ក្រុមការងារយុវជន ”រីកសាយ” (Reek Sai) សហការជាមួយនឹងអង្គការសិល្បៈខ្មែរអមតៈ រៀបចំសនិ្នសីទកាសែត នៅថ្ងៃទី១៦ ខែមីនា ឆ្នាំ២០១៦ នេះ ដើម្បីបង្ហាញពីគោលបំណងនៃការរៀបចំកម្មវិធី « តាំងពិរព័រណ៌សា្នដៃ និងអនាគត លើកទី៤» ចាប់ពីថៃ្ងទី២៦ ដល់ថៃ្ងទី ២៧ ខែមីនា ខាងមុខនេះ នៅសាលសន្និសីទចតុមុខ។ ការរៀបចំកម្មវិធីនេះ ក្នុងគោលបំណងរំឭកដល់មរតកសិល្បៈពីបុរាណ ឱ្យក្មេងជំនាន់ក្រោយបានស្គាល់ និងចូលរួមអភិរក្ស។
លោក ឡោ វុឌ្ឍី ប្រធានក្រុមយុវជន “រីកសាយ” បានលើកឡើងថា បច្ចុប្បន្នយុវជនខ្មែរមួយចំនួនមិនសូវមានការចាប់អារម្មណ៍ ចំពោះទម្រង់សិល្បៈបុរាណខ្មែរនោះទេ។ លោកបានបន្តថាយុវជន ក៏មិនសូវយល់ដឹងច្រើនពីសិល្បៈខ្មែរផងដែរ។ លោក ឡោ វុឌ្ឍី រំពឹងកថា នៅក្នុង “កម្មវិធីតាំងពិរព័រណ៌ សា្នដៃ និងអនាគត លើកទី៤” ខាងមុខនេះ នឹងអាចរួមចំណែក ដល់យុវជនបានស្វែងយល់ និងសិក្សាពីសិល្បៈបុរាណខ្មែរនេះកាន់តែច្បាស់។
«នេះជាលើកទី៤ ហើយដែលក្រុមរីកសាយមានដើមកំណើតពីនិស្សិតក្នុងសាកលវិទ្យាលល័យ ភូមិន្ទវិចិត្រសិល្បៈដែលមានកំណើតតាំងពីឆ្នាំ ២០១៣ មក បានរៀបចំកម្មវិធីនេះឡើង ជារាងរាល់ឆ្នាំពួកយើងតែងតែរកអ្វីដែលថ្មី ដើម្បីឱ្យយុវជនចូលរួមទទួលបាន បទពិសោធ និង យល់ដឹងពីសិល្បៈបុរាណ ដោយសារមើលឃើញថាពួកគាត់មិនមានការចាប់អារម្មណ៍… ហើយយើងចង់ឱ្យគាត់ដឹងបានច្បាស់ពីសិល្បៈបុរាណខ្មែរ»។
សូមបញ្ជាក់ថា កម្មវិធីតាំងពិព័រណ៌សា្នដៃ និងអនាគត លើកទី៤ នៅថ្ងៃទី ២៦ មីនា ខាងមុខនេះ ក្រៅពីមានសម្តែងរបាំសិល្បៈបុរាណខ្មែរ ក្នុងកម្មវិធីក៏មានការតាំងបង្ហាញនូវផលិតផលខ្មែរ សម្លៀកបំពាក់បុរាណខ្មែរ និង ឧបករណ៍តន្ត្រីខ្មែរ ការលេងល្បែងប្រជាប្រិយខ្មែរ ទស្សនាការប្រគុំតន្ត្រី ដែលជាស្នាដៃកូនខ្មែរ និងមានការប្រកួតប្រជែងកម្មវិធីសិល្បៈផ្សេងទៀត នៅក្នុងបរិវេណសាលមហោស្រពចតុមុខ ចាប់ពីវេលាម៉ោង ៨ ព្រឹក ដល់ ម៉ោង ៨ យប់៕
