ប្រធានាធិបតីអាមេរិក ប៉ារ៉ាក់ អូបាម៉ា ចាប់ផ្ដើមបើកទំព័រប្រវត្តិសាស្ដ្រជាលើកដំបូង ជាមួយនឹងអតីតគូសត្រូវនៃសង្គ្រាមត្រជាក់ ខណៈលោកបានទៅដល់ទីក្រុង Havana នៃប្រទេសគុយបា ដែលគេមើលឃើញថា ទស្សនកិច្ចរបស់លោកបើកផ្លូវឱ្យមានកម្លាំងវិនិយោគទុនអាមេរិកទៅកាន់ប្រទេសកុម្មុយនីសមួយនេះ។
សហរដ្ឋអាមេរិក និងគុយបា ដែលមានព្រំដែនទឹកជាប់គ្នា តែប្រទេសនេះបានផ្ដាច់ទំនាក់ទំនងការទូតជាមួយគ្នាចាប់តាំងពីឆ្នាំ១៩៦០ គឺនៅពេលដែលគុយបា បានក្លាយជារដ្ឋកុម្មុយនីស ហើយដឹកនាំដោយមេធ្វើរដ្ឋប្រហារគឺ អតីតប្រធានាធិបតី ហ្វីដេល កាស្ដ្រូ។
តាមសេចក្ដីរាយការណ៍របស់ទីភ្នាកងារសារព័ត៌មាន AFP លោក បារ៉ាក់ អូបាម៉ាមិនមានគម្រោងជួបអតីតមេកុម្មុយនីសមួយនេះទេ។ តែលោកត្រូវជួបជាជំនួបកំពូលជាមួយនឹងប្អូនរបស់គាត់ដែលឡើងស្នងតំណែងជំនួសគឺ លោក រ៉ាអ៊ូ កាស្ដ្រូ។
ក្នុងដំណើរទស្សនកិច្ចជាលើកដំបូងរបស់ប្រធានាធីបតីអាមេរិកនេះ ត្រូវបានអ្នកសង្កេតការណ៍មួយចំនួនមើលឃើញថាជាផលចំណេញផងដែររបស់សហរដ្ឋអាមេរិក ដែលធ្វើឱ្យមានទំនាក់ទំនងឡើងវិញជាមួយអតីតសត្រូវនៃសង្គ្រាមត្រជាក់នេះ។
អ្នកសង្កេតការណ៍មើលឃើញថាលោក អូបាម៉ា ព្យាយាមពង្រីកមិត្តភាពជាជាងពង្រីកសត្រូវ ហើយម្យ៉ាងទៀតទាញប្រទេសគុយបាឱ្យឃ្លាតឆ្ញាយពីអតីតមេដឹកនាំកុម្មុយនីស សហភាពសូវៀត ដែលបច្ចុប្បន្នគឺប្រទេសរុស្ស៊ី។
ទោះជាយ៉ាងនេះក្ដីលោក អូបាម៉ា ក៏មិនទទួលបានការសាទរច្រើនពីប្រជាជនអាមេរិកផងដែរ។ ក្រុមសាធារណរដ្ឋភាគច្រើនបានរិះគន់លោក ហើយពួកគេនៅតែប្រឆាំងមិនឱ្យមានការលើកលែងទណ្ឌកម្មលើប្រទេសគុយបាទាំងស្រុងនោះទេ។
បច្ចុប្បន្ននេះ គុយបានៅតែទទួលការដាក់ទណ្ឌកម្មពីសហរដ្ឋអាមេរិកនៅលើវិស័យមួយចំនួន។ ប្រជាជនគុយបា បានអបអរសាទរដោយពួកគេបានរាំច្រៀងបង្ហាញពីមោទនភាពចំពោះវត្តមានរបស់លោកអូបាម៉ា។
នេះជាលើកដំបូងហើយដែលប្រធានាធិបតីអាមេរិកមកពីគណបក្សប្រជាធិបតេយ្យ បានជាន់ទឹកដីប្រទេសគុយបា គឺកើតមានម្ដងរយៈពេលជាង ៥០ ឆ្នាំមកនេះ។ លោក អូបាម៉ា ដែលទៅធ្វើទស្សនកិច្ចនៅគុយបា អមដំណើរដោយរដ្ឋមន្ដ្រីរបស់លោក ជាពិសេសរដ្ឋមន្ដ្រីពាណិជ្ជកម្ម ប្រពន្ធ និងកូនស្រីទាំងពីរនាក់របស់លោកផងដែរ។ លោក អូបាម៉ា នឹងត្រឡប់មកប្រទេសវិញនៅថ្ងៃទី២២ មីនា៕
ប្រភព៖ BBC
