ស្ត្រីពីរនាក់ដែលតុលាការខេត្តកំពង់ស្ពឺឃុំខ្លួនក្នុងរឿងទំនាស់ដីធ្លីស្ថិតនៅភូមិថ្មី ឃុំតាំងសំរោង ស្រុកភ្នំស្រួច ត្រូវបានដោះលែងកាលពីកណ្តាលអាធ្រាត្រថ្ងៃទី១៤ ខែមីនា ឆ្នាំ២០១៦ បន្ទាប់ពីសម្តេច ហ៊ុន សែន បញ្ជាទៅអភិបាលខេត្តឱ្យធ្វើការជាមួយតុលាការទាំងយប់ ដើម្បីសុំធានាឱ្យនៅក្រៅឃុំ និងបញ្ជារឱ្យកូនប្រុសទាំងពីរធ្វើដំណើរទៅកាន់ខេត្តកំពង់ស្ពឺ ដើម្បីដោះលែងទាំងពីររូបនេះ។ តែបែបនេះក្ដី ស្ត្រីដែលត្រូវបានដោះលែងនេះ នៅតែសន្យាតស៊ូប្រឆាំងការរំលោភបំពានដីធ្លីសហគមន៍របស់ពួកគាត់។
រាយការណ៍ព័ត៌មានដោយលោក សាក់ សំណាង ៖
អ្នកស្រី យូ រ៉ន ដែលទើបតែចេញពីក្រៅឃុំនៅព្រឹកនេះ បានបញ្ជាក់ពីគោលជំហររបស់ខ្លូនថា នឹងនៅតែមានការតស៊ូមតិការពារដីធ្លីសហគមនរបស់អ្នកស្រីដដែល បើទោះបីជាមានការមានដោះលែងអ្នកស្រី និងតំណាងសហគមន៍ម្នាក់ទៀតឱ្យនៅក្រៅឃុំក៏ដោយ។
នៅក្នុងបទសម្ភាសជាមួយវិទ្យុស្ត្រី FM102 អ្នកស្រី អ្នកស្រី យូ រ៉ន បានបញ្ជាក់ថា អ្នកស្រីនិង សហគមន៍របស់អ្នកស្រី មិនទាន់ បញ្ចប់ការតស៊ូ នេះទេ។ អ្នកស្រី យ៉ូ រ៉ន ៖ «ខ្ញុំនៅតែការពារទៀតចឹងបានប្រជាពលរដ្ឋខ្ញុំសួរថាអើ ឯកឧត្តមកុំទាន់អាលឱ្យគ្រឿងចក្រចូលកុំឈូសឆាយសិន ចាំការរងចាំសិនបើសិនភាគីម្ខាំងនៅតែយកគ្រឿងចក្រចូលដដែលខ្ញុំនឹងទៅឃាតដដែលការពារទឹកដីខ្ញុំ»។
តែជាមួយគ្នាអ្នកស្រីសង្ឃឹមថាសហគមន៍របស់អ្នកស្រីនឹងទទួលបានដីធ្លីមកវិញ៖ «បើតាមគាត់មានប្រសាសន៍ដូចមានសង្ឃឹមច្រើនដែរ គាត់ថាចាំមើលគេចុះគោរាងប៉ុស្តិ៍ដែរ ស្រាវជ្រាវសិន ដូចជាសង្ឃឹមដែរព្រោះអីខ្ញុំជាកូនស្រុកកូនភូមិរស់នៅនេះពិតប្រាកដ»។
ពលរដ្ឋមានទំនាស់ដីធ្លីមា្នក់ទៀតដែលរស់នៅស្រុកភ្នំស្រួច លោក ជន មឿន បានឱ្យដឹងថា ប្រជាពលរដ្ឋប្រមាណ ១៦៥ គ្រួសារ កំពុងមានទំនាស់ដីធ្លីដែលជាកន្លែងពួកគាត់រស់នៅ ហើយក៏កំពុងទទូចឱ្យសម្តេចជួយដោះស្រាយរឿងទំនាស់ដីធ្លីនេះឱ្យបានឆាប់រហ័ស។
លោកបានបន្តទៀតថា ទោះបីជាមានការដោះលែងអ្នកជាប់ឃុំឃាំងរឿងទំនាស់ដីធ្លីក៏ដោយ បើនៅតែគ្មានដំដោះស្រាយសមរម្យសម្រាប់ពលរដ្ឋទេនោះ ពួកគាត់នឹងនៅតែមានការតវ៉ាតទៅទៀតរហូតទទួលបានយុតិធម៌៖ «បើសិនសម្តេចមកដោះស្រាយអារឿងទឹកដីហ្នឹង ឱ្យជូនប្រជាពលរដ្ឋហ្នឹងគ្រប់ចំនួនប្រជាពលរដ្ឋលែងតវ៉ា»។
ទន្ទឹមគ្នានោះដែរ លោក អុង សុមិទ្ឋិ មន្ត្រីអង្គការលីកាដូប្រចាំខេត្តកំពង់ស្ពឺ មានប្រសាសន៍ថា ការដោះលែងស្រី្តពីររូបឱ្យនៅក្រៅឃុំនៅថ្ងៃនេះ គឺជារឿងត្រឹមត្រូវបំផុត។ លោកបានបន្តថា ប្រជាពលរដ្ឋមានសិទ្ធិតវ៉ាចំពោះករណីដែលពួកគាត់ថា មិនសមរម្យនឹងមិនមានយុត្តិធម៌ ក្នុងការគ្រប់គ្រងកម្មសិទ្ធិដីសហគមន៍។
«ការកំណត់កម្មសិទ្ធិហ្នឹង ដូចមិនទាន់បានដាច់ស្រេចប៉ិតខាងណាខាងណី ដោយសារតុលាការអាងលើកម្មសិទ្ធិម្យ៉ាង ខាងភាគីម្ខាំងមានកម្មសិទ្ធិ ក៏ប៉ុន្តែមិនបានថាតើកម្មសិទ្ធិហ្នឹងបានមកពីណាពីព្រោះថានៅពេលគេធ្វើកម្មសិទ្ធិហ្នឹងក៏ប្រជាពលរដ្ឋក៏ប្រឆាំងហ្នឹងរឿងនឹងដែរ»។
សូមបញ្ជាក់ថា តំណាងប្រជាពលរដ្ឋទំនាស់ដីធ្លីពីរនាក់ ត្រូវបានតុលាការខេត្តកំពង់ស្ពឺ ចាប់ខ្លួននៅថ្ងៃទី១១ ខែមីនា ឆ្នាំ២០១៦ ក្រោយពេលធ្វើការតវ៉ាក្នុងទំនាស់ដីធ្លី ស្ថិតនៅភូមិថ្មី ឃុំតាំងសំរោង ស្រុកភ្នំស្រួច ខេត្តកំពង់ស្ពឺ។ មុននឹងស្ត្រីពីររូបនេះ ត្រូវបានដោះលែង គឺសហគមន៍បានឡើងមកតវ៉ាដាក់ញ្ញតិនៅស្ថាប័នរដ្ឋ និង សម្ដេចនាយករដ្ឋមន្ត្រី ហ៊ុន សែន ជាច្រើនថ្ងៃជាប់ៗគ្នា៕
