ប្រធានសមាគមប៊ិចកម្ពុជា លោកសាស្ត្រាចារ្យ ហេង ស្រ៊ាង បានចេញមុខមកអះអាងជាថ្មីថា វ៉ោយ ហូរ ដែលត្រូវបានមតិមួយចំនួនចោទប្រកាន់ថា ជាជនក្លែងបន្លំនោះគឺជា វ៉ោយ ហូរ ពិតប្រាកដ។ លោកបាននិយាយថា លោកជឿទៅលើការស្រាវជ្រាវ ដែលមានអ្នកជំនាញផ្នែកដូរតន្ត្រី អ្នកជំនាញផ្នែកសិល្បៈ និងមានអ្នកស្រាវជ្រាវផ្សេងទៀត ដែលបានទៅស្រាវជ្រាវដល់ទីតាំងផ្ទះលោក វ៉ោយ ហូរ ផ្ទាល់។
លោកថា អ្វីដែលសំខាន់ទៀតនោះ គឺលោកជឿលើសាក្សីរស់ និងសាច់ញាតិរបស់លោក វ៉ោយ ហូរ ដែលរស់នៅបាត់ដំបង។ ការអះអាងរបស់ប្រធានសមាគមប៊ិចកម្ពុជា បន្ទាប់ពីមានសុំឱ្យបំភ្លឺបន្ថែមទៀត ថាតើ វ៉ោយ ហូរ ពិតជាកវី វ៉ោយ ហូរ ពីសង្គមចាស់មែនឬទេ ព្រោះគេថា កវី វ៉ោយ ហូរ ស្លាប់ជំនាន់ប៉ុលពតហើយនោះ។
កវី វ៉ោយ ហូរ បានតាំងតែងបទចម្រៀងបានប្រហែលជា ៥០០ បទ ហើយគាត់ចាប់ផ្ដើមល្បី នៅទន្ទឹមនឹងអធិរាជសំឡេងមាស ស៊ីន ស៊ីសាមុត ក៍ចាប់ផ្ដើមល្បីដែរ។
ដើម្បីជ្រាបច្បាស់ថា តើសមាគមប៊ិចកម្ពុជា មានភស្តុតាងអ្វីខ្លះមកបញ្ជាក់ជាថ្មីនោះ សូមនាងកញ្ញា លោក លោកស្រី ស្តាប់បទសម្ភាសរវាង កញ្ញា ប៉ូ សាគុន ជាមួយ ប្រធានសមាគមប៊ិចកម្ពុជា លោកសាស្ត្រាចារ្យ ហេង ស្រ៊ាង ដូចតទៅ៖
