ភ្នំពេញ៖ យោងតាមរបាយការណ៍ស្តីពីស្ថានភាពចរាចរណ៍ បានបង្ហាញថា គ្រោះថ្នាក់ចរាចរណ៍នៅកម្ពុជា អាចកាត់បន្ថយបានតិចតួចប៉ុណ្ណោះ បើធៀបរយៈពេលដូចគ្នា រវាងឆ្នាំ២០១៥ និងឆ្នាំ២០១៦ ទោះជារដ្ឋាភិបាលប្រឹងប្រែងរឹតបន្តឹងច្បាប់ចរាចរណ៍ផ្លូវគោកថ្មីចាប់ឆ្នាំ ២០១៦ នេះយ៉ាងណាក្តី។
ឆ្លើយតបបញ្ហានេះ លោក ហ៊ឹម យ៉ាន អគ្គស្នងការរងនគរបានជាតិ បានបញ្ជាក់ពីមូលហេតុដែលកម្ពុជា ពិបាកក្នុងការកាត់បន្ថយគ្រោះថ្នាក់ចរាចរណ៍ថា ដោយសារកម្ពុជា ជួបនូវបញ្ហាប្រឈមមួយចំនួន ជាពិសេសកំណើនយានយន្ត។ ការថ្លែងរបស់លោក ហ៊ឹម យ៉ាន ធ្វើឡើងនៅក្នុងសិក្ខាសាលាស្តីពីលទ្ធផលបូកសរុបការងារការអនុវត្តច្បាប់ស្តីពីចរាចរណ៍ផ្លូវគោកប្រចាំត្រីមាសទី១ នៅសាលប្រជុំក្រសួងសាធារណការ និងដឹកជញ្ជូន កាលពីព្រឹកថ្ងៃទី២៤ម្សិលមិញ។
កញ្ញា ឆេង ណាតា រាយការណ៍ព័ត៌មាននេះ ៖
គិតចាប់ពីថ្ងៃទី០១ ខែមករា ដល់ថ្ងៃទី២១ ខែមីនា ឆ្នាំ២០១៦ បើធៀបរយៈពេលដូចគ្នា កាលពីឆ្នាំ២០១៥ គ្រោះថ្នាក់ចរាចរណ៍ បានកើតឡើងចំនួន ៨៨៧ លើក គឺថយចុះ១១៥ លើក បណ្តាលឱ្យសា្លប់ចំនួន ៤៥២ នាក់ កើនឡើង ១នាក់ និងរបួស ១៥០៨ នាក់ ថយចុះ១៨២ នាក់។ នេះបើតាមការឱ្យដឹងពីលោក លោក ហ៊ឹម យ៉ាន អគ្គស្នងការរងនគរបាលជាតិ។
លោក ហ៊ឹម យ៉ាន បន្តថា គ្រោះថ្នាកចរាចរណ៍ភាគច្រើនកើតឡើងនៅខេត្តព្រះសីហនុ រាជធានីភ្នំពេញ ខេត្តតាកែវ និងខេត្តបន្ទាយមានជ័យ។ មូលហេតុនៃគ្រោះថ្នាក់នេះ ដោយសារការបើកបរលើសល្បឿនកំណត់ បើកបរក្នុងស្ថានភាពស្រវឹង មិនប្រកាន់ស្តាំ មិនគោរពសិទ្ធិអាទិភាព វ៉ាជែង បត់ កត្តាយានយន្ត និងបញ្ហាផ្សេងៗមួយចំនួនទៀត។
បើតាម លោក ហ៊ឹម យ៉ាន កម្ពុជាពិបាកក្នុងការកាត់បន្ថយបញ្ហាគ្រោះថ្នាក់ចរាចរណ៍ ដោយមានបញ្ហាប្រឈមនានា រួមមាន៖ ការកើនឡើងនៅកំណើនយានយន្ត កត្តាអ្នកបើកបរមិនអើពើក្នុងការគោរព និងអនុវត្តច្បាប់ជាដើម៖ «អម្បាញ់មិញខ្ញុំបានលើកឡើងហើយមូលហេតុដែលធ្ងន់ធ្ងរ គឺចំពោះរថយន្តដឹកកម្មករ ឥឡូវបទពិសោធរបស់យើងនេះកំពុងតែក្តោបទៅលើអាគ្រោះថ្នាក់ដុំ វាយលុកទៅគ្រោះថ្នាក់ដុំ ប៉ុន្តែមិនទាន់បានលទ្ធផលភ្លាមៗទេ…»។
លោក ហ៊ឹម យ៉ាន អះអាងថា អគ្គស្នងការរងនគរបានជាតិ នឹងខិតខំបង្ការធ្វើយ៉ាងណាដើម្បីកាត់បន្ថយគ្រោះថ្នាក់ចរាចរណ៍ឱ្យបានកាន់តែតិចជាងមុន។ លោកបន្ថែមថា ទិសដៅបន្តទៀត អគ្គស្នងការនគរបានជាតិនឹងបន្តរិតបន្តឹងត្រួតពិនិត្យការអនុវត្តច្បាប់ឱ្យបានជាប់ជាប្រចាំទាំងថ្ងៃ ទាំងយប់ ប្រកបដោយតម្លាភាព ស្មើភាព ជាពិសេស ត្រូវផ្តោតលើបញ្ហា ជាអទិភាព ដែលបង្កឱ្យមានគ្រោះថ្នាក់ចរាចរណ៍។
ទន្ទឹមនឹងនេះ អគ្គស្នងការរងនគរបាលជាតិ លើកឡើងថា ច្បាប់ស្តីពីការគ្រប់គ្រងគ្រឿងស្រវឹង ក៏ជាផ្នែកមួយក្នុងការកាត់បន្ថយគ្រោះថ្នាក់ចរាចរណ៍បានមួយកម្រិត។ លើសពីនេះទៀត លោក ហ៊ឹម យ៉ាន បញ្ជាក់ថា លោកនឹងជំរុញឱ្យច្បាប់នេះចេញឱ្យបានលឿនផងដែរ។
ចំណែកលោក គឹម បញ្ញា នាយកប្រតិបត្តិអង្គការមូលនិធិបង្ការរបួសអាស៊ី មើលឃើញថា បញ្ហាប្រឈមក្នុងការកាត់បន្ថយគ្រោះថ្នាក់ចរាចរណ៍ ដោយសារការអនុវត្តច្បាប់នាពេលបច្ចុប្បន្ននេះ មិនទាន់បានពេញលេញ និងនៅមានកម្រិតនៅឡើយ។
លោក គឹម បញ្ញា ទទូចឱ្យកងកម្លាំងនគរបាលចរាចរណ៍ត្រូវពង្រឹងការអនុវត្តច្បាប់ដោយផ្តោតលើកត្តាហានិភ័យ ដែលបង្កឱ្យមានគ្រោះថ្នាក់ចរាចរណ៍ ដូចជាការបើកលើសល្បឿនកំណត់ ការមិនពាក់មូកសុវត្តិភាពទាំងអ្នកឌុប និងអ្នកជិះពីក្រោយ និងអ្នកបើកបរក្នុងស្ថានភាពស្រវឹង ឱ្យបានតឹងរ៉ឹង និងឱ្យបានម៉ឺងម៉ាត់ ប្រកបដោយតម្លាភាព និងស្នើភាពគ្នា។ បន្ថែមពីលើសនេះ លោកថា រដ្ឋាភិបាលត្រូវជំរុញការយល់ដឹងរបស់ប្រជាពលរដ្ឋ ដើម្បីឱ្យពួកគាត់មានការភ្ញាក់រឭក បើកបរដោយសារប្រុងប្រយ័ត្នខ្ពស់ និងគោរពច្បាប់ចរាចរណ៍។
លោកបន្តថា៖ «ទី៣ ខ្ញុំមើលឃើញថា ការចូលរួម ពីវិស័យឯកជន ពីសង្គមស៊ីវិល ពីអ្នកពាក់ព័ន្ធ។ ខ្ញុំគិតថាបញ្ហាគ្រោះថ្នាក់ចរាចរណ៍នេះ វាត្រូការការឆ្លើយតបពី វិធានការសរុប ពីវិធានការរួម អញ្ចឹងខ្ញុំគិតថាវិស័យឯកជនគួរតែពិនិត្យពីវិធានការ ក្នុងការដាក់ចេញជាបទបញ្ជា ព្រោះថាយើងធ្វើបែបនេះ ដើម្បីការពារទ្រព្យសម្បត្តិរបស់យើង និងធនធានមនុស្សរបស់យើង…»។
សូមបញ្ជាក់ថា បច្ចុប្បន្នយានយន្តដែលបានចុះបញ្ជី មានជាង ៣លាន ២សែនគ្រឿង (៣.២០០.៣២០ គ្រឿង) ក្នុងនោះម៉ូតូមាន ជិត ៣លានគ្រឿង (២.៧១៤.១៩៣ គ្រឿង) និងរថយន្តគ្រប់ប្រភេទមានប្រមាណជិត ៥សែនគ្រឿង (៤៨៦.១២៧ គ្រឿង)។ នេះបើតាមរបាយការណ៍របស់អគ្គស្នងការនគរបាលជាតិ៕
