សាររបស់សម្ដេចហ៊ុនសែន ដែលបង្ហោះទាំងកណ្ដាលយប់ ថ្ងៃចន្ទម្សិលមិញ មានខ្លឹមសារដើមដូចនេះថា៖ «ជាការគួរឱ្យខកចិត្តខ្លាំងណាស់ ដែលតុលាការខេត្តកំពង់ស្ពឺ ចាប់តំណាងប្រជាជន២នាក់ ឃុំខ្លួន ដែលខ្ញុំទើបបានដឹងមុននេះបន្តិច។ ខ្ញុំបានបញ្ជាទៅអភិបាលខេត្តឱ្យធ្វើការជាមួយតុលាការទាំងយប់ ដើម្បីសុំធានាឱ្យនៅក្រៅឃុំ។ កូនប្រុសខ្ញុំ ២នាក់ ហ៊ុន ម៉ានិត និង ហ៊ុន ម៉ានី កំពុងធ្វើដំណើរទៅកាន់ខេត្តកំពង់ស្ពឺដើម្បីជួយប្រជាជនក្នុងរឿងនេះ។ សង្ឃឹមថា ព្រះរាជអាជ្ញានឹងអនុញ្ញាតឱ្យប្រជាជនទាំង ២នាក់ បាននៅក្រៅឃុំ។ ប្រសិនមិនទុកចិត្ត សុំអស់លោកឃុំកូនខ្ញុំទាំង ២នាក់ ជំនួសវិញចុះ»។
ដូចការរំពឹងទុកមែន សាលាដំបូងខេត្តកំពង់ស្ពឺបានសម្រេចដោះលែងស្ត្រីទាំងពីរនាក់ឱ្យនៅក្រៅឃុំគឺ ដោះលែងទាំងយប់ដោយ មិនឱ្យព្រះអាទិត្យរះទាន់ឡើយ។ ជុំវិញកិច្ចអន្តរាគមន៍របស់ប្រមុខរដ្ឋាភិបាលពេលនេះ អ្នកវិភាគព្រឹត្តិការណ៍សង្គម និងនយោបាយ មិនបានគាំទ្រចំៗចំពោះទឹកចិត្តនាយករដ្ឋមន្ត្រីដែលមានក្ដីមេតា្តករុណានេះទេ។ ពួកគាត់ បានលើកពីផលវិជ្ជមាន និងអវិជ្ជមាន។
លោក អ៊ូ វីរៈ នាយកប្រតិបតិ្តនៃអង្គការវេទិកាអនាគត និងជាអ្នកវិភាគព្រឹត្តិការណ៍នយោបាយមួយរូបយល់ឃើញថា បទបញ្ជារបស់សម្តេច ហ៊ុន សែន ពេលនេះ បានលូកដៃចូលកិច្ចការរបស់តុលាការ ដែលលោកយល់ថា ទង្វើនេះជាការពង្រឹងឥទ្ធិពលអំណាចនីតិប្រតិបត្តិក្នុងប្រព័ន្ធតុលាការ។ លោក អ៊ូ វីរៈ បន្តថា ការសើរើប្រព័ន្ធតុលាការដើម្បីធ្វើការកែទម្រង់ គឺជាវិធីសាស្ត្រល្អដែលលោកនាយកមន្ត្រីកម្ពុជាគួរត្រូវធ្វើ ជាជាងលូកដៃចូលទៅអន្តរាគមន៍ដូចករណីៗបែបនេះ។
លោក អ៊ូ វីរៈ ៖ «ការសើរើនៅប្រព័ន្ធតុលាការទាំងមូល គឺរឿងមួយល្អមែនទែន ហើយចាំបាច់មែនទែន ហើយប្រសិនបើលោក ហ៊ុន សែន គាត់ឃើញរឿងអយុត្តិធម៌គាត់ឈឺចាប់ គាត់គួរតែពង្រឹងប្រព័ន្ធតុលាការដើម្បីធ្វើម៉េចឱ្យដោះស្រាយសម្រាប់ករណីផ្សេងទៀត ដែលប្រជាពលរដ្ឋកំពុងប្រឈមនូវអំពើអយុត្តិធម៌នៅទាំងប្រទេសតែម្តង។
ចំណែកលោក រស់ រ៉ាវុធ អ្នកវិភាគព្រឹត្តិការណ៍សង្គមយល់ដាច់ថា ការបញ្ជារបស់សម្តេច ហ៊ុន សែន នេះគឺមិនមែនជាការលូកដៃចូលក្នុងកិច្ចរបស់តុលាការនោះទេ។ លោកថាចំណាររបស់សម្ដេចនៅលើទំព័រហ្វេសប៊ុក ក៏អាចចាត់ទុកថាជាលិខិតអន្តរាគមនន៍មួយផងដែរ ដែលអ្នកនយោបាយសម័យបច្ចុប្បន្នបានយកប្រើ ដើម្បីពន្លឿនប្រសិទ្ធភាពការងារជូនប្រជាពលរដ្ឋឱ្យបានឆាប់រហ័ស។ តែយ៉ាងណាលោកបណ្ឌិត រស់ រ៉ាវុធ បន្តថា ការចេញមុខធ្វើកិច្ចអន្តរាគមន៍របស់ប្រមុខរដ្ឋាភិបាលពេលនេះ ហាក់ឆ្លុះបញ្ចាំងឱ្យឃើញថា ប្រព័ន្ធតុលាការនៅកម្ពុជាភាពទន់ខ្សោយនៅឡើយ។
លោក រស់ រ៉ាវុធ៖ «អញ្ចឹងកន្លែងហ្នឹង! បញ្ជាក់ពីប្រព័ន្ធតុលាការនៅមានភាពទន់ខ្សោយនៅឡើយ ដែលនាំឱ្យមានការអន្តរាគមន៍ពីសម្តេចនាយករដ្ឋមន្ត្រី។ តុលាការមិនទាន់មានឯករាជ្យភាព មិនទាន់មានការស៊ើបអង្កេតច្បាស់លាស់មុននឹងការអនុវត្ត ហើយការឃាត់ខ្លួនហ្នឹងគឺជាការខុសឆ្គងមួយធ្ងន់ណាស់ក្នុងប្រព័ន្ធតុលាការកម្ពុជា។
តែបែបនេះក្ដីលោក ផៃ ស៊ីផាន អ្នកនាំពាក្យទីស្តីការគណរដ្ឋមន្ត្រីលើកឡើងថា ការចេញបញ្ជារបស់សម្ដេចនាយករដ្ឋមន្ត្រីសុំធានាឱ្យពលរដ្ឋទាំងពីររូបនៅក្រៅឃុំ គឺមិនមែនជាការបង្គាប់ឱ្យតុលាការឈប់ធ្វើការវិនិច្ឆ័យនោះទេ ព្រោះដំណើរការរឿងនេះគឺស្ថិតនៅក្នុងសមត្ថកិច្ចរបស់តុលាការដដែល។
អ្នកនាំពាក្យឱ្យរដ្ឋាភិបាលរូបនេះបន្តថា ការចេញបញ្ជាពីប្រមុខដឹកនាំរដ្ឋាភិបាលបែបនេះ ក៏ព្រោះតែកម្ពុជាកំពុងស្ថិតក្នុងបរិបទកំណែប្រព័ន្ធយុត្តិធម៌ ដែលរដ្ឋាភិបាលកំពុងដំណើរការកែទម្រង់បណ្តើរ និងដោះស្រាយផងប្រយោជន៍ជូនប្រជាពលរដ្ឋជាបណ្តើរ។
លោក ផៃ ស៊ីផាន៖ «យើងកំពុងស្ថិតក្នុងកំណែទម្រង់ប្រព័ន្ធយុត្តិធម៌។ យើងធ្វើការបណ្តើរ កែទម្រង់ផង យើងដោះស្រាយបញ្ហាផលប្រយោជន៍របស់ប្រជាពលរដ្ឋផង ហើយសម្តេចលោកគោរពរឿងតុលាការដែលគេមានឆន្ទានុសិទ្ធិ ហើយដែលគេមានឥទ្ធិពលឯករាជ្យដែលគ្មានស្ថាប័នណាលូកចូលក្នុងសាច់រឿងនោះទេ»។
មិនមែនមានតែរឿងនេះមួយទេ ដែលមជ្ឈដ្ឋានមួយចំនួន មើលឃើញ ប្រមុខរដ្ឋាភិបាល ប្រើប្រាស់អំណាច លើ ប្រព័ន្ធតុលាការ គឺមានករណីច្រើនទៀត មានទាំងករណីរឿងនយោបាយផងដែរ។ តែដោយឡែក ករណីរបស់ស្ត្រី ២នាក់ នៅស្រុកភ្នំស្រួច ខេត្តកំពង់ស្ពឺ គឺជាលើកដំបូង ដែលប្រមុខរដ្ឋាភិបាលប្រើអំណាចដោយផ្ទាល់តាមរយៈកូនប្រុសរបស់សម្ដេចឱ្យមានដំណោះស្រាយដូចនេះ។ តែបើតាមរបាយការណ៍របស់អង្គការសិទ្ធិមនុស្ស នៅមានពលរដ្ឋខ្មែរជាច្រើនទៀតកំពុងជាប់ឃុំខ្លួន ដោយសារជម្លោះដីធ្លីនៅកម្ពុជា៕
