ភ្នំពេញ៖ ក្នុងកិច្ចពិភាក្សារវាងយុវជន ជាមួយគណបក្សនយោបាយ ដែលរៀបចំដោយអង្គការអភិវឌ្ឍន៍ធនធានយុវជននៅថ្ងៃទី១២ ខែមីនា ឆ្នាំ ២០១៦ នេះ យុវជនប្រមាណជាង ៣០ នាក់ដែលបានចូលរួមក្នុងកិច្ចពិភាក្សានេះ បានជំរុញឱ្យរដ្ឋាភិបាល ពន្លឿនឱ្យមានច្បាប់ស្តីពីឧស្សាហកម្មនិស្សារណកម្ម ដែលពួកគេអះអាងថា ជាប្រយោជន៍ដើម្បីធានាដល់តម្លាភាពក្នុងការទទួលបានធនធានប្រេង។
ក្រៅពីការទាមទារពន្លឿនសេចក្តីព្រាងច្បាប់នេះ ពួកគេក៏ចង់ឱ្យរដ្ឋាភិបាលស្តាប់ និងបញ្ចូលមតិយោបល់របស់ពួកគេក្នុងសេចក្តីព្រាងច្បាប់នេះផងដែរ។ ពាក់ព័ន្ធនឹងសេចក្តីព្រាងច្បាប់ តំណាងមកពីក្រសួងរ៉ែនិងថាមពល បានអះអាងថា ក្រសួងកំពុងតែសិក្សាជាមួយអ្នកជំនាញ ដើម្បីពន្លឿនសេចក្តីព្រាងច្បាប់នេះឱ្យចេញជារូបរាងនាពេលឆាប់ៗនេះ។
ដើម្បីឱ្យកម្ពុជាទទួលបានអត្ថប្រយោជន៍ជាអតិបរមាពីធនធានប្រេង ដែលកម្ពុជានឹងទាញយកមកប្រើក្នុងពេលខាងមុខ ក្រុមយុវជនដែលខ្វាយខ្វល់ពីបញ្ហានេះ បានជម្រុញឱ្យរដ្ឋាភិបាលពន្លឿនក្នុងការពង្រាងសេចក្តីព្រាងច្បាប់ ស្តីពីឧស្សាហកម្មនិស្សារណកម្ម ដើម្បីឱ្យចេញជារូបរាងនឹងអនុវត្តក្នុងពេលឆាប់ៗនេះ។
កញ្ញា ម៉ូ ចាន់ណា ជានិស្សិតនៅសាកលវិទ្យាល័យយូអ៊ឹមអ៊ី ខេត្តបាត់ដំបង បានជំរុញឱ្យរដ្ឋាភិបាលពន្លឿនធ្វើសេចក្តីព្រាងច្បាប់នេះឱ្យបានឆាប់ ដោយសារកញ្ញាមើលឃើញពីបទពិសោធរបស់ប្រទេសមួយចំនួន ព្រោះតែការគ្រប់គ្រងមិនមានភាពច្បាស់លាស់ ធ្វើឱ្យសេដ្ឋកិច្ចរបស់ប្រទេសនោះធ្លាក់ចុះ ទទួលរងនូវបណ្តាសារពីធនធានធម្មជាតិដែលបញ្ហានេះធ្វើឱ្យ យុវជនកម្ពុជាមួយចំនួនបារម្ភខ្លាចកម្ពុជាជួបហានិភ័យ ដូចប្រទេសទាំងនោះដែរ។ មូលហេតុនេះហើយ ទើបកញ្ញាចង់ឱ្យប្រទេសកម្ពុជាមានច្បាប់មួយ ដើម្បីធានានូវប្រសិទ្ធភាព និងតម្លាភាពនៃការគ្រប់គ្រងធនធានធម្មជាតិ។
និស្សិតស្រីរូបនេះ បានបន្តថា ទន្ទឹមនឹងក្រសួងកំពុងធ្វើពង្រាង សេចក្តីព្រាងច្បាប់ឧស្សាហកម្មនិស្សារណកម្មនេះ កញ្ញាចង់ឱ្យក្រសួងយកមតិយោបល់របស់ យុវជន និងប្រជាពលរដ្ឋបញ្ចូលក្នុងច្បាប់នេះផងដែរ។
ចំណែក លោក ថន យូសៀង ជានិស្សិតឆ្នាំទីបី នៃសាកលវិទ្យាល័យន័រតុន បាននិយាយថា ប្រសិនបើច្បាប់នេះ ត្រូវបានអនុម័តចូលជាធរមាន ក្រោមកិច្ចពិភាក្សាជាមួយភាគីពាក់ព័ន្ធឲ្យបានត្រឹមត្រូវនោះ ច្បាប់នេះនឹងអាចគ្រប់គ្រង់ធនធានប្រេងកាតដែលនឹងត្រូវទាញយក ប្រើប្រាស់ក្នុងពេលខាងមុខ មានប្រសិទ្ធភាព តម្លាភាព និងផ្តល់ប្រយោជន៍យ៉ាងច្រើនដល់ការអភិវឌ្ឍន៍ប្រទេស ក៏ដូចជាប្រជាជន។
ផ្ទុយទៅវិញ ប្រសិនបើច្បាប់នេះ ខ្វះការពិភាក្សាឱ្យបានគ្រប់ជ្រុងជ្រោយ ប្រាកដណាស់ថា ច្បាប់នេះនឹងបង្កជាវិបត្តិក្នុងការគ្រប់គ្រប់ធនធានធម្មជាតិ ជាក់ ជាពុំខាន។ ហេតុនេះ លោកចង់ឲ្យរដ្ឋាភិបាល មានការបើកទូលាយ ឱ្យមានការពិភាក្សាជាមួយអ្នកពាក់ព័ន្ធ ជាពិសេសយុវជន ដែលជាក្រុមនុស្ស មានសក្តានុពលនៅក្នុងប្រទេស។
ឆ្លើយតបនឹង នឹងការលើកឡើងរបស់ក្រុមយុវជន លោក សុខ ខាវ៉ាន់ តំណាងមកពីគណបក្សប្រជាជនកម្ពុជា និងតំណាងឲ្យក្រសួងរ៉ែនិងថាមពល បានបញ្ជាក់ថា បច្ចុប្បន្ន សេចក្តីព្រាងច្បាប់មួយនេះ កំពុងស្ថិតក្នុងការពិភាក្សាជាមួយអ្នកជំនាញ។លោកថា ក្រសួងនិងខិតខំបញ្ចប់សេចក្តីព្រាងច្បាប់ឱ្យបានឆាប់ ហើយក្រសួងនឹងបើកឱកាស ឱ្យគ្រប់ជម្ឈដ្ឋានបានចូលរួមបញ្ចេញមតិលើសេចក្តីព្រាងច្បាប់នេះ ផងដែរ។
ចំណែកតំណាងរាស្ត្រមកពីគណបក្សសង្គ្រោះជាតិលោក សុន ឆ័យ ដែលបានចូលរួមក្នុងកិច្ចពិភាក្សានៅថ្ងៃនេះ បានថ្លែងគាំទ្រឱ្យច្បាប់ស្តីពីឧស្សាហកម្មនិស្សារណកម្មចេញជារូបរាងក្នុងឆ្នាំ ២០១៦ នេះ ។ លោកបានជម្រុញឱ្យមានការពិគ្រោះយោបល់ឱ្យបានទូលំទូលាយពីសាធារណជនផងដែរ ដើម្បីធានាថាផលដែលបានមកពីធនធានទាំងនេះប្រើប្រាស់ឱ្យបានត្រឹមត្រូវ ជាពិសេសគឺដើម្បីអនាគតក្មេងៗជំនាន់ក្រោយ និងសម្រាប់ជាប្រយោជន៍ប្រទេសជាតិផងដែរ។
សូមបញ្ជាក់ថា កាលពីឆ្នាំ ២០១៣ រដ្ឋាភិបាលកម្ពុជា បានផ្តល់អាជ្ញាបណ្ណរុករករ៉ែចំនួន ១៤៧ និងអាជ្ញាបណ្ណធ្វើអាជីវកម្មរ៉ែទៅឱ្យក្រុមហ៊ុនរ៉ែចំនួន ៤ ។ បើតាមលោក ឌិត ឌីណា អ្នកនាំពាក្យក្រសួងរ៉ែ និងថាមពល ដែលបានផ្តល់បទសម្ភាសដល់សារព័ត៌មានកន្លងមក បានឱ្យដឹងថា រដ្ឋាភិបាលកម្ពុជានឹងធ្វើយ៉ាងណាឱ្យដំណក់ប្រេង បានបូមចេញប្រើប្រាស់ក្នុងឆ្នាំ ២០១៧ ខាងមុខនេះ៕
