វៀតណាម៖ ក្រសួងសុខាភិបាលប្រទេសវៀតណាមបានប្រកាសឱ្យដឹងថា មានករណីផ្ទុះមេរោគ Zika បន្ទាប់ពីអ្នកទេសចរជនជាតិអូស្ដ្រាលីម្នាក់ត្រឡប់ទៅកាន់ប្រទេសរបស់គាត់វិញត្រូវបានរកឃើញថា គាត់បានឆ្លងជំងឺគ្រុនប្រភេទនេះ។
ការផ្ទុះជំងឺប្រភេទនេះបន្ទាប់ពីអង្គការសុខភាពពិភពលោកបានប្រកាសថា ប្រទេសវៀតណាមកើតមានករណីប្រភេទជំងឺនេះ ដោយបានប្រាប់ទៅបណ្ដាញផ្សាយព័ត៌មានក្នុងប្រទេសវៀតណាមកាលពីថ្ងៃពុធ។
ប្រធាននាយកដ្ឋានបង្ការជំងឺឆ្លងនៃប្រទេសវៀតណាមលោកសាស្ដ្រាចារ្យ Tran Dac Phu បាននិយាយថាជនជាតិអូស្ដ្រាលីបានកើតជំងឺនេះនៅពេលដែលគាត់ស្នាក់នៅក្នុងប្រទេសវៀតណាម។ លោកបាននិយាយថាបុរសអូស្ដ្រាលីរូបនេះបានចាកចេញពីប្រទេសវៀតណាមទៅកាន់ប្រទេសរបស់ខ្លួនកាលពីថ្ងៃ៣ មីនា ហើយក្រោយមកត្រូវបានរកឃើញថាគាត់កើតជំងឺប្រភេទដែលគួរឱ្យភ័យខ្លាចនេះ។
ជំងឺដែលផ្ទុកដោយមេរោគ Zika បានបង្ហាញនូវរោគសញ្ញារបស់វា គឺគ្រុនក្ដៅរសាប់រសល់ ដៃជើងឈឺក្បាល ឈឺសាច់ដុំ ឈឺសន្លាក់ដៃជើង និងក្អួតចង្អោល។ បុរសជនជាតិអូស្ដ្រាលីរូបនេះត្រូវបានរកឃើញថាមានអាការៈរោគប្រភេទទាំងអស់នេះ។ ក្រសួងសុខាភិបាលប្រទេសវៀតណាមបានបញ្ជូនបុគ្គលិកពេទ្យរបស់ខ្លួន ដើម្បីទប់ស្កាត់ និងស្រាវជ្រាវអំពីករណីមេរោគនេះនៅទីក្រុងហូជីមិញដែលបុរសអូស្ដ្រាលីរូបនេះបានស្នាក់នៅ។
អង្គការសុខភាពពិភពលោកកាលពីខែមុននេះបានរកឃើញថា ឡាវ ជាប្រទេសមួយក្នុងចំណោមប្រទេសចំនួន ៤១ ផ្សេងទៀតនៅលើពិភពលោក ដែលមានឆ្លងរាលដាលមេរោគ Zika នៅក្នុងដើមឆ្នាំ២០១៦ នេះ។ របាយការណ៍អង្គការសុខភាពពិភពលោកបង្ហាញថា នៅពេលថ្មីៗនេះ មានការឆ្លងមេរោគ Zika នៅប្រទេសឡាវដែលចម្លងតាមរយៈមូសខាំ ហើយវាអាចបង្កគ្រោះថ្នាក់ដល់ទារកនៅក្នុងផ្ទៃ។
តំបន់អាស៊ី គេមិនសូវឃើញមានមេរោគប្រភេទនេះ ចោទជាបញ្ហាធ្ងន់ធ្ងរទេ តែនៅអាមេរិកឡាទីន គឺមានរហូតដល់ការប្រកាសអាសន្នពីអង្គការសុខភាពពិភពលោក។ ប្រទេសប្រេស៊ីល ជាប្រទេសដែលបានប្រកាសអាសន្នមុនគេចំពោះមេរោគ Zika ដែលតាំងពីរាលដាលការឆ្លងមកមនុស្សប្រមាណ ១លាន ៥សែន ជួបបញ្ហាប្រឈម ហើយក្នុងនោះមាន ៦៤១ នាក់ បញ្ជាក់ថា មានការឆ្លង៕
ប្រភព៖ ChannelNewsAsia
