ស្ទឹងត្រែង៖ ស្នងការនគរបាលខេត្ត សម្រេចបញ្ចូនខ្លួនជនសង្ស័យ ចាក់សាំងដុតប្រពន្ធខ្លួន ព្រោះ តែក្ដីប្រចណ្ឌបញ្ចូនទៅតុលាការខេត្តនៅរសៀលថ្ងៃនេះ។ លោក ម៉ៅ តារា ស្នងការនគរបាលខេត្តស្ទឹងត្រែង បានប្រាប់វិទ្យុស្ត្រីថា ក្រោយពីផ្ទុះករណី ស្វាមីចាក់សាំងដុតប្រពន្ធ នៅភូមិស្រែពោធិ សង្កាត់ស្រះឫស្សី ក្រុងស្ទឺងត្រែង កាលពីម្សិលមិញរួចមក ជនសង្ស័យ ដែលជាស្វាមីឈ្មោះផេង វិចិត្រ ត្រូវបានសមត្ថកិច្ចខេត្តសម្រេចបញ្ចូនខ្លួនទៅតុលាការ នៅរសៀលថ្ងៃទី២៨ ខែមីនា ឆ្នាំ២០១៦ នេះហើយ ដើម្បីចាត់ការទៅតាមនីតិវិធី។
លោក ម៉ៅ តារា ថា ៖ «បា៎ទៗ យើងរៀបចំឯកសារ ដើម្បីរៀបចំទៅតុលការដើម្បីបញ្ចូនទៅ តុលាការផ្ដន្ទាទោសតាមច្បាប់ ព្រោះគាត់ធ្វើហ្នឹង វាមិនមែនជារឿងស្រាលទេ ជារឿង ធ្ងន់ធ្ងរ…»។ ស្នងការខេត្ត លោក ម៉ៅ តារា បានប្រាប់ឱ្យដឹងបន្ថែម ថាបុរសដែលបញ្ចូនខ្លួនទៅតុលាការនៅរសៀលថៃនេះគឺ សមត្ថកិច្ចខេត្តបានសម្រេចចោទពីបទហិង្សាដែលមានស្ថានទម្ងន់ទោស ។
គួរបញ្ជាក់ផងដែរថាជនសង្ស័យឈ្មោះ ផេង វិចិត្រ អាយុ ៣៥ ឆ្នាំ មានស្រុកកំណើត នៅភូមិខ្សាច់ប្រឆេះ ឃុំកណ្តាល ស្រុកក្រូចឆ្មារ ខេត្តត្បូងឃ្មុំ។ ចំណែកឯជនរងគ្រោះឈ្មោះ ចៅ ហ៊ាន អាយុ ៣៤ ឆ្នាំ មានស្រុកកំណើតនៅ ភូមិចំបក់ ឃុំឫស្សីកែវ ស្រុកព្រែកប្រសព្វ ខេត្តក្រចេះ។ អ្នកទាំងពីរជាកម្មករឡឥដ្ឋ ដែលមានទីតាំងស្ថិតក្នុងភូមិស្រែពោធិ៍ សង្កាត់ស្រះឫស្សី ក្រុងស្ទឹងត្រែង ខេត្តស្ទឹងត្រែង។
បច្ចុប្បន្នជនរងគ្រោះ កំពុងសម្រាកព្យាបាលនៅមន្ទីរពេទ្យបង្អែកខេត្ត ចំណែកឯជនសង្ស័យ ត្រូវបានអធិការដ្ឋានក្រុងស្ទឹងត្រែង ត្រៀមកសាងសំណុំរឿងបញ្ជូនខ្លួនទៅតុលាការ ដាក់ទោសទៅតាមនីតិវិធីនៅល្ងាចនេះ ពីបទហិង្សារគ្រួសារដែលមានស្ថានទម្ងន់ទោស។ តាមក្រមព្រហ្មទណ្ឌ មាត្រា ២២ ករណីហិង្សាដែលបង្កឡើង ដោយចេតនាជាប់ពន្ធនាគារ ពី ២ ឆ្នាំទៅ ៥ ឆ្នាំ និងពិន័យជាប្រាក់ពី ៤លាន ទៅ ១០លានរៀល ។ ជាមួយគ្នានេះដែរ ករណី ឈ្មោះ ផេង វិចិត្រ ប្រើហិង្សារដោយចេតនានេះដែរ អាចប្រឈមនឹងការជាប់ពន្ធនាគារ ពី ៥ ទៅ ១០ ឆ្នាំ និងពិន័យជាប្រាក់ពី ៥លានរៀល ទៅដល់ ១០លានរៀល៕