ភូមា៖ ប្រទេសភូមាទើបតែមានប្រធានាធិបតីចំនួន ៩ នាក់ប៉ុណ្ណោះ ចាប់តាំងពីប្រទេសនេះបានដណ្ដើមឯករាជ្យពីអាណានិគមអង់គ្លេសនៅឆ្នាំ១៩៤៨ ហើយប្រធានាធិបតីថ្មីរបស់ប្រទេសនេះគឺមកពីគណបក្សប្រឆាំងដែលអ្នកវិភាគ ផ្ដល់អនុសាសន៍ថា គួរជ្រើសតាំងលោកស្រី អ៊ុងសាន ស៊ូជី ធ្វើជានាយករដ្ឋមន្ត្រី។ លោកប្រធានាធិបតី U Htin Kyaw អាយុ ៦៩ ឆ្នាំ គឺជាមនុស្សស្និទ្ធបំផុតរបស់មេបក្សប្រឆាំងលោកស្រី អ៊ុងសាន ស៊ូជី ។
លោកទទួលបានការតែងតាំងជាប្រធានាធិបតីភូមានៅពេលដែលលោកស្រី អ៊ុងសាន ស៊ូជី ត្រូវបានរដ្ឋធម្មនុញ្ញអតីតរបបយោធាហាមលោកស្រីធ្វើជាប្រធានាធិបតី។ អ្នកវិភាគមើលឃើញថាប្រធានាធិបតីថ្មីរូបនេះ គឺជាមនុស្សតែមួយគត់ដែលលោកស្រី អ៊ុងសាន ស៊ូជី មានទំនុកចិត្តខ្លាំងជាងគេដើម្បីដឹកនាំប្រទេស។
អ្នកវិភាគម្នាក់ គឺលោក ឌឺរេក តុនគីន (Derek Tonkin ) អតីតអ្នកការទូតប្រទេសអង់គ្លេស នៅប្រទេសថៃ និងវៀតណាម មើលឃើញថាលោកស្រី អ៊ុងសាន ស៊ូជី គឺដូចប្រធានគណបក្សសមាជជាតិនៃប្រទេសឥណ្ឌា គឺលោកស្រី ហ្ស៊ីញ៉ា ហ្គានធី ជាប្រធានគណបក្សសមាជជាតិ។
លោកថាលោកស្រី ហ្ស៊ីញ៉ា ហ្គានធី មិនបានកាន់តំណែងប្រធានាធិបតីទេ តែលោកស្រីបានតែងតាំងបណ្ឌិត Manmohan Singh ធ្វើជានាយករដ្ឋមន្ដ្រី។ប៉ុន្ដែលោកថាសម្រាប់លោក ថាក់ស៊ីន ស៊ីណាវ៉ាតត្រា គឺមិនដូច្នេះទេ លោកជាប្រធានគណបក្សស្រមោលនៃគណបក្សរបស់លោកស្រី យីងឡាក់ ស៊ីណាវ៉ាតត្រា។
ក្នុងបទសម្ភាសជាមួយកាសែតភូមា Irrawaddy លោក ឌឺរេក តុនគីន ផ្ដល់អនុសាសន៍ថាលោកស្រី អ៊ុងសាន ស៊ូជី គួរតែទទួលបានឋានៈមួយចំពោះ កិត្តិយសរបស់លោកស្រី គឺនាយករដ្ឋមន្ដ្រី។
អ្នកវិភាគរូបនេះពន្យល់ថារដ្ឋធម្មនុញ្ញភូមាមិនបានចែងអំពីនាយករដ្ឋមន្ដ្រីពិតមែនតែប្រធានាធិបតីថ្មីដែលលោកស្រី អ៊ុងសាន ស៊ូជី លើកបន្តុបមានសិទ្ធិអំណាចតែងតាំងបែបនេះ។
អ្នកវិភាគម្នាក់ទៀត Naing Ko Ko ជានិស្សិតរៀនថ្នាក់បណ្ឌិត នៅសាកលវិទ្យាល័យ ជាតិអូស្ត្រាលី ពិនិត្យឃើញថា អាទិភាពដំបូង គឺគណបក្សកាន់អំណាចរបស់លោកស្រី អ៊ុងសាន ស៊ូជី ត្រូវពិនិត្យមើលលទ្ធភាពនៃការកែប្រែរដ្ឋធម្មនុញ្ញឆ្នាំ ២០០៨ ដែលរៀបរៀងដោយពួកយោធា ប៉ុន្តែលោកត្រូវធានាថា ត្រូវទុកអាសនៈសម្រាប់ពួកយោធាឱ្យនៅដដែល គឺកែប្រែតែមាត្រាដែលហាមលោកស្រី ឈរតំណែងប្រធានាធិបតី ។ តែនៅពេលនេះ លោកថា ត្រូវគិតពីកម្លាំងសាមគ្គីជាតិ ឱ្យបានរឹងមាំជាមុនសិន ។ អ្នកវិភាគ Naing Ko Ko ក៏មានទស្សនៈ ប្រហាក់ប្រហែល លោក ឌឺរេក តុនគីន ចំពោះ ការលើកតម្កើងកិត្តិយសរបស់លោកស្រី អ៊ុងសាន ស៊ូជី មានឋានៈខ្ពង់ខ្ពស់ ស័ក្តិជាវីរជនរបស់ជាតិភូមា។
លោកស្រី អ៊ុងសាន ស៊ូជី ជាជើងឯកប្រជាធិបតេយ្យតែមួយគត់នៃប្រទេសភូមា លោកស្រីបានប្រាប់ជនរួមជាតិរបស់លោកស្រីឱ្យគាំទ្រប្រធានាធិបតីថ្មីរូបនេះដោយលោកស្រីសន្យាថាលោកស្រីនឹងកាន់តំណែងរដ្ឋមន្ដ្រីការបរទេស។ តំណែងរដ្ឋមន្ដ្រីការបរទេសត្រូវបានមើលឃើញថាមានវិសាលភាពទំនាក់ទំនងការទូតយ៉ាងខ្លាំងជាមួយនឹងសហគមន៍អន្ដរជាតិ។
កាលពីថ្ងៃម្សិលមិញ សហភាពអឺរ៉ុបបានប្រកាសថាខ្លួននឹងពិចារណាផ្ដល់ជំនួយរាប់សិបលានដុល្លារទៅឱ្យរដ្ឋាភិបាលថ្មីដែលដឹកនាំដោយគណបក្សប្រឆាំងរបស់លោកស្រី អ៊ុងសាន ស៊ូជី ហើយជាមួយគ្នានេះសហរដ្ឋអាមេរិក ជប៉ុនក៏បានសន្យាផ្ដល់ជំនួយទៅឱ្យប្រទេសភូមាផងដែរ នៅខណៈប្រទេសហ្វាំងឡង់សន្យាផ្ដល់ប្រាក់ ៤ លានអឺរ៉ូ។
លោក U Htin Kyaw គឺជាប្រធានាធិបតី ត្រូវបានតែងតាំងចេញពីសភា ដែលនាំមុខដោយ គណបក្សសម្ព័ន្ធជាតិប្រជាធិបតេយ្យរបស់លោកស្រី អ៊ុងសាន ស៊ូជី។ ប្រទេសអាស៊ីអាគ្នេយ៌មួយនេះ មានប្រធានាធិបតី ទើបតែ៩រូបប៉ុណ្ណោះ ចាប់តាំង ពីប្រទេសនេះបានឯករាជ្យពីអាណានិគមអង់គ្លេសនៅឆ្នាំ១៩៤៨។ ប្រធានាធិបតីដំបូងគេគឺព្រះអង្គម្ចាស់ Sao Shwe Thaik។ ប្រទេសនេះ ក៍ធ្លាប់ឆ្លងកាត់ការធ្វើរដ្ឋប្រហារយោធាដំបូង នៅឆ្នាំ១៩៦២ ដោយ ទម្លាក់ព្រះអង្គម្ចាស់រូបនេះពីអំណាច។ មេដឹកនាំរដ្ឋប្រហារ គឺឧត្តមសេនីយ Ne Win។ ព្រះអង្គម្ចាស់ Sao Shwe Thaik ត្រូវបានចាប់ខ្លួន ហើយក្រោយមកសុគតនៅក្នុងពន្ធនាគារ ។
ប្រធានាធិបតីខ្លះកាន់អំណាចបាន តែ ១៧ ថ្ងៃ ក៏មានដែរ និងខ្លះទៀតបាន ៣០ ថ្ងៃ។ ប្រធានាធិបតីទី៨ គឺ លោក ថេន សេន។ មេដឹកនាំកែទម្រង់រូបនេះត្រូវបាន ពួកយោធាលើកបន្តុបឱ្យដឹកនាំប្រទេស នៅឆ្នាំ២០១១ គេហៅថា រដ្ឋាភិបាលពាក់កណ្ដាល យោធា និងស៊ីវិល។ លោកជាអ្នកកែទម្រង់ប្រទេសទៅតាម ការចង់បានរបស់លោកខាងលិច។
អ្នកវិភាគទាំង ២ រូបខាងលើនេះ បានប្រមើមើលថា ដើម្បីឱ្យរដ្ឋាភិបាលមានស្ថិរភាព គេត្រូវ មានតំណែងនាយករដ្ឋមន្ត្រី ហើយប្រធានាធិបតីគួរមានតួនាទីត្រឹមតែមេដឹកនាំពិធីការ (Nominal leader )៕
ប្រភព៖ Irrawaddy
