មីយ៉ាន់ម៉ា៖ លោកស្រី អ៊ុងសាន ស៊ូជី មេដឹកនាំគណបក្សឈ្នះឆ្នោតនៅក្នុងការបោះឆ្នោតកាលពីខែវិច្ឆិកា ឆ្នាំ២០១៥ បានថ្លែងអំណរគុណអ្នកគាំទ្ររបស់លោកស្រី ដែលធ្វើឱ្យមានការប្រែប្រួលនយោបាយវិជ្ជមាននៅក្នុងប្រទេស ខណៈលោកស្រីបានសម្ដែងក្ដីសង្ឈឹមចំពោះជំនួយការរបស់លោកស្រីឡើងកាន់តំណែងប្រធានាធិបតី។
លោកស្រី អ៊ុងសាន ស៊ូជី បានសម្ដែងមោទនភាពចំពោះជនរួមជាតិ និងអ្នកតំណាងរាស្ដ្រមកពីគណបក្សសម្ព័ន្ធជាតិប្រជាធិបតេយ្យរបស់លោកស្រី ដែលបានសម្ដែងឆន្ទៈរួបរួមគ្នាគាំទ្រលោក អ៊ូទីន ក្យូវ ឱ្យធ្វើជាប្រធានាធិបតី។
លោកស្រី បាននិយាយនៅក្នុងសេចក្ដីថ្លែងការណ៍ថា៖ «ខ្ញុំមិនដឹងថាថ្លែងអំណរគុណយ៉ាងម៉េចឱ្យសក្តិសមនឹងគុណបំណាច់របស់ប្រជាជនដែលបានគាំទ្រគណបក្សរបស់ខ្ញុំដោយអហិង្សា។ ខ្ញុំជឿថាតាមរយៈប្រធានាធិបតីថ្មីនេះ យើងនឹងអាចពុះពារបានរាល់ការប្រឈមទាំងឡាយដែលកើតមានចំពោះប្រទេសយើង»។
លោក អ៊ូទីន ក្យូវ ត្រូវបានគាំទ្រដោយសមាជិកសភាឱ្យធ្វើជាប្រធានាធិបតីនោះ កាលពីថ្ងៃម្សិលមិញលោកបានហៅលោកស្រី អ៊ុងសាន ស៊ូជី ថាជាបងស្រីហើយថាការតែងតាំងលោក គឺជាជ័យជម្នះរបស់បងស្រី អ៊ុងសាន ស៊ូជី។
លោកស្រី អ៊ុងសាន ស៊ូជី ដែលមានបំណងចង់ធ្វើប្រធានាធិបតីនោះ គឺលោកស្រីបានខកខានដោយសារតែរដ្ឋធម្មនុញ្ញរបស់ពួកយោធាភូមាឃាឃាំងលោកស្រី គឺពីព្រោះតែលោកស្រីមានប្ដីជនជាតិអង់គ្លេស និងកូនពីរនាក់របស់បុរសបរទេសនេះ។
តាមសារព័ត៌មានភូមា Mizima News មេដឹកនាំបរទេសមួយចំនួនចាប់ផ្ដើមអបអរសាទរប្រទេសភូមាដែលមានមេដឹកនាំថ្មីចេញពីការបោះឆ្នោត។ ប្រធានាធិបតីចិន ហ្ស៊ី ជីនភីង បានផ្ញើសារលិខិតអបអរសាទរមុនគេបង្អស់ជូនលោក អ៊ូទីន ក្យូវ។
នៅក្នុងសារលិខិតនេះលោក ហ្ស៊ី ជីនភីង បាននិយាយថា៖ «ខ្ញុំរីករាយដែលបានដឹងថាលោកត្រូវជ្រើសរើសឱ្យធ្វើជាប្រធានាធិបតីនៃសហភាពមីយ៉ាន់ម៉ា ហើយក្នុងន័យនេះខ្ញុំសូមសម្ដែងការសារទរយ៉ាងកក់ក្ដៅ និងជូនពរចំពោះលោក។ ខ្ញុំសង្ឈឹមថាប្រជាជនភូមានៅក្រោមការដឹកនាំរបស់លោកនឹងទទួលបានសមិទ្ធផលយ៉ាងធំធេង»។
លោក ហ្ស៊ី ជីនភីង ជាមេដឹកនាំប្រទេសមហាអំណាចធំមួយមានព្រំដែនជាប់ នឹងប្រទេសភូមាបានថ្លែងទៀតថា៖ «ទំនាក់ទំនងរវាងប្រទេសទាំងពីរជិតខាងនេះ គឺចាប់ពីពេលនេះតទៅ នឹងកាន់តែមានភាពប្រសើរនឹងជិតស្និទ្ធជាងមុន ហើយសហប្រតិបត្តិការនឹងនាំមកនូវផ្លែផ្កាដ៏មានសារៈសំខាន់»។
កាលពីសប្ដាហ៍មុនក្រសួងការបរទេសចិន បានចេញសេចក្ដីថ្លែងការណ៍ដោយជំរុញឱ្យរដ្ឋាភិបាលថ្មីនៅភូមាត្រូវកសាងសន្ដិភាពនៅតាមព្រំដែនជាមួយនឹងប្រទេសចិនដែលក្រុងប៉េកាំងហៅថាព្រំដែនសន្ដិភាពស្ថិរភាពយូរអង្វែង៕
ប្រភព៖ Mizima News
