ព្រះវិហារ៖ អាជ្ញាធរជាតិព្រះវិហារ និងអាជ្ញាធរខេត្តព្រះវិហារ បានចេញសេចក្តីប្រកាសព័ត៌មានរួម ស្តីពីវិទ្យុអាស៊ីសេរី ដែលបានផ្សាយរឿងទំនាស់ដីធ្លីប្រជាពលរដ្ឋ ដែលធ្លាប់រស់នៅចំណុចស្វាយជ្រុំកាលពីថ្ងៃទី១៧ ខែមីនា ថា នឹងអាចវិលត្រឡប់មករស់នៅចំណុចស្វាយជ្រុំ ដែលស្ថិតនៅក្នុងតំបន់អភិរក្សប្រាសាទព្រះវិហារ គឺជារឿងប្រឌិតទាំងស្រុង។ នេះបើតាមលិខិតចុះថ្ងៃទី២២ ខែមីនា ឆ្នាំ២០១៦។
យោងតាមលិខិតលេខ ១១២ ស.ជ.ណ ចុះថ្ងៃទី២០ ខែមករា ឆ្នាំ២០១៦ របស់ឧបនាយករដ្ឋមន្ត្រី ស ខេង ស្តីពីសំណើសុំជួយរកដំណោះស្រាយឱ្យបានវិលត្រឡប់ទៅរស់នៅក្នុងភូមិស្វាយជ្រុំ ឬភូមិឬស្សី ឃុំកន្ទួត ស្រុកជាំក្សាន្ត ខេត្តព្រះវិហារវិញ គឺជានីតិវិធីបញ្ជូនសំណុំរឿងរបស់ក្រសួងមហាផ្ទៃ ទៅអាជ្ញាធរជាតិដោះស្រាយទំនាស់ដីធ្លី ពុំមែនជាការសម្រេចរបស់ក្រសួងមហាផ្ទៃឡើយ។
បើតាមលិខិតប្រកាសព័ត៌មានដដែល ប្រជាពលរដ្ឋដែលបានផ្ទេរពីតំបន់ស្វាយជ្រុំមករស់នៅក្នុងភូមិធម្មជាតិសម្តេចតេជោ ហ៊ុន សែន អាជ្ញាធរកសិកម្ម សម្រាប់កាតាំងលំនៅថ្មីនេះ មានហេដ្ឋារចនាសម្ព័ន្ធល្អប្រសើររួមមាន ផ្លូវថ្នល់ សាលារៀន មន្ទីរពេទ្យ វត្តអារាម សាលាបណ្តុះបណ្តាលវិជ្ជាជីវៈ ទំនប់ទឹក និងរចនាសម្ព័ន្ធជាច្រើនផ្សេងៗទៀត។
ទោះជាយ៉ាងណា តំណាងប្រជាពលរដ្ឋ ២៥០ គ្រួសារ លោក គិន ចន្ថា កំពុងមានជម្លោះដីធ្លីជាមួយអាជ្ញាធរខេត្តព្រះវិហារ បានប្រកាសជំហរនៅព្រឹកថ្ងៃពុធនេះ ថា លោក រួមទាំងប្រជាពលរដ្ឋដែលកំពុងរងគ្រោះនឹងទៅរស់នៅភូមិចាស់នោះវិញ ហើយនៅតែប្តេជ្ញាថា នឹងនៅតែទាមទារ ដំណោះស្រាយពីរដ្ឋាភិបាលភិបាលបន្តទៀត។
លោក គិន ចន្ថា បានឱ្យដឹងទៀតថា នៅថ្ងៃនេះដែរ អាជ្ញាខេត្តព្រះវិហារក៏មានបំណងចាប់ខ្លួនលោកដោយគ្មានមូលហេតុច្បាស់លាស់ផងដែរ។ ប៉ុន្តែបន្ទាប់ពីមានអន្តរាគមន៍ពីប្រជាពលរដ្ឋជួយការពារ ទើបលោកត្រូវបានដោះលែងមកវិញ។ លោកថា ថ្ងៃទី២៣ ខែមីនា នេះ ប្រជាពលរដ្ឋបានធ្វើដំណើរមកភ្នំពេញម្តងទៀត ដើម្បីសុំអន្តរាគមន៍ពីរដ្ឋាភិបាល៕
