បណ្តាញសហគមន៍ព្រៃឡង់ អំពាវនាវរាជរដ្ឋាភិបាលធ្វើការស៊ើបអង្កេត និងចាប់ខ្លួនជនល្មើសមកផ្តន្ទាទោសតាមច្បាប់ករណីវាយប្រហារលើសកម្មជនព្រៃឡង់ឱ្យរងរបួសធ្ងន់ធ្ងរ។ បណ្តាញសហគមន៍ព្រៃឡង់ ក៍បានទទូចឱ្យរាជរដ្ឋាភិបាលត្រូវបិទការទិញលក់ឈើទាំងស្រប់ច្បាប់ និងខុសច្បាប់នៅជុំវិញបរិវេណព្រៃឡង់ ហើយស្វែងរកអ្នកនៅពីក្រោយខ្នងបទល្មើសព្រៃឈើ។
តែជាមួយគ្នានេះស្នងការនគរបាលខេត្តក្រចេះអះអាងថា សមត្ថកិច្ចបានកំណត់មុខសញ្ញាជនសង្ស័យរួចហើយ។
កញ្ញា ជុំ ជោគជាតា ជូនសេចក្ដីរាយការណ៍៖
ថ្លែងប្រាប់វិទ្យុស្ដ្រី FM 102 នៅរសៀលនេះ លោក ផៃ ប៊ុនលាង សមាជិកបណ្ដាញសហគមន៍ព្រៃឡង់ខេត្តក្រចេះបានឱ្យដឹងថា ការចេញសេចក្ដីថ្លែងការណ៍អំពាវនាវរបស់បណ្ដាញសហគមន៍ព្រៃឡង់ដោយចំហនេះ គឺកើតឡើងក្រោយពីមានជនល្មើសមួយក្រុម បានប៉ុនប៉ងមនុស្សឃាតមកលើ កញ្ញា ផន សុភាក់ សកម្មជនព្រៃឡង់បានចុះល្បាត និងត្រួតពិនិត្យព្រៃឈើនៅត្រង់ភូមិសាស្ត្រឃុំបឹងចារ ក្បែរអូរតាជើល ឱ្យរងរបួសធ្ងន់ធ្ងរ។
លោក ផៃ ប៊ុនលាង ថា ៖ «ក្រោយអំពីថ្ងៃទី២៦ យើងបានចុះចូលរួមស្ម័គ្រចិត្តបង្ក្រាបបទល្មើសនៅអូរតាជើលហ្នឹង យើងត្រូវបានជនល្មើសលបកាប់ហ្នឹងពូថៅ ២ ពូថៅ»។ លោក បានលើកឡើងបន្ដទៀតថា តាំងពីថ្ងៃកើតហេតុមកដល់ពេលនេះជនរងគ្រោះកញ្ញា ផន សុភាក់ ដែលត្រូវបានជនល្មើសកាប់ ២ ពូថៅចំប្រអប់ជើងខាងឆ្វេងយ៉ាងធ្ងន់ធ្ងរនោះ កំពុងសម្រាកព្យាបាលនៅមន្ទីរពេទ្យឯកជនមួយនៅខេត្តក្រចេះ។
ត្រង់ចំណុចនេះដែរ លោក ផៃ ប៊ុនលាង តំណាងឱ្យសហគមន៍ព្រៃឡង់ក៏បានអំពាវនាវជាចំហ ដល់រដ្ឋាភិបាលកម្ពុជាជួយរកមុខជនល្មើសមកដាក់ទោសតាមច្បាប់ និងសុំឱ្យអាជ្ញាធរ គ្រប់តំបន់ជួយរក្សានូវសុវត្ថិភាពដល់សកម្មជន ដែលបានចូលរួមការពារព្រៃឡង់ដោយ ស្ម័គ្រចិត្តផងដែរ។
លោក ផៃ ប៊ុនលាង ថា ៖ «ខ្ញុំ សូមសំណូមពរ និងអំពាវនាវដល់អាជ្ញាធរគ្រប់ខេត្ដ គួរតែជួយរកជនសង្ស័យ ដើម្បីដាក់ទោសតាមផ្លូវច្បាប់ ហើយម្យ៉ាងទៀតក៏គួរ ជួយដល់គាំទ្រទៅដល់បណ្ដាញព្រៃឡង់ ដែលជាព្រៃរបស់ប្រជាជនយើងទាំងអស់គ្នា»។
ទាក់ទងនឹងរឿងសកម្មជនការពារបរិស្ថាននេះ ដែរប្រធានលេខាធិការដ្ឋាននៃអង្គការច្រាក់ កម្ពុជាលោក សួន សារ៉េត បានចូលរួមសោកស្ដាយ និងជំរុញរដ្ឋាភិបាល យកចិត្តទុកដាក់ និងតាមចាប់ជនល្មើសឱ្យបានឆាប់ដើម្បីផ្ដន្ទាទោសទៅតាមច្បាប់។
សួន សារ៉េតថា៖ «ជាដំណាក់កាលទីមួយ នៅក្នុងឋានៈជាមន្ដ្រីការពារសិទ្ធិមនុស្សដែល គួរអោយសោកស្ដាយ អំពីឧបវទ្ទេវហេតុហ្នឹង ហើយក៏សូមអំពាវនាវអោយរដ្ឋាភិបាល ចាត់ វិធានការឱ្យបានម៉ត់ចត់ទៅលើជនល្មើស ដែលបានប៉ុនប៉ងសម្លាប់ទៅលើអ្នកការពារព្រៃឡង់ ដែលជាធនធានដ៏សំខាន់ នៃព្រះរាជាណាចក្រកម្ពុជា»។
ឆ្លើយតបនឹងបញ្ហានេះដែរ លោក អ៊ុំ ភី ស្នងការងខេត្តក្រចេះ បានអះអាងថា នៅពេលនេះ សមត្ថកិច្ចបានស្វែងរកមុខសញ្ញាជនល្មើសឃើញហើយ ហើយកំពុងតែតាមចាប់ជនល្មើស ឱ្យបានផងដែរ។ លោក អ៊ុំ ភី ថា៖ «យើងកំពុងធ្វើដំណើរការស៊ើបអង្កេត ហើយគេបានដឹងតម្រុយខ្លះហើយ ថានៅទីណា ទីណា និងអាសយដ្ឋាននៅឯណា គេកំពុងតាមមើល ហើយនៅពេលដែលវាចូលមក យើងខ្ញុំប្ដេជ្ញាថា មិនអោយវាគេចផុតពីសំណាក់ច្បាប់ទេ»។
សេចក្តីថ្លែងការណ៍មួយរបស់សហគមន៍ព្រៃឡង់ ស្តីពីព្រឹត្តការណ៍ប៉ុនប៉ងមនុស្សឃាតមកលើសកម្មជនបណ្តាញសហគមន៍ព្រៃឡង់ បានឱ្យដឹងថា សកម្មជនម្នាក់ គឺកញ្ញា ផន សុភាក់ ដែលធ្លាប់ទទួលបានពានរង្វាន់អេក្វាទ័រប្រាយនៅទីក្រុងបារីស ប្រទេសបារាំងកាលពីចុងឆ្នាំ ២០១៥ កន្លងទៅ ត្រូវបានជនល្មើសកាប់ ២ ពូថៅចំប្រអប់ជើងខាងឆ្វេងយ៉ាងធ្ងន់ធ្ងរ ហើយ កំពុងសម្រាកព្យាបាលនៅមន្ទីរពេទ្យឯកជនមួយនៅខេត្តក្រចេះ។
សេចក្តីថ្លែងការណ៍បានបញ្ចាក់ថា នៅចន្លោះម៉ោង ១:៣០ នាទី ដល់ម៉ោង ១:៤០ នាទី មានជនល្មើសមួយក្រុមមិនស្គាល់អត្តសញ្ញាណ បានប៉ុនប៉ងមនុស្សឃាតមកលើ កញ្ញា ផន សុភាក់ កាប់នឹងពូថៅរងរបួសជើងយ៉ាងធ្ងន់ធ្ងរ នៅត្រង់ភូមិសាស្ត្រឃុំ បឹងចារ នៅពេលសហគមន៍បោះជំរុំសម្រាកនៅក្បែរអូតាជើលក្នុងតំបន់ព្រៃឡង់។
សេចក្តីថ្លែងការណ៍ដដែលក៏បានឱ្យដឹងដែរថា ក្នុងពេលចុះល្បាត ៥ ថ្ងៃមកនេះ បណ្តាញសហគមន៍ព្រៃឡង់ចំនួន ៤ ខេត្ត មានក្រចេះ ស្ទឹងត្រែង ព្រះវិហារ និងកំពង់ធំ បានចុះល្បាតត្រួតពិនិត្យ និងបង្ក្រាបបទល្មើសព្រៃឡង់ រកឃើញឈើជាច្រើនម៉ែត្រគូប និងរឹបអូសម៉ាស៊ីនរណាយន្ត ឬម៉ាស៊ីអាឈើពីជនល្មើសបានចំនួន ៣៥ គ្រឿង រួមទាំងឧបករណ៍សម្រួលដល់ការអាឈើមួយចំនួនទៀត៕
