ភ្នំពេញ៖ សហគមន៏រស់នៅអមផ្លូវរថភ្លើងបានឡើងមកប្រមូលផ្តុំគ្នាតវ៉ាជាថ្មីទៀត នៅមុខក្រសួងសាធារណការ និងដឹកជញ្ជូន នៅថ្ងៃទី២១ ខែមីនា ឆ្នាំ២០១៦ នេះ ដើម្បីឱ្យក្រសួងនេះ បើកវេទិកាសាធារណៈ ផ្តល់ព័ត៌មានលម្អិតស្តីពីគម្រោងអភវិឌ្ឍន៍ផ្លូវដែកល្បឿនលឿន ព្រោះពួកគេព្រួយបារម្ភថា ការអភិវឌ្ឍដោយមិនជូនដំណឹងដល់ជាមុន នឹងអាចបង្កឱ្យពួកគេរងផលប៉ះពាល់ពីគម្រោងអភិវឌ្ឍន៍មួយនេះ។ ក្រោយបន្តិច ក្រសួង បានឱ្យតំណាងពលរដ្ឋចូលជួប។
លម្អិតព័ត៌មានដោយលោក សាក់ សំណាង ៖
តំណាងពលរដ្ឋភូមិ ១៧ ក្នុងចំណោមសហគមន៍ទាំង ៨ គឺលោក នូ សារិន បានប្រាប់អ្នកសារព៌ត៌មាន ក្រោយពីចេញពីជំនួបជាមួយថ្នាក់ដឹកនាំក្រសួង ថាក្រសួងមានគោលជំហរជួយប្រជាពលរដ្ឋដែលរស់នៅអមផ្លូវរថភ្លើង ដោយមិនឱ្យទទួលរងការរំលោភបំពានពីខាងណាដូចពលរដ្ឋដែលរស់នៅតំបន់បឹងកក និងបុរីកីឡាឡើយ។
តំណាងពលរដ្ឋរូបនេះបានបន្តថា ក្រសួងសាធារណការនឹងដាក់លិខិតទៅសម្តេច ហ៊ុន សែន ដើម្បីស្នើសុំបើកវេទិការសាធារណៈជូនពលរដ្ឋឱ្យដឹងអំពីគម្រោងអភិវឌ្ឍន៍ផ្លូវដែកល្បឿនលឿនមួយនេះ។
ពលរដ្ឋ នូ សារិន ៖ «គាត់បានមានប្រសាសន៍ថាគាត់នឹងធ្វើនូវឯកសារណាមួយ ដើម្បីដាក់ជូនទៅសម្តេចអគ្គសេនាមហាតីតេជោ ហ៊ុន សែន ដើម្បីឱ្យគាត់ពិនិត្យ»។ តែបែបនេះក្ដីនេះ គ្រាន់តែជាអះអាងរបស់តំណាងសហគមន៍ប៉ុណ្ណោះ ចំណែកភាគីក្រសួង មិនបានចេញមកប្រាប់ជាសាធារណៈថាតើត្រូវរង់ចាំ សម្ដេច ហ៊ុន សែន ដល់ពេលណានោះទេ។
ចំណែកលោក សៀ ភារម្យ នាយកលេខាធិការដ្ឋានក្រុមការងារពិសេស សិទ្ឋិលំនៅដ្ឋានដែលតាមដានរឿងនេះសម្ដែងការត្រេកចំពោះការអាងថាមានដំណោះស្រាយជូនប្រជាពលរដ្ឋដែលរស់នៅអមផ្លូវរថភ្លើងដោយមិនឱ្យរងទុក្ខដូចអ្នកនៅតំបន់បឹងកក់ និងតំបន់បុរីកីឡាកន្លងទៅ។ តែលោកមានការសោកស្តាយ ការដែលក្រសួងមិនហាន បើកវេទិកាហើយ បែបជាសុំការអនុញ្ញាតពីសម្ដេចនាយករដ្ឋមន្ត្រី។
លោក សៀ ភារម្យ ៖ «ខ្ញុំមានការសោកស្តាយដែរ ចំពោះចំណាត់ការរបស់ក្រសួងយ៉ាងដូចច្នេះ គ្រាន់តែយើងធ្វើវេទិការសាធារណៈ ហើយបង្ហាញព័ត៌មាន គម្រោងមេនៃការអភិវឌ្ឍជូនទៅប្រជាពលរដ្ឋយើងអត់អាចធ្វើបានចាំទៅរវល់ដល់នាយករដ្ឋមន្ត្រី»។
សូមរំឭកថា តំណាងសហគមន៍ផ្លូវរថភ្លើងទាំង ៨ មានគ្នាប្រមាណ ១០០ នាក់ បានលើកគ្នាមកតវ៉ានៅមុខក្រសួងសាធារណការ និងដឹកជញ្ជូន ជាច្រើនលើកហើយ មកដល់ពេលនេះគឺជាលើកទី ៥ ដើម្បីឱ្យក្រសួងមួយនេះ បើកជាវេទិកាសាធារណៈផ្តល់ព័ត៌មានលម្អិតជុំវិញគម្រោងសាងសង់ផ្លូវល្បឿនលឿនដល់ប្រជាពលរដ្ឋ៕