ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានព្រមានធ្ងន់ៗ ទៅកាន់សមាជិករបស់គណបក្សហ្វ៊ុនស៊ិនប៉ិច ដែលមានមុខតំណែងខ្ពស់ៗ នៅក្នុងជួររដ្ឋាភិបាលថា ប្រសិនបើហ៊ានទៅចូលរួមជាមួយ គណបក្សប្រឆាំង ឬ គណបក្សផ្សេងទៀត នឹងត្រូវបណ្តេញចេញភ្លាមៗ ពីតួនាទី។ ការថ្លែងរបស់សម្តេចនាយករដ្ឋមន្ត្រីបែបនេះ ធ្វើឡើងនៅក្នុងពិធីចែកសញ្ញាបត្រ ជូនដល់និស្សិតសាកលវិទ្យាល័យ ន័រតុន នាព្រឹកថ្ងៃទី ១៧ មីនានេះ។ ចំពោះការព្រមាននេះ អ្នកវិភាគនយោបាយយល់ថា គឺជាការជម្រុញឱ្យមន្ត្រីទាំងអស់នោះនៅតែរក្សាជំហរគាំទ្រគណបក្សហ្វ៊ុនស៊ិនប៉ិច និងគាំទ្ររដ្ឋាភិបាលដដែល។
សម្តេចនាយករដ្ឋមន្ត្រី ហ៊ុន សែន ថ្លែងផ្ញើសារព្រមានទៅសមាជិក សមាជិកា គណបក្សហ្វ៊ុនស៊ិនប៉ិចថា ប្រសិនបើហ៊ានចុះចូលគណបក្សប្រឆាំង លោកនឹងបណ្តេញចេញពីតួនាទីក្នុងរដ្ឋាភិបាល ត្រឹមតែរយៈពេល ២៤ ម៉ោងប៉ុណ្ណោះ ។
សម្តេចនាយករដ្ឋមន្ត្រីផ្ញើសារព្រមាននាពេលនេះ ទំនងដោយសារមើលឃើញថា គណបក្សហ្វ៊ុនស៊ិនប៉ិច បច្ចុប្បន្នកំពុងបែកបាក់សាមគ្គីរវាង សម្តេចក្រុមព្រះ នរោត្តម រណឬទ្ធិ និងលោក ញឹក ប៊ុនឆៃ។
សម្តេចនាយករដ្ឋមន្ត្រី ហ៊ុន សែន មានប្រសាសន៍យ៉ាងដូច្នេះថា « ឥឡូវនាយករដ្ឋមន្ត្រី នៃរដ្ឋាភិបាលនេះ បញ្ជាក់ជំហរថា បើទោះជាបុគ្គលនោះទៅតាមសម្តេចក្រុមព្រះ ឬទៅតាមលោក ញឹក ប៊ុនឆៃ គឺនៅរក្សាមុខតំណែងដដែល សុំតែប៉ុណ្ណេះទេ បើចូលបក្សប្រឆាំងដេញចោល ២៤ ម៉ោង »។
ចំពោះការព្រមានរបស់សម្តេច ហ៊ុន សែន នេះដែរ ធ្វើឡើងខណៈលោកកំពុងរៀបចំរុះរើគណៈរដ្ឋមន្ត្រីថ្មី ដើម្បីពង្រឹងប្រសិទ្ធភាពការងារ។ លោកមានប្រសាសន៍ថា «បើទោះបីជាបុគ្គលនោះទៅតាម សម្តេចក្រុមព្រះ ឬទៅតាម ញឹក ប៊ុនឆៃ គឺនៅរក្សាមុខដំណែងដដែល សូមសម្តេចក្រុមព្រះមេត្តាយោគយល់ ទួលបង្គំមិនអាចទៅតាមព្រះអង្គ ហើយធ្វើឱ្យឈ្នើសចិត្ត ចំពោះអ្នកដែលកំពុងបំពេញការងារជាមួយរាជរដ្ឋាភិបាល សុំទោសពីព្រោះនេះ ជាជម្លោះព្រះអង្គជាមួយកូនចៅ ហើយទៅបង្កើតបក្សផ្សេង ។ ហើយថាហេឥលូវមិនមែនហ៊ុនស៊ិនប៉ិចទៀត ត្រូវតែចេញពីរដ្ឋាភិបាល សុំតែប៉ុណ្ណេះទេ បើចូលបក្សប្រឆាំងដេញចេញ ២៤ ម៉ោង» ។
លោកនាយករដ្ឋមន្ត្រីក៏បានថ្លែងទៀតថា ចំពោះសមាជិក សមាជិកាគណបក្សហ្វ៊ុនស៊ិនប៉ិច ដែលរារែកចិត្តមិនដឹងថា ទៅតាមលោក ញឹក ប៊ុនឆៃ ឬតាមសម្តេចក្រុមព្រះនោះ លោកស្វាគមន៍ឱ្យពួកគេឲ្យមកជ្រកកោនជាមួយគណបក្សប្រជាជនកម្ពុជា ៖«ឥលូវបងប្អូនទាំងនោះគាត់អត់យល់ ជាថ្នាក់ទីប្រឹក្សារដ្ឋាភិបាល ជាថ្នាក់អនុរដ្ឋលេខាធិការតាមក្រសួង ឥលូវកំពុងតែព្រួយថាអញគួរនៅខាងណា? អញ្ចឹងទេ ប៉ុន្តែមានផ្លូវជ្រើសរើសតែពីរទេ…។
អ្នកនាំពាក្យគណបក្សហ្វ៊ុនស៊ិនប៉ិច លោក ញ៉េប ប៊ុនជិន និងលោក សាយ ហាក់ មិនអាចទាក់ទងសុំការឆ្លើយតបបានទេនៅថ្ងៃនេះ។
ទាក់ទិននឹងបញ្ហានេះ លោកសូ ចន្ថា សាស្ត្រាចារ្យវិទ្យាសាស្ត្រនយោបាយ យល់ថា ការព្រមាននេះ ដោយសារសម្តេចហ៊ុន សែន មិនចង់ឱ្យមន្ត្រីទាំងអស់នោះទៅទាក់ទង ឬ ចូលរួមជាមួយគណបក្សប្រឆាំង ហើយវាជាការជម្រុញឱ្យ មន្ត្រីទាំងអស់នោះ នៅតែរក្សាជំហរគាំទ្រ គណបក្សហ្វ៊ុនស៊ិនប៉ិច និងគាំទ្ររដ្ឋាភិបាលដដែល។ លោកបន្តថា ការព្រមានបែបនេះ គឺជាការបិទសិទ្ធសេរីភាពរបស់ពលរដ្ឋដែលមានចែងក្នុងរដ្ឋធម្មនុញ្ញស្តីពីសេរីភាពនៃជំនឿនយោបាយ។
«ក៏ប៉ុន្តែខ្ញុំគិតថា ការព្រមានបែបនេះ ហាក់បីដូចជា ពុំមានប្រសិទ្ធភាពតេសម្រាប់ ពេលបច្ចុប្បន្នមានប្រព័ន្ធទទួលព័ត៌មាន អ៊ីនធើណេត ឬប្រព័ន្ធផ្សព្វផ្សាយអីជាច្រើនទៀត»។
សូមបញ្ជាក់ថា ការថ្លែងព្រមានពីសម្តេចនាយករដ្ឋមន្ត្រីនេះ ទំនងសំដៅទៅបុគ្គលមួយចំនួន ដែលបច្ចុប្បន្នកំពុងបំរើការងារនៅក្នុងជួររដ្ឋាភិបាលមកពីគណបក្សហ្វ៊ុនស៊ិនប៉ិច ដែលគ្រោងដើរចូលគណបក្សប្រឆាំង៕
