តំណាងសហជីពឯករាជ្យ គ្រោងដាក់ញត្តិទៅរដ្ឋសភាជាតិនៅថ្ងៃទី២៨ ខែមីនា ឆ្នាំ២០១៦ ខាងមុខនេះ ដើម្បីស្នើឱ្យរដ្ឋាភិបាល កែសម្រួលច្បាប់សហជីពនេះ មុននឹងដាក់ឱ្យអនុម័តជាធរមាន។
ការដាក់ញត្តិនេះ ក៏មានការចូលរួមពីក្រុមកម្មកររោងចក្រ និងតំណាងអង្គទូតបរទេស ដែលធ្វើការពាក់ព័ន្ធនឹងច្បាប់នេះផងដែរ។ នេះបើតាមការបញ្ជាក់របស់លោក អាត ធន់ ប្រធានសហភាពការងារកម្ពុជា កាលពីថ្ងៃម្សិលមិញ។
លោក អាត់ ធន់ បានឱ្យដឹងថា ច្បាប់សហជីពនេះ គឺមានភាពរិតត្បិតក្នុងការបញ្ចេញមតិយោបល់របស់សហជីព នៅពេលពួកគេចង់ជួយធ្វើការតវ៉ាទាមទារពីចំណុចណាមួយ ពីថៅកែរោងចក្រ ដែលរំលោភបំពានសិទ្ឋិការងារកម្មករ។
លោកបានបន្តថា បើច្បាប់នេះចេញជាធរមានមែននោះ ថៅកែរោងចក្រពិតជាមានអំណាចក្នុងការបំពានច្បាប់ការងារជាក់ជាមិនខាន ព្រោះថា កម្មករគ្មានអ្នកតំណាងឱ្យខ្លួន ក្នុងការទាមទារសិទ្ឋិសេរីភាពការងារឡើយ។
គួររំឭកថា កាលពីថ្ងៃទី១១ ខែមីនា ឆ្នាំ២០១៦ កន្លងទៅ គណៈកម្មាធិការអចិន្ត្រៃយ៍រដ្ឋសភាបានបើកកិច្ចប្រជុំពិនិត្យលើសេចក្តីព្រាងច្បាប់ស្តីពីសហជីពដោយបានសម្រេចយកថ្ងៃទី ០៤ ខែមេសា ឆ្នាំ២០១៦ ដើម្បីបើកកិច្ចប្រជុំពេញអង្គ ពិភាក្សា និងអនុម័តសេចក្តីព្រាងច្បាប់ដែលក្រុមសហជិពមិនទាន់ឯកភាពទាំងស្រុង។
សូមជម្រាបជូនថា សេចក្តីព្រាងច្បាប់ស្តីពីសហជីពមាន ១៧ ជំពូក និង ១០០ មាត្រា។ សហជីពមួយចំនួនបានលើកឡើងថា ច្បាប់នេះមានការរឹតត្បិតយ៉ាងខ្លាំងលើសេរីភាពបញ្ចេញមតិកម្មករ និងសហជីព៕
