ភ្នំពេញ៖ តុលាការកំពូលនៅព្រឹកថ្ងៃពុធនេះ បានទម្លាក់ចោលបណ្ដឹងសារទុក្ខរបស់ស្ត្រីបឹងកក់ ដែលប្ដឹងជំទាស់សាលក្រមរបស់សាលាដំបូងរាជធានីភ្នំពេញដោយតម្កល់ទុកជាបានការ ករណីចោទពួកគាត់ពីបទចូលកាន់កាប់ដោយខុសច្បាប់អចលនវត្ថុរបស់និតិបុគ្គលសាធារណៈ។
មន្ត្រីអង្គការការពារសិទ្ធិមនុស្សឃ្លាំមើលសាលដីការរបស់តុលាការកំពូលនេះគឺជារឿងអយុត្តិធម៌សម្រាប់ស្ត្រីបឹងកក់។
លោក ធូ វិរៈ ជូនសេចក្ដីរាយការណ៍ ៖
សម្រែកទាមទារយុតិ្តធម៌របស់ស្រី្តបឹងកក់ បានធ្វើឡើងភ្លាមៗ នៅពេលពួកគាត់ដឹងថា តុលាការកំពូលមិនបានធ្វើតាមការចង់បានរបស់ពួកគាត់ ស្នើឱ្យទម្លាក់បទចោទ របស់សាលាដំបូងរាជធានីភ្នំពេញ ដែលចោទលើពួកគាត់ថា បានចូលកាន់កាប់ដោយខុសច្បាប់អចលនវត្ថុរបស់និតិបុគ្គលសាធារណៈ និងប្រឆាំងនឹងមន្ត្រីរាជការសាធារណៈនៅតំបន់បឹងកក់។
ក្រោយចេញពីស្តាប់ការប្រកាសសាលដីការ អ្នកស្រី ទេព វន្នីក្នុងចំណោមស្ត្រីទាំង ១៣ ដែលត្រូវបានសាលាដំបួងរាជធានីភ្នំពេញ កាត់ទោស ២ឆ្នាំកន្លះ បានសម្តែងការខកចិត្តយ៉ាងខ្លាំងចំពោះសេចក្ដីសម្រេចរបស់តុលាការកំពូលសម្រេចឱ្យស្ត្រីបឹងកក់ នៅតែជាប់ទោសដដែល។
អ្នកស្រី ទេព វន្នី បានរិះគន់ការសម្រេចរបស់តុលាការកំពូលថា ជាឈ្នាន់របស់អ្នកមានលុយ និងអ្នកមានអំណាច។ អ្នកស្រី ទេព វន្នី និយាយថា៖ «សម្រាប់ថ្ងៃនេះវិញជាភស្តុតាងយ៉ាងច្បាស់បានបង្ហាញថា តុលាការស្រុកខែ្មរ នៅតែបន្តធ្វើជាឈ្នាន់របស់មន្ត្រីមានអំណាច មន្ត្រីពុករលួយ និងជាឈ្នាន់បុគ្គលដែលមានលុយនៅប្រទេសកម្ពុជា»។
ចំណែកឯ លោក អំ សំអាត ប្រធានបច្ចេកទេសស៊ើបអង្កេតផ្នែកសិទ្ធិមនុស្សនៃអង្គការលីកាដូដែលបានឃ្លាំមើលនៅព្រឹកមិញនេះ មានប្រសាន៍ថា តុលាការគួរតែទម្លាក់ការចោទប្រកាន់ស្ត្រីបឹកកក់ទាំងនោះ ព្រោះពួកគេមិនបានប្រព្រឹត្តិដូចការចោទប្រកាន់ឡើយ។
លោកបន្តថា បទចោទរបស់សាលាដំបូងរាជធានីភ្នំពេញថា ស្ត្រីបឹងកក់បានកាន់កាប់ដោយខុសច្បាប់នូវអចលនវត្ថុរបស់និតិបុគ្គលសាធារណៈ គឺគ្រាន់តែជាលេស ដើម្បីចាប់ស្ត្រីបឹងកកដាក់ពន្ធធនាគារប៉ុណ្ណោះ។
លោក អំ សំអាត មានប្រសាសន៍ថា៖ «ការចាប់ហើយ ការចោទប្រកាន់ហើយ ប្រសិនបើតុលាការលើកឡែងការចោទទៅ បានន័យថាធ្វើបាក់មុខបាក់មាត់អាជ្ញាធរដែលចាប់អ្នកទាំងនោះបញ្ចូលទៅ ហើយតុលាការថ្នាក់ក្រោមកាត់ទោសហើយ»។
តែបែបនេះក្ដី វិទ្យុស្ត្រី FM 102 មិនអាចសុំការឆ្លើយតបពីតុលាការកំពូលបានទេ ដោយពុំមានលេខទូរស័ព្ទដើម្បីទាក់ទង។
កាលពីថ្ងៃទី២២ ខែឧសភា ឆ្នាំ២០១២ សាលក្រមតុលាការដំបូងបានចោទប្រកាន់ និងផ្តន្ទាទោស ស្ត្រីបឹងកក់ ១៣នាក់ ក្នុងនោះស្ត្រីម្នាក់ៗមានទោសចំនួន ២ឆ្នាំកន្លះ លើកលែងតែ អ្នកស្រី ងែត ឃុន ដែលមានទោស ១ឆ្នាំកន្លះ ក្រោមបទចោទដូចនេះ។ ប៉ុន្តែកាលនោះត្រូវសាលាឧទ្ធរណ៍កាត់តម្រឹមត្រឹម ១ខែ ៣ថ្ងៃវិញ ដោយដាក់ឱ្យស្ថិតក្រោមលក្ខខណ្ឌព្យួរទោសទើបអនុញ្ញាតឱ្យនៅក្រៅឃុំ ដោយតម្កល់សាលក្រមរបស់តុលាការជាន់ទាបនេះដដែល៕
