក្ខន្ធដែលគណបក្សហៅថា “វីរបាតុករ” ដោយសារពួកគេបានបាត់បង់ជីវិតក្នុងព្រឹត្តិការណ៍គប់គ្រាប់បែកនៅមុខអតីតមន្ទីររដ្ឋសភា កាលពីថ្ងៃទី៣០ខែមីនាឆ្នាំ១៩៩៧។
តាមសេចក្តីប្រកាសព័ត៌មាន លោក សម រង្ស៊ី ប្រធានគណបក្សសង្គ្រោះជាតិដែលកំពុងនិរទេសខ្លួននៅក្រៅប្រទេស បានសរសេរនៅលើគេហទំព័រហ្វេសប៊ុករបស់លោកថា៖ «ថ្ងៃ៣០ មីនា ២០១៦ ខ្ញុំនឹងចូលរួមក្នុងពិធីរំលឹកខួបទី១៩ឆ្នាំ នៃអំពើភេរវកម្មរដ្ឋគប់គ្រាប់បែក មកលើពលរដ្ឋស្លូតត្រង់មួយក្រុម ដែលកំពុងតែឈរតវ៉ា ដោយសន្តិវិធីនៅមុខមន្ទីររដ្ឋសភាចាស់ រាជធានីភ្នំពេញ កាលពីថ្ងៃ ៣០ មីនា ឆ្នាំ ១៩៩៧»។ លោកបន្តថា៖ « ពិធីនេះនឹងរៀបចំធ្វើឡើង នៅទីកន្លែងកើតហេតុ ចាប់ពីម៉ោង ៨ ព្រឹក»។
សូមរំឭកថា ការវាយប្រហារគ្រាប់បែកដៃកាលពីថ្ងៃទី៣០ ខែមីនា ឆ្នាំ១៩៩៧ ទៅលើបាតុកម្មរបស់បក្សប្រឆាំង បានបណ្ដាលឱ្យមនុស្សយ៉ាងហោចណាស់ ១៦ នាក់ បាត់បង់ជីវិត និងមនុស្សជាង ១៥០ នាក់ផ្សេងទៀតរងរបួស។ ប៉ុន្តែរហូតមកទល់ពេលនេះ ជនប្រព្រឹត្តិមិនត្រូវបានគេចាប់ខ្លួនមកផ្ដន្ទាទោសឡើយនោះទេ។
អង្គការឃ្លាំមើលសិទ្ធិមនុស្សអន្តរជាតិ (Human Rights Watch) ចាត់ទុកការវាយប្រហារនោះ ថាជាចេតនារបស់រដ្ឋាភិបាលក្នុងការកម្ទេចអ្នកនយោបាយបក្សប្រឆាំងនៅកម្ពុជា ប៉ុន្តែការចោទប្រកាន់បែបនេះ រដ្ឋាភិបាល តែងតែបដិសេធ៕
