ឥណ្ឌូនេស៊ី៖ ប្រទេសឥណ្ឌូនេស៊ីបានប្រកាសថាខ្លួនបានធ្វើការចោទប្រកាន់ជាផ្លូវការប្រឆាំងនឹងប្រទេសចិន ករណីទូកនេសាទរបស់ប្រទេសមហាអំណាចមួយនេះបានចូលដែនទឹករបស់ខ្លួន។
កាលពីថ្ងៃសៅរ៍ នាវាល្បាតមួយគ្រឿងរបស់ប្រទេសឥណ្ឌូនេស៊ីបានតាមរឹបអូសទូកនេសាទមួយគ្រឿងរបស់ចិនដែលបានចូលនេសាទខុសច្បាប់នៅឆកសមុទ្រណាទូណារបស់ប្រទេសនេះ។ ប៉ុន្ដែភ្លាមនោះត្រូវបានឃាឃាំងដោយនាវាល្បាតរបស់ប្រទេសចិន។ តែបែបនេះក្ដីបណ្ដាញផ្សាយព័ត៌មាន BBC បានរាយការណ៍ថានាវឹកចិន ៨ នាក់ត្រូវបានឃុំខ្លួន។
រដ្ឋមន្ដ្រីការបរទេសឥណ្ឌូនេស៊ី លោកស្រី Retno Marsudi និយាយថាឥណ្ឌូនេស៊ីបានដាក់ពាក្យតវ៉ាជាផ្លូវការទៅស្ថានទូតចិនកាលពីថ្ងៃចន្ទ ហើយការតវ៉ានេះនៅចំពោះមុខឯកអគ្គរដ្ខទូតចិនប្រចាំទីក្រុងចាកាតា។
លោកស្រីបានបញ្ជាក់ថា នាវានេសាទរបស់ចិនបានរំលោភលើដែនអធិបតេយ្យរបស់ឥណ្ឌូនេស៊ី។ ប៉ុន្ដែភារធារីស្ថានទូតចិននៅទីក្រុងចាកាតាបានទាមទារដោះលែងពលរដ្ឋចិននោះមកវិញដោយបាននិយាយថាវាជាឧបទ្ទវហេតុដែលមិនបានគិតទុកជាមុន។
នេះជាលើកដំបូងហើយ ដែលរយៈពេលមួយឆ្នាំចុងក្រោយនេះ ប្រទេសឥណ្ឌូនេស៊ីបានរឹបអូសទូកនេសាទរបស់ប្រទេសចិន។ កាលពីខែមុននេះឥណ្ឌូនេស៊ី បានកម្ទេចទូកនេសាទជាច្រើនគ្រឿងរបស់ប្រទេសជិតខាងដែលចូលលុកលុយដែនទឹករបស់ខ្លួន៕
ប្រភព៖ BBC
