ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានបង្ហើបព័ត៌មាន ថា អភិបាលខេត្តចំនួន ៤ ត្រូវបានតែងតាំងជាថ្មី ជំនួសអភិបាលខេត្តចាស់ដែលស្របពេល មានការបញ្ចេញឈ្មោះ រដ្ឋមន្ត្រីថ្មី ត្រូវកាន់តំណែង និងរដ្ឋមន្ត្រីមួយចំនួនបញ្ចប់មុខងារ។ ប្រសាសន៍របស់សម្ដេច ហ៊ុន សែន បានធ្វើឡើងនៅក្នុងកិច្ចប្រជុំគណៈរដ្ឋមន្ត្រី នៅព្រឹកថ្ងៃទី១៨ ខែមីនា ឆ្នាំ២០១៦នេះ ។ នេះបើយោងតាមការចុះផ្សាយរបស់គេហទំព័រមួយដែលចុះផ្សាយនៅព្រឹកនេះ។
អភិបាលខេត្តថ្មីទាំង ៤ រូបនេះ រួមមាន លោក វ៉ែន សំណាង ត្រូវបានតែងតាំងជាអភិបាលខេត្តកំពង់ស្ពឺ លោក ម៉ែន វិបុល ជាអភិបាលខេត្តស្វាយរៀង លោក សួន បវរ ជាអភិបាលខេត្តបន្ទាយមានជ័យ និងលោក ចាន់ ចេស្តា ជាអភិបាលកំពត។
សម្តេចថ្លែងទៀងថា អភិបាលខេត្តចាស់ទាំង ៤ រូប រួមមាន លោក គោ ស៊ុំ សារឿត អភិបាលខេត្តបន្ទាយមានជ័យចាស់ ត្រូវបានរដ្ឋាភិបាលតែងតាំងជា រដ្ឋលេខាធិការក្រសួងធនធានទឹក និងឧតុនិយម។
អភិបាលខេត្តស្វាយរៀងចាស់ លោក ជៀង អំ តែងតាំងជារដ្ឋលេខាធិការក្រសួងការពារជាតិ និងលោក ខូយ ឃុនហួរ អភិបាលខេត្តកំពតចាស់ ជារដ្ឋលេខាធិការទីស្តីការគណរដ្ឋមន្ត្រី ចំណែក លោក អ៊ូ សំអួន អភិបាលខេត្តកំពង់ស្ពឺចាស់ ឡើងជារដ្ឋលេខាធិការក្រសួងអភិវឌ្ឍន៍ជនបទ៕
