ភ្នំពេញ៖ វេទិកានៃអង្គការមិនមែនរដ្ឋាភិបាលស្ដីពីកម្ពុជា ឬហៅកាត់ថា NGO Forum នឹងស្នើទៅប្រមុខរាជរដ្ឋាភិបាល សម្តេច ហ៊ុន សែន និងស្ថាប័នពាក់ព័ន្ធជួយពន្លឿនឱ្យបានឆាប់រហ័សក្នុងការដោះស្រាយបញ្ហាទំនាស់ដីធ្លីធំៗដ៏រ៉ាំរ៉ៃចំនួន ១៣ ករណី ដែលកំពុងកើតមាននៅកម្ពុជា ដើម្បីបញ្ចប់បញ្ហាទាំងនេះ និងលើកកម្ពស់ជីវភាពរស់នៅរបស់ពលរដ្ឋឱ្យបានប្រសើរឡើង។ នេះបើតាមការឱ្យដឹងពីលោក តឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាលស្តីពីកម្ពុជា ក្នុងសន្និសីទសារព័ត៌មាន នៅទីស្នាក់ការ NGO Forum នាព្រឹកថ្ងៃទី ១៨ ខែមីនា ឆ្នាំ ២០១៦ ។
ថ្លែងក្នុងសន្និសីទកាសែតពាក់ព័ន្ធនឹងវិវាទដីធ្លីដ៏រ៉ាំរ៉ៃក្នុងប្រទេសកម្ពុជា នាព្រឹកថ្ងៃទី ១៨ ខែមីនា កន្លងទៅ លោក តឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាលស្តីពីកម្ពុជា មានប្រសាសន៍ថា លោកសាទរចំណាត់ការរបស់រាជរដ្ឋាភិបាល ចំពោះការបង្ក្រាបបទល្មើសព្រៃឈើ ការធ្វើកំណែកទម្រង់ដីសម្បទានសេដ្ឋកិច្ច កំណែទម្រង់ក្រសួងដោយផ្ទាល់ការគ្រប់គ្រងលើដីសម្បទានសេដ្ឋកិច្ច និងព្រៃការពារអភិរក្សរវាងក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទ។
ទន្ទឹមគ្នានេះដែរ លោក តឹក វណ្ណារ៉ា នឹងស្នើសុំឱ្យរាជរដ្ឋាភិបាល និងអ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា សូមយកចិត្តទុកដាក់បន្ថែមទៀត ចំពោះការដោះស្រាយវិវាទដីធ្លីមានលក្ខណៈរ៉ាំរ៉ៃចំនួន ១៣ ករណីជាមួយប្រជាពលរដ្ឋនាពេលបច្ចុប្បន្ន។
ករណីទំនាស់ដីធ្លីទាំង ១៣ នោះ រួមមាន ករណីទំនាស់ដីធ្លីនៅ យូឌីជី និងជាយអារ៉ែងនៅខេត្តកោះកុង, ករណីដីធ្លីព្រះមេរុនៅខេត្តព្រះវិហារ, ករណីចក់ចារនិងពូគង់នៅខេត្តមណ្ឌលគិរី, ករណីថ្មដានៅខេត្តពោធិ៍សាត់, ករណីកោះរុងនៅខេត្តព្រះសីហនុ, ករណីស៊ីងបាយអូទិចនៅខេត្តក្រចេះ, ករណីប៊ូស្រានៅខេត្តមណ្ឌលគិរី, ករណីសេសានក្រោម២ នៅខេត្តស្ទឹងត្រែង, ករណីឡពាងនៅខេត្តកំពង់ឆ្នាំង, ករណីបឹងប្រាំនៅខេត្តបាត់ដំបង, ករណីក្រុមហ៊ុនហង់អញ យ៉ាកឡាយ នៅខេត្តរតនគិរី, ករណីក្រុមហ៊ុនស្ករអំពៅនៅខេត្តឧត្តរមានជ័យ ព្រះវិហារ កោះកុង និងករណីវិវាទដីធ្លីរវាងប្រជាពលរដ្ឋជនជាតិដើមភាគតិចភូមិចក់ចារ និងក្រុមហ៊ុនប៊ិញហ្វឿក ក្រចេះរ៉ាប់ប៊ឺ១ នៅភូមិចង់ចារ ឃុំស្រែឈូក ស្រុកកែវសីម៉ា ខេត្តមណ្ឌលគិរី។
នាយកប្រតិបត្តិវេទិកានៃអង្គការមិនមែនរដ្ឋាភិបាលស្តីពីកម្ពុជារូបនេះ បានបន្តថា បញ្ហាទំនាស់ដីធ្លី នៅតែជាបញ្ហាក្តៅគគុកក្នុងសង្គមដដែល ហើយករណីរ៉ាំរ៉ៃធំៗមួយចំនួននៅតែកើតមាន។ នៅថ្ងៃទី ២១ ខែមីនា ខាងមុខនេះ NGO Forum នឹងដាក់សំណើរបស់ខ្លួនជូនដល់រាជរដ្ឋាភិបាល និងស្ថាប័នពាក់ព័ន្ធ ជួយពន្លឿនក្នុងការដោះស្រាយករណីវិវាទដីធ្លីធ្ងន់ធ្ងរ ឲ្យបានឆាប់រហ័សបំផុត៕
