ភ្នំពេញ៖ សម្ដេចប្រមុខរដ្ឋាភិបាលកម្ពុជា បានវាយប្រហារទៅលើក្រុមអ្នកវិភាគ និងបក្សប្រឆាំង ដែលបានរិះគន់លោក ករណីរុះរើគណៈរដ្ឋមន្ត្រី ដែលពួកគេមនុស្សមុខដដែលៗ ហើយ សម្ដេច ជាសិទិ្ធរបស់សម្ដេច។
ថ្លែងក្នុងពីធីមួយនៅសណ្ឋាគារ សូហ្វីតែល ភ្នំពេញ នៅព្រឹកថ្ងៃនេះ សម្ដេច ហ៊ុន សែន បានមើលទៅខកចិត្តចំពោះអ្នកវិភាគ និងបក្សប្រឆាំងដែលរិះគន់ថា ការរុះរើតំណែងរដ្ឋមន្ត្រីមុខដដែលៗ។ សម្ដេចថែ្លងបែបចំអកថា៖ «សូម្បីអ្នកឯងវិភាគ ឬមេដឹកនាំបក្សប្រឆាំង មុខដដែលៗដែរនោះ តើគ្រាន់បើឯណាទៅ ចេះរិះគន់ គេកើត មិនមើលខ្លួនឯង»។
សម្ដេចក៏បាន អះអាងថា សម្ដេច ធ្វើនាយករដ្ឋមន្ត្រីព្រោះតែពលរដ្ឋបោះឆ្នោតគាំទ្រ។ តាមសេចក្ដីជូនដំណឹងរបស់រដ្ឋសភា សមាជិកសភា នឹងបើកកិច្ចប្រជុំ របស់ខ្លួននៅ ថ្ងៃទី៤ មេសា ខាងមុខនេះ ដើម្បីបោះឆ្នោតគាំទ្រការរុះរើគណៈរដ្ឋមន្ត្រីតាមសំណើរបស់ សម្ដេច ហ៊ុន សែន ដោយមានសមាសភាព រដ្ឋមន្ត្រី ៨ រូប និងរដ្ឋលេខាធិការជាង ១០ រូប តែក្នុងនោះ លោក ហោ ណាំហុង ត្រូវបាន បញ្ចប់មុខតំណែង រដ្ឋមន្ត្រីក្រសួងការបរទេស លោក គាត ឈុន បញ្ចប់មុខងារ ឧបនាយករដ្ឋមន្ត្រី និងលោក អ៊ឹម ឈុនលឹម បញ្ចប់មុខងារ រដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង៕
