ប្រធានគណបក្សសង្គ្រោះជាតិ លោក សម រង្ស៊ី ដែលកំពុងនិរទេសខ្លួននៅក្រៅប្រទេស បានឆ្លៀត បង្ហាញសាររិះគន់អង្គភាពប្រឆាំងអំពើពុករលួយថា “មិនស្គាល់ពីតួនាទីរបស់ខ្លួន”។
សាររិះគន់របស់មេបក្សប្រឆាំងដែលសរសេរលើទំព័រហ្វេសប៊ុករបស់កាលពីអធ្រាត្រ ថ្ងៃទី២៨ ខែមីនា ម្សិលមិញនេះ គឺបន្ទាប់ពីអង្គភាពប្រឆាំងអំពើពុករលួយបានសម្រេចបើកការស៊ើបអង្កេតករណីខ្សែអាត់សំឡេងរបស់លោក កឹម សុខា ប្រធានស្តីទីគណបក្សសង្គ្រោះជាតិ តាមបណ្ដឹងរបស់ក្រុមយុវជនមួយក្រុមដែលតាំងខ្លួនថាជានិស្សិតក្នុងរាជធានីភ្នំពេញ។
អង្គភាពប្រឆាំងអំពើពុករលួយក៏បានប្រតិកម្មតបវិញថា លោក សម រង្ស៊ី ជាមនុស្សអន់ផ្នែកច្បាប់បំផុត ហើយកំពុងគំរាមដល់ស្មារតីស៊ើបអង្កេតរបស់ ACU លើករណីពុករលួយរបស់លោក កឹម សុខា។
លោក កែវ សុខា រាយការណ៍ពីព័ត៌មាននេះ ៖
លោក សម រង្ស៊ី ប្រធានគណបក្សសង្គ្រោះជាតិ ចេញមុខជំនួសលោក កឹម សុខា អនុប្រធានរបស់លោក ដោយរិះគន់អង្គភាពប្រឆាំងអំពើពុករលួយ ដែលកំពុងបើកស៊ើបអង្កេតលើករណីលោក កឹម សុខា តាមបណ្ដឹងរបស់ក្រុមនិស្សិតចោទករណីពុករលួយពាក់ព័ន្ធរឿងស្រីញី។
លោក សម រង្ស៊ី បានសរសេររិះគន់ចំៗទៅលើអង្គភាពប្រឆាំងអំពើពុករលួយថា កំពុងតែធ្វើការ ខុសតួនាទី ពោលគឺបានយករឿងការចំណាយធនធានរបស់ឯកជនផ្ទាល់ខ្លួនសុទ្ធសាធមកបើកការស៊ើបអង្កេត ដែលប្រការនេះគឺអង្គភាពមួយនេះមិនមានសមត្ថកិច្ចនោះឡើយ។
ប្រតិកម្មរបស់មេបក្សប្រឆាំងរូបនេះ គឺបន្ទាប់ពីអង្គភាពប្រឆាំងអំពើពុករលួយកំពុងចាត់ការតាមបណ្ដឹង របស់យុវជនមួយក្រុម ដែលបានចោទលោក កឹម សុខា ថាបានប្រព្រឹត្តអំពើពុករលួយដោយបានទិញផ្ទះ ឱស្រីកំណាន់។
ប្រធានគណបក្សប្រឆាំងរូបនេះក៏បាន ផ្តល់និយមន័យនៃអំពើពុករលួយថា គឺជាទង្វើរបស់អ្នកមានអំណាចដែលកេងប្រវ័ញ្ច និងលួចផលចំណេញពីការលក់ដូរ ឬការប្រើប្រាស់ទ្រព្យសម្បត្តិជាតិ ទ្រព្យសម្បត្តិរាស្ត្រ និងទ្រព្យសម្បត្តិរដ្ឋ ជាពិសេសតាមរយៈការគ្រប់គ្រងថវិកាជាតិ ដែលបានមកពីញើសឈាមប្រជារាស្ត្រទាំងមូល។
លោក សម រង្ស៊ី បានបកស្រាយបន្ថែមដោយរិះគន់ថា៖ «មានតែមន្ត្រីគណបក្សកាន់អំណាច (CPP) ទេ ដែលអាចប្រព្រឹត្តអំពើពុករលួយបែបនេះបាន ពីព្រោះវាជាការប្រើអំណាចរបស់រដ្ឋ ដោយខុសច្បាប់ ដើម្បីបំផ្លិចបំផ្លាញផលប្រយោជន៍សាធារណៈ។ មន្ត្រីគណបក្សប្រឆាំង (CNRP) មិនមានអំណាចអ្វី ជាតំណាងរដ្ឋ ឬ តំណាងរដ្ឋាភិបាល ដើម្បីប្រព្រឹត្តអំពើពុករលួយ ដូចមានចែងខាងលើនេះទេ»។
វិទ្យុស្ត្រីមិនអាចសុំការឆ្លើយតបពីលោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានទេនៅថ្ងៃនេះ។ តែតាមសារព័ត៌មានក្នុងស្រុកដែលស្និទ្ធជាមួយរដ្ឋាភិបាល បានស្រង់សំដីលោក ឱម យ៉ិនទៀង ថា លោកចាត់ទុកថា៖ « លោក សម រង្ស៊ី ប្រធានគណបក្សសង្គ្រោះជាតិ ជាមនុស្សអន់ផ្នែកច្បាប់បំផុត ហើយកំពុងគំរាមដល់ស្មារតីស៊ើបអង្កេតរបស់ ACU លើករណីពុករលួយរបស់លោក កឹម សុខា»។
លោក ឱម យ៉ិនទៀង បន្តថា លោក កឹម សុខា គឺជាតំណាងរាស្ត្រ និងជាបុគ្គលសាធារណៈ គឺច្បាប់ប្រឆាំងអំពើពុករលួយ តម្រូវឱ្យអនុវត្តចំពោះបុគ្គលប្រភេទនេះដែរ។
លោក មាស នី អ្នកសិក្សាស្រាវជ្រាវពីការអភិវឌ្ឍសង្គមកម្ពុជាលើកឡើងថា ការរិះគន់របស់លោក សម រង្ស៊ី ពេលនេះក៏មិនខុសពីប្រតិកម្មរបស់មហាជនដែលបានបញ្ចេញមតិរិះគន់តាមបណ្ដេញសង្គមហ្វេស ប៊ុកនាពេលកន្លងមកនេះប៉ុន្មាននោះទេ។ តែយ៉ាងលោក មាស នី ថាអង្គភាពប្រឆាំងអំពើពុករលួយគួរតែបើកការស៊ើបអង្កេតប្រកបដោយតម្លាភាព គឺត្រូវស៊ើបសង្កេតទាំងមន្ត្រីរដ្ឋាភិបាលផង ដើម្បីជៀសវាងការរិះគន់ថា អង្គភាពមួយនេះនៅក្រោមឥទ្ធិពលរបស់រដ្ឋាភិបាល។
លោក មាស នី៖ «ខ្ញុំគិតថា បើ ACU ហ៊ានធ្វើពលីកម្មដើម្បីតាមដានរឿងទាំងអស់ នោះរឿងទាំងឡើយវាហ្នឹងចេញមកទាំងអស់ ក៏ប៉ុន្មានការតាមដានតែមួយ វាហាក់ដូចជាមិនទាន់ផ្តល់យុត្តិធម៌សម្រាប់សង្គមទូទៅ។ អញ្ចឹងវានៅតែថា ACU នេះគឺគ្រាន់តែជាឧបករណ៍មួយដែលរដ្ឋាភិបាលបង្កើតឡើងសម្រាប់គាប់សង្កត់ទៅលើកអ្នកណាដែលមិនមែនជាគ្នារបស់គេ ដែលនរណាមិនជាបក្សពួករបស់គេតែប៉ុណ្ណឹង នេះបើតាមអ្វីដែលយើងមើលឃើញ»។
កាលពីថ្ងៃម្សិលមិញនេះ អគ្គលេខាធិការដ្ឋានរដ្ឋសភាក៍បានចេញលិខិតរំលឹកឱ្យលោក កឹម សុខា ឆាប់មកបំភ្លឺតាមពាក្យបណ្ដឹងរបស់ក្រុមយុវជន ដែលទាមទារឱ្យមេដឹកនាំបក្សប្រឆាំងរូបនេះចេញមក បកស្រាយដែរ។ ប៉ុន្តែ លោក អេង ឆៃអាង ប្រធានគណៈកម្មការទទួលពាក្យបណ្ដឹងនៃរដ្ឋសភា បានសរសេរលិខិតទៅកាន់សម្ដេច ហេង សំរិន ប្រធានរដ្ឋសភាថា តាមរដ្ឋធម្មនុញ្ញ និងបទបញ្ជាផ្ទៃក្នុងរបស់សភា គឺរដ្ឋសភាមិនមានសិទ្ធអំណាច កោះហៅលោក កឹម សុខា មកបំភ្លឺរឿងនេះឡើយ។
សូមបញ្ជាក់ថា នៅក្នុងសារប្រតិកម្មរបស់លោក សម រង្ស៊ី នេះដែល លោកក៏បានផ្ដល់ដំបូន្មានដល់អង្គភាពប្រឆាំងពុករលួយ ពីកិច្ចការមួយចំនួនដែលត្រូវធ្វើជាចំបាច់ដូចជា៖
- ការប្លន់ដីប្រជារាស្ត្រ យកទៅប្រគល់ឱ្យក្រុមហ៊ុនឯកជន ដែលផ្តល់សំណូកសូកប៉ាន់
- ការកាប់បំផ្លាញព្រៃឈើ ដើម្បីនាំឈើទៅលក់ក្រៅប្រទេស ដោយលួចលាក់
- ការធ្វើអាជីវកម្ម បំផ្លាញបរិស្ថាន ដូចជាការវាយកម្ទេចភ្នំ និងការបូមខ្សាច់
- ការយកទ្រព្យសម្បត្តិរដ្ឋ ដូចជាអាគារសាធារណៈទៅលក់ ដើម្បីប្រមូលលុយដាក់ចូលហោប៉ៅបុគ្គលឬបក្ខពួក
- ការកឹបកេងថវិការដ្ឋ យកទៅចាយវាយ ដើម្បីគ្រាន់តែបម្រើផលប្រយោជន៍បុគ្គលឬបក្ខពួក
- ការផ្តល់កិច្ចសន្យាជាមួយរដ្ឋ ឱ្យទៅតែបក្ខពួករបស់ខ្លួន ដែលជាការបំប៉ោងចំណាយរបស់រដ្ឋ
- ការស៊ីសំណូកសូកប៉ាន់ពីថៅកែរោងចក្រ ដើម្បីឱ្យថៅកែគាបសង្កត់កម្មករ
- ការបែងចែកឡូត៍នេសាទ តាមតែសំណូកសូកប៉ាន់៕
