មីយ៉ាន់ម៉ា៖ កាលពីថ្ងៃម្សិលមិញសភាជាន់ទាបដែលមានសំឡេងលើសលប់ដោយគណបក្សសម្ព័ន្ធជាតិប្រជាធិបតេយ្យរបស់លោកស្រី អ៊ុងសាន ស៊ូជី បានអនុម័តគាំទ្របេក្ខជនប្រធានាធិបតី និងអនុប្រធានប្រធានាធិបតី ៣ រូបតែមិនមានលោកស្រី អ៊ុងសាន ស៊ូជី ដែលជាជ័យលាភីណូប៊ែលសន្ដិភាពនិងជាជើងឯកប្រជាធិបតេយ្យនោះទេ។
នៅថ្ងៃទី១ ខែមេសា ខាងមុខនេះ ប្រទេសអតីតរបបយោធាមួយនេះនឹងផ្ទេរអំណាចរដ្ឋបាលដែលពួកឧត្តមសេនីយកាន់អំណាចជាច្រើនទសវត្សរ៍ទៅឱ្យប្រធានាធិបតីថ្មីជារដ្ឋាភិបាលស៊ីវិលកើតចេញពីឆន្ទៈរបស់ប្រជាជនតាមរយៈការបោះឆ្នោតខែវិច្ឆិកា ឆ្នាំ ២០១៥។
លោកស្រី អ៊ុងសាន ស៊ូជី ត្រូវបានរដ្ឋធម្មនុញ្ញដែលរៀបរៀងដោយពួកយោធាឆ្នាំ២០០៨ ហាមលោកស្រីធ្វើជាប្រធានាធិបតី ដែលជាឧបសគ្គមួយធ្វើឱ្យលោកស្រីខកខានកាន់តំណែងកំពូលរបស់ប្រទេសមួយនេះ។
លោកស្រីមិនបានបង្ហាញខ្លួននៅពេលដែលសភាអនុម័តគាំទ្រតំណែងប្រធានាធិបតីថ្មីនេះទេ។ លោកស្រីបានថ្លែងសុំទោសប្រជាជនរបស់លោកស្រី ដែលលោកស្រីមិនមានឱកាសក្លាយជាមេដឹកនាំកំពូលរបស់ប្រទេសនេះតែលោកស្រីបានទទូចឱ្យប្រជាជនភូមាសាមគ្គីគ្នាគាំទ្រប្រធានាធិបតីថ្មី។
ប្រធានាធិបតីថ្មីគឺលោក Htin Kyaw ត្រូវបានរាយការណ៍មកថាជាមនុស្សស្និទ្ធិបំផុតរបស់លោកស្រី អ៊ុងសាន ស៊ូជី និងជាអ្នកនយោបាយមានយុទ្ធសាស្ដ្ររបស់គណបក្សសម្ព័ន្ធជាតិប្រជាធិបតេយ្យដែលបានឈ្នះឆ្នោតសំឡេងភាគច្រើនក្នុងការបោះឆ្នោតសភាកាលពីខែវិច្ឆិកា ឆ្នាំ២០១៥។
ទាំងអ្នកសង្កេតការណ៍ជាតិ និងអន្ដរជាតិក៏សម្ដែងមន្ទិលផងដែរចំពោះការបាត់បង់ឱកាសសម្រាប់លោកស្រី អ៊ុងសាន ស៊ូជី ក្លាយជាប្រធានាធិបតីលើកដំបូងនៃប្រទេសប្រកាន់របបសឹកជាច្រើនទសវត្សរ៍មកនេះ។ តែបែបនេះក្ដីលោកស្រី អ៊ុងសាន ស៊ូជី ទំនងនឹងទទួលយកតំណែងរដ្ឋមន្ដ្រីការបរទេស។
អ្វីដែលធ្វើឱ្យលោកស្រីមិនអាចឆក់យកតំណែងកំពូលនេះបាន គឺដោយសារតែមាត្រា ៥៩ នៃរដ្ឋធម្មនុញ្ញរបស់ពួកយោធាចែងមិនឱ្យមេដឹកនាំទាំងឡាយណាដែលមានឈាមជ័រជាមួយជនបរទេសឡើងកាន់អំណាចបានឡើយ។ លោកស្រី អ៊ុងសាន ស៊ូជី មានកូន និងមានប្ដីជាជនជាតិអង់គ្លេស។ លោកស្រីមានកូនប្រុស ២ នាក់ ដែលពួកគេកំពុងរស់នៅប្រទេសអង់គ្លេស។
នៅមុនការតែងតាំងឈ្មោះប្រធានាធិបតីនេះលោកស្រី អ៊ុងសាន ស៊ូជី បានព្យាយាមបញ្ចុះបញ្ចូលពួកយោធាឱ្យព្យួរមាត្រានេះផងដែរ ប៉ុន្ដែមិនបានសម្រេច។ អ្នកសង្កេតការណ៍មួយចំនួនមើលឃើញថា ប្រទេសភូមាស្ថិតនៅក្នុងស្ថានភាពផុយស្រួយជាថ្មីម្ដងទៀត ប៉ុន្ដែពួកគេសរសើរដល់លោកស្រី អ៊ុងសាន ស៊ូជី ដែលមានឆន្ទៈបត់បែនទៅតាមកាលៈទេសៈ និងទាន់ពេលវេលា។ អ្នកសង្កេតការណ៍ព្រមានថា ប្រសិនបើមិនមានដោះស្រាយបន្ទាន់ដូចនេះ គឺពួកយោធាអាចនឹងធ្វើរដ្ឋប្រហារជាថ្មីម្ដងទៀត គឺអាចដូចនឹងឆ្នាំ១៩៩០។
យ៉ាងណាក៏ដោយរបបសឹកយោធាលែងមានរូបរាងទៀតហើយចាប់ពីថ្ងៃទី១ មេសា ខាងមុខនេះ គឺនៅពេលនោះនឹងមានការផ្ទេរអំណាចជាប្រវត្តិសាស្ដ្រ។
ប្រធានាធិបតីដែលចុះចេញពីតំណែងឆាប់ៗនេះ គឺលោក ថេន សេន បានសម្ដែងការសាទរនៅចំពោះមុខអ្នកសារព័ត៌មានភ្លាមៗ បន្ទាប់ពីសភាអនុម័តគាំទ្រប្រធានាធិបតីថ្មីដែលមិនមែនលោកស្រី អ៊ុងសាន ស៊ូជី។
លោក ថេន សេន ប្រធានាធិបតីលើកបន្តុបដោយពួកយោធាបាននិយាយថា លោករីករាយនឹងផ្ទេរអំណាចទៅឱ្យប្រធានាធិបតីថ្មីរូបនេះ ហើយសន្យាថានឹងខិតខំសហប្រតិបត្តិការជាមួយគ្នាបន្ដទៅមុខទៀតដើម្បីអភិវឌ្ឍប្រទេសជាតិ៕
ប្រភព៖ Mizzima, CNA