ភ្នំពេញ៖ សម្តេច ហ៊ុន សែន នាយករដ្ឋមន្ត្រី បានអញ្ជើញជាអធិបតីក្នុងពិធីប្រគល់សញ្ញាបត្រថ្នាក់បរិញ្ញាបត្រ និងបរិញ្ញាបត្រជាន់ខ្ពស់ ដល់និស្សិតសាកលវិទ្យាល័យ ន័រតុន កាលពីព្រឹកថ្ងៃទី ១៧ ខែមីនា ឆ្នាំ ២០១៦ នេះ ។ នៅក្នុងការប្រគល់សញ្ញាបត្រនេះ សម្ដេចបាននិយាយពីសង្គមហ្វេសប៊ុក ដែលហ្វេសប៊ុករបស់សម្ដេចមានអ្នក Llikes ច្រើន ហើយមិនដូចគេថា ជួលឱ្យទិញ Likes នោះទេ ។ សម្ដេចមិននិយាយចំឈ្មោះបុគ្គលណាមួយទេ ។ ប៉ុន្តែថ្មីៗនេះ លោក សម រង្ស៊ី និយាយថា មានហ្វេសប៊ុកមេដឹកនាំខ្លះ អួតអាងថាមានចំនួនអ្នក Likes ច្រើន គឺជាតួលេខបំប៉ោងក្លែងក្លាយ និងមានជួលគេជួយ Likes ។ តួរលេខ Likes ហ្វេសប៊ុកសម្ដេច ហ៊ុន សែន គិតមកដល់ថ្ងៃនេះ មានជាង ៣លានពីរសែននាក់ ចំណែកលោក សម រង្ស៊ី មានជាង ២ លាន ពីរសែននាក់ ។ 
សម្ដេចនាយករដ្ឋមន្ត្រី ហ៊ុន សែន ថ្លែងថា អ្វីដែលចោទថាលោក ជួលប្រជាជនដែលក្រីក្រ ប្រទេសឥណ្ឌាឱ្យជួយបង្កើតគណនី ហ្វេសប៊ុក រួចជួយ Likes គឺអំពើឆ្កួតលីលា ហើយរឿងនេះ សម្ដេចមិនលេងចូលទេ។
ក្នុងពិធីនេះ សម្ដេចហ៊ុនសែនបាន ថ្លែងថា ប្រសិនសម្ដេចអាចទិញអ្នកលេងហ្វេសប៊ុកចុច Likes ពីប្រឥណ្ឌាបានពិតជាខ្លាំងមែន ហើយសម្ដេចក៏មានការរីករាយព្រោះប្រជាជននៅប្រទេសឥណ្ឌា និងប្រជាជនប្រទេសដទៃទទួលស្គាល់ថាជានាយករដ្ឋមន្ត្រីកម្ពុជា។
នៅត្រង់នេះសម្ដេចក៏បាន ចំអកថាការលេងហ្វេសប៊ុករបស់ អ្នកណានោះ គឺនៅចាញ់សម្ដេច ហើយហេតុអ្វីមិនព្រមទទួលស្គាល់ថាខ្លួនចាញ់ ។ សម្ដេច អះអាងថា សម្ដេចប្រើប្រាស់ហ្វេសប៊ុកមិនមែនប្រកួតប្រជែងនោះទេ គឺដើម្បីដោះស្រាយបញ្ហាហើយគេមិនត្រូវឆ្កួតរឿងនេះទេ គឺអ្នកឆ្កួតក៏ឆ្កួតតែឯងទៅសម្ដេចមិនង្វល់ឡើយ។
អ្វីដែលសម្ដេច ហ៊ុន សែន បានលើកឡើងថា បើទោះជាមិនសំដៅទៅលើ លោក សម រង្ស៊ី ក៏មិនមានអ្នកនយោបាយណា ក្រៅពីមេបក្សប្រឆាំងនេះដែរ ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ មានប្រសាសន៍ថា លោកមិនឆ្លើយនឹងរឿងឯកជនេះទេ ។
កាសែតភ្នំពេញប៉ុស្តិ៍ កាលពីសប្ដាហ៍មុន បានចុះផ្សាយដោយស្រង់សម្ដីរបស់អ្នកឯកទេសខាងហ្វេសប៊ុកម្នាក់មកចុះផ្សាយ មានករណីគណនីហ្វេសប៊ុក របស់សម្ដេចមានអ្នកចូល likes ច្រើន គឺនៅប្រទេសឥណ្ឌា ហ្វីលីពីន និងភូមា ។ ប៉ុន្តែអ្នកឯកទេសដែលមិនប្រាប់ឈ្មោះនេះអះអាងថា ហ្វេសប៊ុកសម្ដេច ហ៊ុន សែន ក៍មានគណនីក្លែងក្លាយដែរ ហើយចំនួន ពលរដ្ឋខ្មែរចូល Likes គឹតិចជាងហ្វេសប៊ុករបស់លោក សម រង្ស៊ី ៕
