របាយការណ៍ដែលបានធ្វើការសិក្សាស្រាវជ្រាវរបស់មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) អស់រយៈពេលមួយខែ បានរកឃើញថា ៥៣% នៃអ្នកសារព័ត៌មាន ១០០នាក់ ដែលត្រូវបានសម្ភាសន៍យល់ឃើញថា ស្ថាប័នព័ត៌មានរបស់ខ្លួនមិនទាន់មានភាពឯករាជ្យនៅឡើយទេ ដោយពួកគេបានលើកឡើងថា មានការជ្រៀតជ្រែកពីសំណាក់រដ្ឋាភិបាល រួមទាំងកម្មសិទ្ធិប្រមូលផ្តុំនៃប្រព័ន្ធផ្សព្វផ្សាយ ការដាក់សម្ពាធពីម្ចាស់ស្ថាប័ន ការគ្រប់គ្រងនិយ័តកម្ម និងការផ្តល់អាជ្ញាបណ្ណជាដើម។
លោក ប៉ា ងួនទៀង នាយកប្រតិបត្តិមជ្ឈមណ្ឌល កម្ពុជាដើម្បីប្រព័ន្ធផ្សព្វផ្សាយឯករាជ្យ មានប្រសាសន៍ថា នៅពេលដែលប្រព័ន្ធផ្សព្វផ្សាយមិនមានភាពឯករាជ្យពេញលេញ នឹងធ្វើឱ្យប៉ះពាល់ដល់ដំណើរការប្រព័ន្ធប្រជាបតេយ្យនៅកម្ពុជា ជាពិសេសខ្វះអភិបាលកិច្ចល្អនៅក្នុងនៅក្នុងគ្រប់គ្រង ដែលកត្តានេះ ធ្វើឱ្យកើតមានអំពើពុករលួយ បង្កើតនូវភាពអនាធិតេយ្យនៅក្នុងសង្គម និងធ្វើឱ្យបរាជ័យក្នុងគម្រោងអភិវឌ្ឍន៍ផ្សេងៗជាដើម។
លោកបន្តថា៖ «ជ្រៀតជ្រែកពីរដ្ឋាភិបាល វាមានប្រយោល និងមិនប្រយោល ។ ប្រយោលត្រង់ថាសព្វថ្ងៃនេះ យើងមើលបរិយាកាសនយោបាយ អីអញ្ចឹង គឺរដ្ឋាភិបាលតាមរយៈការផ្តល់អាជ្ញាបណ្ណវិទ្យុ ទូរទស្សន៍ហើយហ្នឹង និងតាមរយៈការផ្តល់អំណាចផ្សេង អញ្ចឹងអង្គភាពណាដែលអត់ស្តាប់តាមគាត់ អង្គភាពណារៀង ប៉ះទង្គិច ជាមួយគាត់ គាត់អាចមានសម្ពាធផ្សេងៗ»។
ឆ្លើយតបនឹងរបាយការណ៍ខាងលើនេះ លោក អ៊ុក គឹមសេង អ្នកនាំពាក្យក្រសួងព័ត៌មាន បានថ្លែងថា ក្រសួងមិនដែលដាក់សម្ពាធ ឬគាបសង្កត់ប្រព័ន្ធផ្សព្វផ្សាយណាមួយនោះទេ។ លោកបន្តថា នៅកម្ពុជាសព្វថ្ងៃនេះមានប្រព័ន្ធផ្សព្វផ្សាយចម្រុះដែលមាននិន្នាការផ្សេងៗគ្នា ដូច្នេះ ព័ត៌មានដែលពួកគេផលិតបាន មានទំនោរទៅខាងណា គឺជារឿងរបស់គេ។
លោកបញ្ជាក់ថាបន្ថែម៖ «ឥឡូវទៅធ្វើម៉េច ថាមិនឯករាជ្យរបៀបម៉េច អ្នកសារព័ត៌មានគ្រប់រូបគាត់គាត់ធ្វើការតាមវិជ្ជាជីវៈ ត្រង់ថាគាត់ផលិតព័ត៌មាន បង្ហាញពីអី អាហ្នឹងគឺជារឿង របស់គាត់កុំឱ្យតែខុសច្បាប់ស្តីពី របបសារព័ត៌មានអាហ្នឹងក្រសួងអាចទទួលយកបានហើយ»។
បើតាមរបាយការណ៍ស្រាវជ្រាវរបស់ CCIM បង្ហាញទៀតថា នៅឆ្នាំ២០១៥ អ្នកសារព័ត៌មាន ៥៨% រាយការណ៍ថាពួកគេមានអារម្មណ៍ភ័យខ្លាចនៅក្នុងការរាយការណ៍ព័ត៌មាន ដែលតួលេខនេះ មានការកើនឡើងចំនួន ១០.៧% នៃការកឃើញកាលពីឆ្នាំ២០១៤ កន្លងទៅ។
របាយការណ៍នៃការស្រាវជ្រាវនេះបន្តទៀតថា ២៥.៥% បានរងការវាយប្រហារ ដោយសារខ្លួន ជាអ្នកកាសែត។ ក្នុងនោះមានអ្នកសារព័ត៌មានម្នាក់ បានរាយការណ៍ថា ត្រូវបានគេបាញ់ពេលកំពុងរាយការណ៍ ពីការកាប់ឈើខុសច្បាប់ និងម្នាក់ទៀតបានប្រាប់ថា ត្រូវបានគេបោះគ្រាប់បែកចូលក្នុងផ្ទះ បន្ទាប់ពីបានរាយការណ៍ព័ត៌មានព័ត៌មានពីករណីស៊ើបអង្កេតមួយ និង ២៩.៤% បានរាយការណ៍ថា រងការគំរាមកំហែងក្នុងពេលធ្វើការ។
លើសពីនេះទៅទៀត ការសិក្សាស្រាវជ្រាវនេះ បានរកឃើញផងដែរថា អ្នកសារព័ត៌មាន ២៦.៦% បានលើកឡើងថាពួកគេ ធ្លាប់ទទួលរងនូវការគំរាមកំហែងដោយប្រើប្រាស់ប្រព័ន្ធតុលាការ ដែលនាំឱ្យអ្នកសារព័ត៌មាន មានការភ័យខ្លាច ក្នុងការរាយការណ៍ព័ត៌មាន ប្រកបដោយវិជ្ជាជីវៈ និងតម្លាភាព។ ក្នុងនោះមានប្រធានបទមួយចំនួន ដែលអ្នកសារព័ត៌មានខ្លាចរអាក្នុងការរាយការណ៍ ដូចជារឿងនយោបាយ ប្រព័ន្ធតុលាការ ការរំលោភដីធ្លី និងបញ្ហាព្រំដែនជាដើម។
ជាមួយនេះបញ្ហា ប្រាក់ខែទាប កង្វះការបណ្តុះបណ្តាល ឬអប់រំ និងវប្បធម៌ពុករលួយនៅកម្ពុជា ក៏ជាបញ្ហាមួយដែលអ្នកកាសែតខ្លួនឯងផ្ទាល់ មិនបានគោរពក្រមវិជ្ជាជីវៈផងដែរ ។
លោក ប៉ា ងួនទៀង បានថ្លែងថា បន្ទាប់ពីរបាយការណ៍ដែលបង្ហាញពីបញ្ហាប្រឈមរបស់វិស័យសារព័ត៌មាននៅកម្ពុជានេះ ត្រូវបានបង្ហាញជាសាធារណៈ នឹងធ្វើឱ្យសាធារណៈជន យល់ដឹងពីបញ្ហានេះ ហើយដាក់សម្ពាធទៅលើអង្គភាពសារព័ត៌មាន ដើម្បីធ្វើការកែសម្រួលផ្ទៃក្នុង និងគុណភាពព័ត៌មានដែលបានធ្វើការផ្សព្វផ្សាយ៕
