ភ្នំពេញ៖ ប្រជាពលរដ្ឋដែលរស់នៅក្នុងបុរីកីទ្បា បានធ្វើការផ្តុំគ្នានៅខាងមុខសាលារាជធានីភ្នំពេញ ព្រឹកថ្ងៃទី២៣ ខែមីនា នេះ ក្នុងគោលបំណងដើម្បីឱ្យសាលារាជធានីភ្នំពេញ ពន្លឿនក្នុងការដោះស្រាយទៅលើការវាយតម្លៃទ្រព្យសម្បត្តិរបស់ពួកគាត់ ដោយអះអាងថា ប្រជាពលរដ្ឋ ៣១ គ្រួសារ នៅមិនទាន់ទទួលបានការវាយតម្លៃពីសាលារាជធានីភ្នំពេញនៅទ្បើយ។
លោក ជួន សារ៉េត រាយការណ៍ពីព័ត៌មាននេះ ៖
តំណាងប្រជាពលរដ្ឋដែលរស់នៅក្នុងសហគមន៍បុរីកីទ្បាបាននាំគ្នាទ្បើងមកតវ៉ា និងដាក់ញត្តិ នៅសាលារាជធានីភ្នំពេញ ដោយអ្នកខ្លះមានកាន់បដាព្រោងព្រាត ស្នើឱ្យសាលារាជធានីពន្លឿនការវាយតម្លៃទ្រព្យសម្បត្តិរបស់ពួកគាត់។
តំណាងប្រជាពលរដ្ឋ ៣១ គ្រួសារដែលរស់នៅក្នុងបុរីកីទ្បា គឺអ្នកស្រី សោម សេដ្ឋា បានប្រាប់វិទ្យុស្ត្រីនៅថ្ងៃនេះថា អ្នកស្រីរស់នៅក្នុងសហគមន៍បុរីកីទ្បាតាំងពីឆ្នាំ ២០០៣ មកម្ល៉េះ ហើយអ្នកស្រីក៏មានឯកសារកាន់កាប់ស្របច្បាប់ផងដែរ។ អ្នកស្រី សោម សេដ្ឋា បញ្ជាក់ថា គោលបំណងសំខាន់ដែលអ្នកស្រីមកសាលារាជធានីភ្នំពេញនេះ គឺដើម្បីឱ្យសាលារាជធានី ពន្លឿនក្នុងការដោះស្រាយ និងវាយតម្លៃទៅលើទ្រព្យសម្បត្តិរបស់ពួកគាត់។ អ្នកស្រី អះអាងថា ប្រសិនបើសាលារាជធានីមិនព្រមផ្តល់ដំណោះស្រាយណាមួយទេនោះ ពលរដ្ឋនឹងនៅតែធ្វើការតវ៉ារហូតទាល់តែមានដំណោះស្រាយសមរម្យជូនពួកគាត់។
«ខ្ញុំមកជាលើកទី៣ ហើយ ដែលខ្ញុំមកដាក់ញត្តិ ដាក់អី គាត់សន្យាថាឱ្យខ្ញុំហ្នឹងមកជួប ដល់ពេលខ្ញុំមកជួបគាត់ថាពួកខណ្ឌថាអត់ទាន់ផ្ញើរឯកសារមកឱ្យ ដល់ពេលខ្ញុំទៅខណ្ឌ ខណ្ឌថាក្រុងច្បាស់ជាងខណ្ឌទៀត ឯកសារអស់ហ្នឹងអញ្ចឹងខ្ញុំមិនដឹងថាទៅសួរពីណាទៀត ឥឡូវខ្ញុំមកនេះដើម្បីធ្វើសន្និសីទកាសែត ដើម្បីឱ្យគាត់ដឹងថាពួកខ្ញុំនេះអត់ទាន់បានវាយតម្លៃ»។
ទាក់ទងនឹងរឿងនេះដែរ ពលរដ្ឋម្នាក់ក្នុងចំណោម ៣១ គ្រួសារដែលមិនទាន់ទទួលបានការវាយតម្លៃពីសាលារាជធានីភ្នំពេញនេះដែរ គឺអ្នកស្រី សុខ ស្រីអូន បានលើកឡើងថា គោលបំណងសំខាន់ដែលអ្នកស្រីយកញត្តិមកដាក់ឱ្យសាលារាជធានីភ្នំពេញនេះ គឺដើម្បីជំរុញឱ្យសាលារាជធានីធ្វើការដោះស្រាយជាបន្ទាន់ ចំពោះផលប៉ះពាល់ដីធ្លីរបស់អ្នកស្រីតាមរយៈការវាយតម្លៃទ្រព្យសម្បត្តិរបស់ពួកគាត់។
អ្នកស្រី សុខ ស្រីអូន បន្ថែមថា អ្នកស្រីនឹងនៅតែបន្តតវ៉ារហូតមានដំណោះស្រាយ៖ «នឹងធ្វើបន្តទៀតទាល់តែការមានដំណោះស្រាយតែខ្ញុំក៏អត់ទាន់និយាយដែរព្រោះថារាល់ថ្ងៃកំពុងតែរៀបគម្រោងហើយស្រេចហើយតែខ្ញុំសុំលាក់សិនអត់ទាន់និយាយទេ ខ្ញុំធ្វើទាល់តែបានជោគជ័យ..»។
យ៉ាងណាក៏ដោយ បញ្ហានេះពុំមានតំណាងសាលារាជធានីភ្នំពេញណាម្នាក់ ចេញមកទទួលយកញត្តិរបស់អ្នកតវ៉ានោះទ្បើយ។
ឆ្លើយតបនឹងបញ្ហានេះ អ្នកនាំពាក្យសាលារាជធានីភ្នំពេញលោក ទ្បុង ឌីម៉ង់ បានផ្តល់បទសម្ភាសខ្លីមួយ ជាមួយវិទ្យុស្ត្រីនៅថ្ងៃនេះថា លោកមិនទាន់អាចធ្វើការឆ្លើយតបទៅនឹងការលើកទ្បើងរបស់តំណាងពលរដ្ឋប្រមាណជា ៣១ គ្រួសារនោះបាននៅទ្បើយទេ ដោយលោកថា ទុកឱ្យក្រុមការងារធ្វើការពិចារណាជាមុនសិន៖ «ខ្ញុំមិនទាន់អាចឆ្លើយជូនបានទេពីករណីរបស់គាត់ហ្នឹងបាទ ខ្ញុំអត់ទាន់មានចម្លើយជូនទេ ទុកឱ្យក្រុមការងារគេយកបញ្ហាហ្នឹងយកទៅពិចារណាបើសិនខ្ញុំអាចឆ្លើយជូនតាមក្រោយបាទ»។
យោងតាមញត្តិរបស់ប្រជាពលរដ្ឋបុរីកីទ្បាបានឱ្យដឹងថា ពលរដ្ឋតវ៉ាដីធ្លីនៅសហគមន៍បុរីកីទ្បាប្រមាណជា ១៣០ គ្រួសារ ក្នុងចំណោម ១៥៤ គ្រួសារ បានវាយតម្លៃលក្ខណៈសម្បត្តិទៅតាមប្រភេទទ្រព្យសម្បត្តិរបស់ពួកគេ។ ក្នុងនោះអ្នកខ្លះទទួលបានថវិកា ៣០០០ $ (មិនផ្តល់ផ្ទះ) ខ្លះទៀតទទួលបាន ៥០០០ $ (មិនផ្តល់ផ្ទះ) ខ្លះទទួលបានផ្ទះទំហំ ៤,៧ម X និង ៣,៧ម នៅភូមិអណ្តូងជាយរាជធានីភ្នំពេញ និងមានពលរដ្ឋតែ ៣៦ គ្រួសារប៉ុណ្ណោះទទួលបានផ្ទះនៅបុរីកីទ្បា ហើយក្នុងនោះដែរ មានប្រជាពលរដ្ឋប្រមាណជា ១៥ គ្រួសារ មិនព្រមទទួលយកសំណងខាងលើ ដោយពួកគេអះអាងថា មានតម្លៃទាបពេកមិនអាចយកទៅទិញផ្ទះស្នាក់នៅបាន។ ដោយទ្បែកតំណាងប្រជាពលរដ្ឋប្រមាណជា ៣១ គ្រួសារអះអាងថាខ្លួនមិនទាន់មានឈ្មោះក្នុងបញ្ជី ១៥៤ គ្រួសារដែលសាលារាជធានីភ្នំពេញ បានធ្វើការវាយតម្លៃទ្រព្យសម្បត្តិរបស់ពួកគេ ដែលបានផ្តល់សំណងជូនពួកគេជាដើម។
