ឥណ្ឌូនេស៊ី៖ ប្រទេសឥណ្ឌូនេស៊ីបានប្រកាសប្រាប់ទៅប្រទេសចិនឱ្យបញ្ឈប់ការបញ្ជូននាវារបស់ខ្លួនចូលទៅក្នុងដែនទឹករបស់ប្រទេសឥណ្ឌូនេស៊ីបន្ដទៀត ដោយបានព្រមានថានឹងចាត់ការប្រឆាំង។
បណ្ដាញផ្សាយព័ត៌មាន Channel News Asia (CNA)បានចុះផ្សាយថាការទទួចរបស់ប្រទេសឥណ្ឌូនេស៊ីធ្វើឡើងបន្ទាប់ពីប្រទេសនេះបានតវ៉ាជាផ្លូវការ ដោយចោទប្រទេសចិនថាបានរំលោភលើដែនអធិបតេយ្យរបស់ខ្លួន គឺបន្ទាប់ពីនាវាល្បាតប្រទេសចិនមួយគ្រឿងបានបើកល្បាតចូលដែនទឹករបស់ឥណ្ឌូនេស៊ីនោះ។
រដ្ឋមន្ដ្រីសន្ដិសុខជាតិនៃប្រទេសឥណ្ឌូនេស៊ី Luhut Pandjaitan បាននិយាយថាឥណ្ឌូនេស៊ីនឹងបន្ដរក្សាសហប្រតិបត្តិការល្អទៀត ល្កឹកណាតែចិនគោរពនិងបញ្ឈប់ការបញ្ជូននាវាល្បាតចូលទឹកដីឥណ្ឌុនេស៊ី។
រដ្ឋមន្ដ្រីការបរទេសលោកស្រី Retno Marsudi បាននិយាយថានៅថ្ងៃព្រហស្បតិ៍នេះថាឥណ្ឌូនេស៊ីកំពុងរង់ចាំការឆ្លើយតបពីប្រទេសចិន ចំពោះនាវាល្បាតរបស់ចិនមួយគ្រឿងបានអមការពារទូកនេសាទចិនជាច្រើនគ្រឿងចូលទឹកដីឥណ្ឌុនេស៊ី ហើយក្រោយមកបានប៉ះទង្គិចជាមួយនឹងទូកនេសាទឥណ្ឌូនេស៊ីដែលនៅទីនោះ។
កាលពីសប្ដាហ៍មុនក្រុមប៉េកាំងបានអះអាងថា ទូកនេសាទ និងទូកល្បាតរបស់ពួកគេមិនបានចូលទៅនេសាទក្នុងតំបន់ទឹករបស់ឥណ្ឌូនេស៊ីនោះទេ ហើយក៏បានទាមទារឱ្យឥណ្ឌូនេស៊ីឈប់ចោទប្រកាន់បែបនេះ៕
ប្រភព៖ CNA
