ស្ត្រី២នាក់ ដែលត្រូវតុលាការបង្គាប់ឱ្យសមត្ថកិច្ចស្រុកភ្នំស្រួចចាប់ខ្លួន ត្រូវបានដោះលែង កាលពីយប់ថ្ងៃចន្ទ តាមការបញ្ជារបស់នាយករដ្ឋមន្ត្រី ដោយពួកគេទទួលបាន ប្រាក់ឧបត្ថម្ភម្នាក់ៗ ៣០០ ដុល្លារពីកូនសម្តេច ហ៊ុន សែន ដែលបានប្រាប់ទៅតុលាការដោះលែង។
អ្នកស្ត្រី យូ រ៉ន ដែលតុលាការសម្រេចដោះលែងឱ្យនៅក្រៅឃុំកាលពីយប់ថ្ងៃចន្ទបានប្រាប់វិទ្យុស្ត្រីថា អ្នកស្រីត្រូវបានកូនសម្តេច ហ៊ុន សែន គឺលោក ហ៊ុន ម៉ានិត និងលោក ហ៊ុន ម៉ានី ធ្វើដំណើរទៅកាន់តុលាការខេត្តកំពង់ស្ពឺ ដើម្បីដោះលែងអ្នកស្រី និងតំណាងសហគមន៍ម្នាក់ទៀត។ អ្នកស្រីនិយាយថា៖ «កូនសម្តេចដែលមកដោះលែងខ្ញុំពីពន្ធធនាគារ សម្តេចឱ្យជូនខ្ញុំ យូ រ៉ន ៣០០ ដុល្លារ ហើយជូន អ៊ិត រុំ ៣០០ ដុល្លារ»។
ការដោះលែងពលរដ្ឋពីរនាក់នេះ បន្ទាប់ពីពលរដ្ឋប្រហែលជា ៤០នាក់ តំណាងឱ្យ ១៦៥ គ្រួសារបាននាំគ្នាដាក់ញត្តិទៅរដ្ឋសភាដើម្បីទាមទារឱ្យដោះលែងតំណាងរបស់ខ្លួន គឺអ្នកស្រី យូ រ៉ន និង អ៊ិត រំ ដែលត្រូវបានចាប់ខ្លួនកាលពីថ្ងៃទី១១ ខែមីនា ក្នុងរឿងទំនាស់ដីធ្លីជាមួយអ្នកមានអំណាចនៅភូមិថ្មី ឃុំតាំងសំរោង ស្រុកភ្នំស្រួច ខេត្តកំពង់ស្ពឺ៕
