អ្នកវិភាគស្ថានការណ៍នយោបាយនៅកម្ពុជា សុទ្ធតែលើកឡើងដូចៗគ្នាថា ការដែលលោក ហ៊ុន ម៉ាណែត សម្រេចចិត្តមិនចូលរួមក្នុងពិធីចូលឆ្នាំខែ្មរនៅទីក្រុងឡុងប៊ិចវិញនោះ ថាជារឿងមួយដ៏ត្រឹមត្រូវ ដើម្បីបញ្ចៀសការប៉ះទង្គិចគ្នា និងដើម្បីឱ្យខ្មែរមានការរួបរួមគ្នាវិញ។ តែយ៉ាងណាប្រធានអង្គការសម្ព័ន្ធមិត្តខ្មែរ-អាមេរិកាំង លោក ទូច វិបុល បានប្រាប់សារព័ត៌មានថា ពលរដ្ឋខ្មែរ-អាមេរិកាំង នៅតែប្រឆាំងដាច់ខាតនូវវត្តមាន លោក ហ៊ុន ម៉ាណែត បើទោះបីជាលោកមិនចូលរួមការដង្ហែក្បួនវប្បធម៌ចូលឆ្នាំខ្មែរនៅទីក្រុងឡុងប៊ិចក៏ដោយនោះ។
លោក កែវ សុខា រាយការណ៍ពីព័ត៌មាននេះ៖
អ្នកវិភាគព្រឹត្តិការណ៍សង្គមកម្ពុជា លោក រស់ រ៉ាវុធ មើលឃើញបីចំណុចល្អៗ នៃការសម្រេចចិត្តមិនចូលរួមក្នុងពិធីចូលឆ្នាំខែ្មរនៅទីក្រុងឡុងប៊ិចរបស់លោក ហ៊ុន ម៉ាណែត កូនប្រុសច្បងរបស់លោកនាយករដ្ឋ ហ៊ុន សែន។
ចំណុចទី១ គឺបង្ហាញពីសីលធម៌ល្អក្នុងការគោរពគ្នាទៅវិញទៅមក ចំណុចទី២ ក៏ដើម្បីបង្ហាញពីឆន្ទៈបញ្ចៀសនូវជម្លោះរវាងខ្មែរនិងខ្មែរ និងចំណុចទី៣ គឺបង្ហាញពីទិដ្ឋភាពបង្រួបបង្រួមខ្មែរតែមួយ ស្របពេលដែលពលរដ្ឋខ្មែរកំពុងមានទស្សនៈផ្ទុយគ្នា។
តែយ៉ាងណាលោក រស់ រ៉ាវុធ សង្កត់ធ្ងន់ថា ការបង្ហាញប្រតិកម្មតាមរយៈការគ្រោងធ្វើបាតុកម្មបែបនេះ គឺឆ្លុះបញ្ចាំងឱឃើញថា ពលរដ្ឋខ្មែរដែលរស់នៅក្រៅប្រទេសមិនពេញចិត្តនឹងការដឹកនាំរបស់មេដឹកនាំកម្ពុជាបច្ចុប្បន្ននេះឡើយ ដែលកន្លងមកពលរដ្ឋខ្មែរទាំងនោះបានហៅការដឹកនាំរបស់នាយករដ្ឋមន្ត្រីសព្វថ្ងៃថា ជាការដឹកនាំបែរផ្ដាច់ការ។
លោក រស់ រ៉ាវុធ៖ «នេះជាការល្អមួយក្នុងការលុបបំបាត់នូវពាក្យទំនាបដែលបរទេស ដែលច្រើនតែមើលងាយខ្មែរថាឱតែពីរនាក់ទាស់គ្នាគឺខ្មែរ។ អញ្ចឹងទេ!ក្នុងការដែលសម្រេចចិត្តដូចនេះគឺជាការល្អមួយក្នុងការបង្រួបបង្រួមខ្មែរគោរពនូវសីលធម៌របស់មនុស្សជាតិ»។
ចំណែកលោកសាស្ត្រាចារ្យ សូ ចន្ថា អ្នកតាមដានស្ថានការណ៍នយោបាយកម្ពុជាមួយរូប ក៏ហៅការសម្រេចចិត្តរបស់លោក ហ៊ុន ម៉ាណែត ថាជាការសម្រេចមួយល្អស្របតាមកាលៈទេសៈ។ លោក សូ ចន្ថា និយាយថា ការគ្រោងធ្វើបាតុកម្មរបស់ពលរដ្ឋខ្មែរនៅបរទេសនេះ ក៏ព្រោះតែពលរដ្ឋទាំងនោះយល់ថា លោក ហ៊ុន ម៉ាណែត ជាកូនប្រុសរបស់សម្ដេច នាយករដ្ឋមន្ត្រី ហ៊ុន សែន ដែលបានកាន់អ្នកអំណាចយូរឆ្នាំ និងប្រើប្រាស់អំណាចគាបសង្កត់ពលរដ្ឋខ្មែរ។
តែយ៉ាងណាអ្នកវិភាគស្ថានការណ៍នយោបាយរូបនេះ ស្នើឱពលរដ្ឋខ្មែរទាំងអស់ត្រូវបែងចែកឱ្យបានច្បាស់ថាកម្មវិធីដែលលោក ហ៊ុន ម៉ាណែត គ្រោងធ្វើនោះ ជាកម្មវិធីប្រពៃណីខ្មែរ ឬក៏ជាកម្មវិធីបែបនយោបាយ។
លោក សូ ចន្ថា៖ «ខ្ញុំយល់ថា ការដែលសម្រេចចិត្តមិនចូលរួមនេះក៏ជារឿងមួយល្អ ក៏ប៉ុន្តែខ្ញុំយល់ថា ប្រសិនជាអត់ចូលរួមទេលោក ហ៊ុន ម៉ាណែត គាត់បាត់បង់ឱកាសមួយ គឺឪកាសក្នុងការប្រឈមជាមួយពលរដ្ឋខ្មែរនៅក្រៅប្រទេស មានន័យថាគាត់មិនអាចធ្វើការបកស្រាយ ឬក៏បង្ហាញពីទស្សនៈយោបល់ ឬក៏គំនិតគោលនយោបាយរបស់លោក តើថាគណបក្សរបស់លោកមានទស្សនយ៉ាងម៉េចចំពោះជាតិ។ អញ្ចឹង ជាការខាតបង់មួយ ពេលដែលលោកមិនហ៊ានប្រឈមមុខករណីនេះ»។
កាលពីពេលថ្មីៗនេះពលរដ្ឋខ្មែររស់នៅសហរដ្ឋអាមេរិក ដែលមានលោក ទូច វិបុល អះអាងថា ជាប្រធានអង្គការសម្ព័ន្ធមិត្តខ្មែរ-អាមេរិកាំង នោះ បានដឹកនាំពលរដ្ឋខ្មែរប្រឆាំងវត្តមានរបស់សម្ដេចនាយករដ្ឋមន្ត្រី ហ៊ុន សែន ផងដែរគឺ នៅពេលដែលលោកនាយករដ្ឋមន្ត្រីបានដឹកនាំគណប្រតិភូទៅចូលរួមកិច្ចប្រជុំមេដឹកនាំអាស៊ាន-អាមេរិកនៅរដ្ឋកាលីហ្វ័រញៀល។
ជុំវិញការធ្វើបាតុកម្មប្រឆាំងវត្តមានថ្នាក់ដឹកនាំកម្ពុជានៅទឹកដីអាមេរិក ក៏មានការចោទប្រកាន់ដាក់គ្នាផងដែរ គឺខាងមន្ត្រីរដ្ឋាភិបាលចោទថា បាតុកម្មនោះជាការរៀបចំរបស់គណបក្សប្រឆាំងនៅកម្ពុជា តែមន្ត្រីគណបក្សប្រឆាំង និងតំណាងពលរដ្ឋទាំងនោះបានចេញមុខអៈអាងវិញថា បាតុកម្មនោះកើតចេញពីឆន្ទៈរបស់ពលរដ្ឋដែលប្រឆាំងនឹងការដឹកបែបផ្តាច់ការរបស់មេដឹកនាំបច្ចុប្បន្ន៕
