ភ្នំពេញ៖ ក្រោយពីស្ថានទូតអាមេរិកប្រចាំនៅកម្ពុជាសន្យាជួយប្រទេសកម្ពុជា លើការងារកំណែទម្រង់ការបោះឆ្នោតនាពេលខាងមុខនេះរួចមក ទាំងអ្នកឃ្លាំមើលការបោះឆ្នោត ទាំងគណបក្សប្រឆាំងយល់ឃើញថា ប្រការនេះអាចជួយឱ្យការបោះឆ្នោតនៅកម្ពុជានាពេលខាងមុខកាន់តែមានតម្លាភាព និងឯករាជ្យភាពជាងការបោះឆ្នោតឆ្នាំកន្លងមក។ ស្ថានទូតអាមេរិកប្រចាំកម្ពុជា បានសន្យាថានឹងជួយប្រទេសកម្ពុជា លើការងារកំណែទម្រង់ការបោះឆ្នោត នាពេលខាងមុខនេះ។
លោក ហង្ស ពុទ្ធា អ្នកនាំពាក្យគណៈកម្មការរៀបចំការបោះឆ្នោតហៅកាត់ថា ( គ.ជ.ប ) បានមានប្រសាសន៍ប្រាប់វិទ្យុស្ដ្រីនៅថ្ងៃនេះថា ការផ្ដល់ជំនួយរបស់សហរដ្ឋអាមេរិកដល់ការធ្វើកំណែទម្រង់គណៈកម្មការរៀបចំការបោះឆ្នោតនាពេលនេះ គឺជារឿងដ៏ល្អសម្រាប់ដំណើរការរបស់ គ.ជ.ប ។ លោកថា ទន្ទឹមនឹងការផ្ដល់ជំនួយនេះ សហរដ្ឋអាមេរិកនឹងចូលរួមធ្វើជាអ្នកអង្កេតការណ៍ការបោះឆ្នោតក្នុងឆ្នាំ ២០១៧-២០១៨ ខាងមុខនេះ ហើយប្រសិនជាសហរដ្ឋអាមេរិកមើលឃើញពីភាពមិនប្រក្រតីណាមួយកើតឡើង អាចធ្វើការរិះគន់ចំពោះមុខ ដើម្បីរកដំណោះស្រាយជាមួយគណៈកម្មការរៀបចំការបោះឆ្នោតតែម្ដង។
ចំណែកលោក គល់ បញ្ញា នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល បានមានប្រសាសន៍ថា ការចូលរួមជួយកម្ពុជាក្នុងការធ្វើកំណែទម្រង់ការបោះឆ្នោតនេះ គឺជារឿងល្អមួយដែលនឹងធ្វើឱ្យគណៈកម្មការរៀបចំការបោះឆ្នោតរក្សាលំនឹងនៃឯករាជ្យភាពរបស់ខ្លួនកាន់តែប្រសើរឡើង។
លោក គល់ បញ្ញា បញ្ជាក់ថា ការជួយរបស់អាមេរិកនាពេលនេះ នឹងធ្វើឱ្យសហគមន៍អឺរ៉ុបព្រមទទួលស្គាល់ការបោះឆ្នោតនៅម្ពុជា។ ប៉ុន្តែទោះជាយ៉ាងណា លោកថា ថ្វីត្បិតស្ថាប័ននេះ មានការជួយជ្រោមជ្រែងពីសហរដ្ឋអាមេរិកយ៉ាងណាក្តី តែប្រជាពលរដ្ឋខ្មែរទូទៅ និងគណបក្សនយោបាយមួយចំនួនមិនជឿជាក់ទាំងស្រុងទៅលើកំណែទម្រង់នេះឡើយទេ។
«វាមិនអាចគេចផុតពីការចោទប្រកាន់បានភ្លាមៗទេ តែយ៉ាងហោចណាស់វាអាចថយនៅការចោទប្រកាន់ ហើយកើនឡើងនៅទំនុកចិត្ដពីអ្នកចូលរួមប្រគួតប្រជែង ហោចណាស់ពីក្រុមគណបក្សកាន់អំណាច និងគណបក្សប្រឆាំង»។
ជុំវិញរឿងនេះដែរលោក យ៉ែម បញ្ញាឬទ្ធិ អ្នកនាំពាក្យគណបក្សសង្គ្រោះជាតិសាទរចំពោះការយកចិត្ដទុកដាក់ជួយពីសហរដ្ឋអាមេរិចដល់កម្ពុជាសម្រាប់រៀបចំការបោះឆ្នោតនាពេលខាងមុខនេះ។ លោកថា ការផ្ដល់ជំនួយនេះ នឹងធ្វើគណៈកម្មការរៀបចំការបោះឆ្នោតអាចមានភាពងាយស្រួលក្នុងការបំពេញភារកិច្ចរបស់ខ្លួនបានកាន់តែល្អប្រសើរ។
លោក យ៉ែម បញ្ញាឬទ្ធិ បញ្ជាក់ថា បើសិនជា គ.ជ.ប មានលទ្ធភាព និងមធ្យោបាយគ្រប់គ្រាន់ ដើម្បីបំពេញការងាររបស់ខ្លួនហើយនោះ ឯករាជ្យភាពរបស់គណកម្មការរៀបចំការបោះឆ្នោត និងមានកាន់តែខ្ពស់ជាងពេលមុន។ «យើងជឿងថាគាត់មានលទ្ធិភាព និងមធ្យោបាយដើម្បីបំពេញការងារបានពេញលេញ ដូច្នេះជាលក្ខណៈមួយយើងយល់ថា ការបំពេញការងារបានពេញលេញប្រកបដោយប្រសិទ្ធភាពខ្ពស់ នោះឯករាជ្យភាពនិងអព្យាក្រឹត្យភាព និងកាន់តែប្រសើរ»។
សូមរំឭកថា ការបោះឆ្នោតនៅកម្ពុជាកាលពីឆ្នាំ ២០១៣ ត្រូវបានពលរដ្ឋ និងគណបក្សប្រឆាំងចោទប្រកាន់ គ.ជ.ប ថាធ្វើការដោយគ្មានតម្លាភាព គ្មានឯករាជ្យភាព និងលម្អៀងទៅកាន់ភាគីគណបក្សកាន់អំណាចសព្វថ្ងៃទៀតផង។ ទោះជាយ៉ាងណាក៏ដោយ ការចោទប្រកាន់នោះត្រូវបានគណៈកម្មការរៀបចំការបោះឆ្នោតច្រានចោល ដោយបដិសេធថា វាមិនមែនជាការពិត។ សម្រាប់សេចក្ដីប្រកាសព័ត៌មានរបស់ស្ថានទូតអាមេរិកប្រចាំកម្ពុជា ដែលសន្យានឹងផ្ដល់ជំនួយដល់ការកំណែទម្រង់ការរៀបចំការបោះឆ្នោតនាពេលខាងមុខនេះ មានមតិសាធារណជនជាច្រើនបង្ហាញក្ដីសង្ឃឹមថាគណៈកម្មការនេះអាចនឹងមានសុចរិតភាព ឯករាជ្យភាពខ្ពស់ជាងការបោះឆ្នោតក្នុងពេលកន្លងទៅ៕
